Levitiko

24 Ne toe faipati atu a Ieova ki a Mose, ana muna: 2 “Fakatonu a tino Isalaelu ke aumai ki a koe ne sinu ‵ma mai olive ko oti ne tuki mo faka‵ka a moli ko te mea ke ‵ka faeloa.+ 3 Mai i tua o te ‵pui laugatu o te Pusa o te Feagaiga i loto i te faleie o maopoopoga, e ‵tau o fakatoka ne Alona ke ‵ka faeloa a moli mai te afiafi ke oko ki te tafataeao, i mua o Ieova i taimi katoa. A te mea tenā se tulafono fakavae tumau i otou kautama katoa. 4 E ‵tau o fakatoka ne ia a moli i olotou tulaga i luga i te tugamoli+ telā ne faite ki te tinā aulo i mua o Ieova i taimi katoa.

5 “Ka puke ne koe a falaoa ‵mata kae ‵lei kae tao ne falaoa puku‵puku e 12. E lua-vae-sefulu te aofaki o te efa* e ‵tau o fakaaoga ki falaoa takitasi. 6 Ka tuku ne koe a mea konā i vaega e lua, e taki ono i te vaega e tasi,+ i luga i te taipola ne faite ki te tinā aulo i mua o Ieova.+ 7 E ‵tau o tuku ne koe a pulu lipano ‵ma i luga i vaega takitasi, kae ka fai e pelā me se falaoa o te taulaga o fakamasauaga+ telā e ofo atu i luga i te afi ki a Ieova. 8 E ‵tau o fakatoka faeloa ne ia a te mea tenā i Sapati takitasi i mua o Ieova.+ A te mea tenā se feagaiga tumau ne fai mo tino Isalaelu. 9 Ka fai a te mea tenā ma Alona mo ana tama tāgata,+ kae ka ‵kai latou ki ei i te koga tapu,+ me i te mea tenā se mea tafasili i te tapu ki a ia mai i taulaga a Ieova kolā e ofo atu i luga i te afi, e pelā me se tulafono foliki tumau.”

10 Kae ne nofo atu i tino Isalaelu konā, a te tama tagata a se fafine Isalaelu mo se tagata Aikupito,+ kae ne taua a tou tagata mo se tagata Isalaelu i loto i te fakai. 11 Ne kamata o taku fakamasei ne te tama tagata a te fafine Isalaelu a te igoa o te Atua* kae pati masei* ne ia.+ Tenā ne avatu ei ne latou a ia ki a Mose.+ A te igoa o tena mātua ko Selomita, te tama fafine a Tepili mai te matakāiga o Tanu. 12 Ne tausi fakapagota ne latou a ia ke oko ki te taimi ko fakaasi manino mai ei ki a latou a te ikuga a Ieova.+

13 Tenā ne fai atu ei a Ieova ki a Mose: 14 “Aumai ki tua mo te fakai a te tino telā ne pati masei, kae ko tino katoa kolā ne lagona ne latou ana pati e ‵tau o na olotou lima ki luga i tena ulu, ko peipei ei a ia ne te fakapotopotoga kātoa ki fatu.+ 15 Kae e ‵tau o fai atu koe ki tino Isalaelu, ‘Kafai e pati masei ne se tino a tena Atua, e ‵tau eiloa o fakasala a ia ona ko tena agasala. 16 Tela la, e ‵tau eiloa o tamate a te tino telā ne taku fakamasei ne ia te igoa o Ieova.+ E ‵tau o peipei a ia ki fatu ne te fakapotopotoga kātoa. E ‵tau o tamate a te tino fakaa‵tea e pelā eiloa mo te tino tonu o te fenua māfai ne taku fakamasei ne ia te igoa o te Atua.

17 “‘Kafai e tamate ne se tagata a te suā tino, e ‵tau eiloa o tamate a ia.+ 18 So se tino e ‵kini kae tamate ne ia se manu lata, e ‵tau o sui ne ia a te manu tenā, te ola ki te ola. 19 Kafai ne fakapakia ne se tagata a tena tuakoi, a te mea ne fai ne ia e ‵tau eiloa o fai atu ki a ia.+ 20 Te ivi fati ki te ivi fati, te mata ki te mata, te nifo ki te nifo, a te vaegā pakiaga telā ne fai ne ia e ‵tau eiloa o fai atu ki a ia.+ 21 A te tagata e ‵kini kae tamate ne ia se manu e ‵tau o sui ne ia te manu tenā,+ kae ko te tino e ‵kini kae tamate ne ia se tagata e ‵tau eiloa o tamate.+

22 “‘E tasi eiloa te ikuga o fakamasinoga ka maua ne koutou, faitalia me se tino fakaa‵tea io me se tino tonu o te fenua,+ me i a au ko Ieova te otou Atua.’”

23 Tenā ne faipati atu ei a Mose ki tino Isalaelu, kae ne aumai ne latou te tino telā ne pati masei ki tua o te fakai kae peipei ne latou ki fatu.+ Ne fai eiloa ne tino Isalaelu a mea katoa e ‵tusa mo te fakatonuga a Ieova ki a Mose.