Levitiko

22 Ne toe faipati atu a Ieova ki a Mose, ana muna: 2 “Fai ki a Alona mo ana tama tāgata ke fakaeteete i olotou mea e fai* ki mea tapu a tino Isalaelu, kae ke mo a ma fakamasei ne latou toku igoa tapu+ i mea kolā e fakatapu mai ne latou ki a au.+ Au ko Ieova. 3 Fai ki a latou, ‘So se tama a koutou i otou kautama katoa e fakapilipili atu ki mea tapu kolā ne fakatapu ne tino Isalaelu ki a Ieova, i te taimi e se ‵ma ei a ia, e ‵tau o tapale kea‵tea* mai i oku mua.+ Au ko Ieova. 4 E seai se tagata mai i tama a Alona telā e lepela+ io me e ‵sali a ukau+ i tena koga tapu e ‵tau o kai ki mea tapu ke oko ki te taimi ko ‵ma+ ei a ia, faitalia me se tagata ne patele ki se tino telā ko se ‵ma ona ko te foitino mate+ o se tino, io me se tagata telā e ‵sali tena sua,+ 5 io me se tagata e patele ki se mea ola sē ‵ma i manu kolā e oloolo fakatasi+ faeloa io me patele ki se tagata telā e se ‵ma i so se pogai, kae fai ei a ia ke se ‵ma.+ 6 A te tino e patele ki se mea i mea konei ka se ‵ma eiloa ke oko ki te afiafi, e se ‵tau o kai ki so se mea tapu, kae e ‵tau mo ia o koukou ki vai.+ 7 Kafai ko tō te mata o te la, ko ‵ma ei a ia, kae mai tua ifo ko mafai a ia o kai ki nisi mea kolā e tapu me konā eiloa ana meakai.+ 8 E se ‵tau foki o kai a ia ki so se manu ne maua atu ko mate, io me se manu ne saesae ne manu fe‵kai, kae fai ei ke se ‵ma a ia.+ Au ko Ieova.

9 “‘E ‵tau mo latou o tausi te lotou tiute ki a au, ko te mea ke se agasala latou kae ‵mate ona ko te mea tenā me ko fakaseaoga ne latou a mea tapu. Au ko Ieova telā e fakatapu ne au latou.

10 “‘E seai se isi tino* e ‵tau o kai ki so se mea tapu.+ E seai se tino fakaa‵tea e nofo i te faitaulaga io me se tino galue e ‵tau o kai ki so se mea tapu. 11 Kae kafai e ‵togi ne se faitaulaga se tino ki ana tupe totino, e mafai o kai a te tino tenā ki mea tapu. E mafai foki o ‵kai a pologa kolā ne fa‵nau i loto i tena fale ki ana meakai.+ 12 Kafai e avaga se tama fafine a te faitaulaga ki se tagata telā e sē se faitaulaga,* e se mafai o kai tou fafine ki meaalofa o mea tapu. 13 Kae kafai ko mate te avaga a te tama fafine a te faitaulaga io me ko ‵tala tena avaga kae e seai ne ana tama‵liki, kae foki atu ki te fale o tena tamana e pelā loa mo te taimi koi talavou ei a ia, e mafai o kai tou fafine ki nisi meakai a tena tamana;+ kae e seai se isi tino* e mafai o kai ki ei.

14 “‘Kafai se tagata e kai ‵se ki se mea tapu, e ‵tau mo ia o fakaopoopo atu te tasi-vae-lima o te ‵togi o mea konā kae avatu a te taulaga tapu ki te faitaulaga.+ 15 E se ‵tau o fakamasei ne latou a mea tapu a tino Isalaelu, kolā e tuku fakameaalofa atu ki a Ieova+ 16 kae fai ei ke fakasala latou ona ko te lotou mea ‵se i te ‵kai ki mea tapu a latou; me i a au ko Ieova, telā e fakatapu ne au a latou.’”

