Te Lua Tupu
9 Ne kalaga atu a Elisaia te pelofeta ki se tama tagata e tokotasi a te kau pelofeta kae fai atu ki ei: “‵Sai ou gatu ki tou taugasulu kae puke fakavave te tiā sinu tenei kae fano ki Lamota-kileata.+ 2 Kafai e oko atu koe ki konā, ‵sala ki a Ieu+ te tama tagata a Iosefatu te tama tagata a Nimesi; fano ki loto kae fai ke tu mai a ia ki luga mai i ana taina kae ave a ia ki loto i te potu tafa ki loto. 3 Tenā ko puke ei ne koe te tiā sinu kae ‵ligi ki luga i tena ulu kae fai atu, ‘Konei a pati a Ieova ne fai mai: “Ko ‵tofi ne au koe ke fai mo tupu o Isalaelu.”’+ Tenā ko ‵tala ei ne koe te mataloa kae tele fakavave kea‵tea.”
4 Tenā ne fano ei te tavini a te pelofeta i tena auala ki Lamota-kileata. 5 I tena okoatuga, ne saga‵saga mai i konā a takitaki o te kautau. Ne fai atu a ia: “Tou ‵malu, e isi se fekau ne vau mo au ki a koe.” Ne fesili atu a Ieu: “Ki a ai?” Ne fai atu a ia: “Ki a koe, e tou ‵malu.” 6 Ne tu aka a Ieu kae fano ki loto i te fale; ne ‵ligi ne te tavini a te sinu ki luga i tena ulu kae fai atu ki ei: “Konei a pati a Ieova te Atua o Isalaelu ne fai mai: ‘Ko ‵tofi ne au koe ke fai mo tupu o tino o Ieova i Isalaelu.+ 7 E ‵tau mo koe o ‵ta a te kāiga o Aapo tou aliki, kae ka taui ne au a toto o aku tavini ko pelofeta mo tavini katoa a Ieova kolā ne ‵mate i lima o Iesepela.+ 8 Kae ko te kāiga katoa o Aapo ka ‵mate; kae ka ‵ta fakapalele ne au a tāgata katoa i te kāiga o Aapo, e aofia i ei a latou kolā e se ma‵losi kae vāivāi i Isalaelu.+ 9 Kae ka fai ne au te kāiga o Aapo ke pelā mo te kāiga o Ielopoamo+ te tama tagata a Nepata kae ke pelā mo te kāiga o Paasa+ te tama tagata a Aita. 10 Kae pelā mo Iesepela, ka kai a ia ne kuli i te laukele i Ieseleelu,+ kae ka seai se tino e tanu ne ia tou fafine.’” I konā loa, ne ‵tala ne ia te mataloa kae tele kea‵tea.+
11 I te fokimaiga a Ieu ki tavini a tena aliki, ne fesili atu latou ki a ia: “E ‵lei a mea katoa? Kaia ne vau ei te tagata fakavalevale tenā ki a koe?” Ne tali atu tou tagata: “E iloa eiloa ne koutou a te tagata tenā mo ana vaegā pati e fai.” 12 Kae ne fai atu latou: “A te mea tenā e se tonu! Fakamolemole fai mai ki a matou.” Tenā ne fai atu ei a ia: “Konei ana pati ne fai mai ki a au, ana muna, ‘Konei a pati a Ieova ne fai mai: “Ko ‵tofi ne au koe ke fai mo tupu o Isalaelu.”’”+ 13 Tenā ne puke fakavave ei ne latou taki tokotasi olotou gatu kae ‵fola i te sitepu mai lalo i a ia,+ kae ili ne latou te pu kae fai atu: “A Ieu ko fai nei mo tupu!”+ 14 Tenā ne fai ei te togafiti a Ieu+ te tama tagata a Iosefatu te tama tagata a Nimesi ki a Iolama.