17 Ne toe faipati atu a Ieova ki a Mose, ana muna: 18 “Faipati atu ki a Alona mo ana tama tāgata mo tino Isalaelu katoa, kae fai atu ki a latou, ‘Kafai e ofo atu ne se tagata Isalaelu io me se tino fakaa‵tea telā e nofo i Isalaelu se taulaga ‵sunu+ ki a Ieova ke fakataunu ei tena tautoga io me ofo atu se taulaga o te lotomalie,+ 19 e ‵tau o ofo atu ne ia se pulumakau tagata ‵lei+ mai tena lafu, tamā mamoe, io me ne kouti ko te mea ke talia ei a ia. 20 E se ‵tau mo koutou o ofo atu se manu e isi se pona+ i ei, me ka se mafai o talia koutou ona ko te mea tenā.

21 “‘Kafai e ofo atu ne se tagata se taulaga ‵kai fakatasi+ ki a Ieova ke ‵togi ei tena tautoga io me e pelā me se taulaga o te lotomalie, e ‵tau se manu ‵lei mai i te lafu pulumakau io me ko te lafu mamoe, ko te mea ke talia ei a ia. E se ‵tau eiloa o isi se pona i ei. 22 E seai se manu e ofo atu e ‵tau o ‵kivi, e isi sena ivi e fati, se pakiaga, se mea fulafula, e fogea, io me e lafā; e se ‵tau mo koutou o ofo atu se mea i mea konei ki a Ieova io me ofo atu se vaegā mea penā i luga i te fatafaitaulaga ki a Ieova. 23 E mafai o ofo atu ne koe se pulumakau tagata io me se mamoe telā e tō loa io me tō toetoe tena vae io me ko tena lima, e pelā me se taulaga o te lotomalie; kae ka se talia a te mea tenā māfai e ofo atu e pelā me se taulaga o te tautoga. 24 Kae e se ‵tau o ofo atu ne koe ki a Ieova se manu telā e pa‵kia ana koga tapu io me pala‵pala io me ne ‵futi ke ‵to io me ne ‵kati kea‵tea, e se ‵tau o ofo atu ne koutou a vaegā manu penā i te otou fenua. 25 E se ‵tau mo koutou o ofo atu so se mea penei mai i se tino o fenua fakaa‵tea e pelā me ne meakai a te otou Atua, me i mea konā e ma‵sei kae e isi ne olotou pona. Ka se mafai o talia a mea konā mai i a koutou.’”

26 Ne toe faipati atu a Ieova ki a Mose, ana muna: 27 “Kafai e fanau mai se pulumakau tagata io me se tamā mamoe io me se kouti, ka ‵nofo fakatasi te manu tenā mo tena mātua i aso e fitu,+ kae i te valu o aso o fano ki mua ko talia ei ke ofo atu te manu tenā e pelā me se taulaga, se taulaga e ofo atu i luga i te afi ki a Ieova. 28 E se ‵tau o tamate ne koe se pulumakau tagata io me se mamoe fakatasi mo ana tama i te aso eiloa e tasi.+

29 “Kafai e ofo atu ne koutou se taulaga fakafetai ki a Ieova,+ e ‵tau o ofo atu ke talia ne ia a koutou. 30 E ‵tau o kai a te taulaga i te aso eiloa tenā. E se ‵tau mo koutou o faka‵toe ne mea mai i ei ke oko ki te tafataeao.+ Au ko Ieova.

31 “E ‵tau mo koutou o tausi aku fakatonuga kae faka‵logo ki ei.+ Au ko Ieova. 32 E se ‵tau mo koutou o fakamasei toku igoa tapu,+ kae e ‵tau o faka‵malu ne koutou au i mua o tino Isalaelu+ katoa. Au ko Ieova telā e faka‵malu ne au koutou,+ 33 ko te tino telā ne aumai ne ia koutou ki tua mo te fenua o Aikupito ke fakatalitonu atu i a ia ko te otou Atua.+ Au ko Ieova.”