A Iolama ne nofo i Lamota-kileata+ ke puipui ei te fakai tenā, ko ia mo tino Isalaelu katoa, ona ko te tupu o Sulia ko Hasaeli.+ 15 Fakamuli ifo, ne foki a te Tupu ko Iolama ki Ieseleelu+ ko te mea ke ‵lei ana pakiaga kolā ne pakia i tino Sulia i tena tauatuga ki te tupu o Sulia ko Hasaeli.+
Ne fai atu a Ieu: “Kafai e lotomalie koe ki ei, sa talia ne koe so se tino ke sao mai te fakai kae fano o lipoti atu a te mea tenei ki te kau i Ieseleelu.” 16 Tenā ne sopo ei a Ieu ki tena kaliota kae fano ki Ieseleelu, i a Iolama e takato i konā me e pakia, kae ko te tupu o Iuta ko Aasaia ko oti ne fano o āsi ki a Iolama. 17 I te taimi ne tu ei te leoleo i luga i te taoa i Ieseleelu, ne lavea ne ia a tāgata e tokouke a Ieu e o‵mai. Tenā ne fai atu ei a ia: “E lavea ne au a tāgata e tokouke.” Ne fai atu a Iolama: “Puke se sotia kae uga atu ke fano o fakafetaui ki a latou, kae ke fai atu a ia, penei ‘A koutou e o‵mai mo te filemu?’” 18 Tenā ne tele atu se tagata fakatele solofanua o fakafetaui ki a latou kae fai atu: “Konei a pati a te tupu ne fai mai, ‘A koutou e o‵mai mo te filemu?’” Kae ne fai atu a Ieu: “Se a tau mea e fai ki te ‘filemu’? Vau o tautali mai i a au!”
Tenā ne fai atu ei a te leoleo: “Ko oti ne oko atu te avefekau ki a latou, kae e seki foki mai a ia.” 19 Ne toe uga atu ne ia se tagata fakatele solofanua i te lua, telā ne fai atu i tena okoatuga ki a latou: “Konei a pati a te tupu ne fai mai, ‘A koutou e o‵mai mo te filemu?’” Kae ne fai atu a Ieu: “Se a tau mea e fai ki te ‘filemu’? Vau o tautali mai i a au!”
20 Tenā ne fai atu ei a te leoleo: “Ko oti a ia ne oko ki a latou, kae e seki foki mai tou tagata, kae ko te fakatele a te lotou takitaki e ‵pau mo te fakatele a Ieu te mokopuna* o Nimesi, me e fakatele a ia e pelā me se tagata fakavalevale.” 21 Muna a Iolama: “Fakatoka!” Tenā ne fakatoka ei ana kaliota tau kae ne olo atu a te tupu o Isalaelu ko Iolama mo te tupu o Iuta ko Aasaia+ i lā kaliota tau o fakafetaui ki a Ieu. Ne fetaui lāua mo tou tagata i te laukele o Napota+ te tino Ieseleelu.
22 I te laveaga eiloa ne Iolama a Ieu, ne fai atu a ia: “A koe e vau mo te filemu, e Ieu?” Kae ne tali atu a ia: “E mafai pefea o maua te filemu me koi tumau eiloa a amioga talitāgata a Iesepela+ tou mātua mo ana faifaiga faivailakau e uke?”+ 23 I konā eiloa ne ‵fuli te kaliota a Iolama o tele, kae fai atu ki a Aasaia: “A tāua ko oti ne fakatogafitigina, e Aasaia!” 24 Ne puke ne Ieu tena kausana ki tena lima kae sana ne ia a Iolama i te va o ana tuauma, kae ne sae te matasana ki tua mo tena fatu, kae ne siga a ia i luga i tena kaliota tau. 25 Tenā ne fai atu ei a ia ki a Pitika tena ofisa o kautau: “Sau aka a ia kae ‵pei atu ki te laukele o Napota te tino Ieseleelu.+ Masaua me ne ‵tele tasi tāua i tua o Aapo tena tamana i te taimi ne fai ei ne Ieova te folafolaga tenei e ‵teke atu ei ki a ia:+ 26 ‘“E pelā eiloa mo te laveaga ne au a toto o Napota+ mo toto o ana tama tāgata i te aso anafi,” ko pati a Ieova, “ka toe taui atu ne au+ ki a koe i te laukele eiloa tenei,” ko pati a Ieova.’ Tela la, sau aka a ia kae ‵pei atu ki te laukele tenā, e ‵tusa eiloa mo pati a Ieova ne fai.”+
27 I te laveaga ne te tupu o Iuta ko Aasaia+ a te mea ne tupu, ne tele tou tagata i te auala e pili ki se fatoaga lasi.* (Fakamuli ifo, ne afuli a ia ne Ieu kae fai atu: “Ta foki a ia!” Tenā ne ta ei ne latou a ia i luga i te kaliota i tena auala ki Kulu, telā e tu pili ki Ipeleamo.+ Kae ne tele atu eiloa a ia ki Mekito, mate ei i konā. 28 Tenā ne ave ei a ia ne ana tavini i loto i te kaliota ki Ielusalema, kae tanu ne latou a ia i tena tanuga fakatasi mo ana tupuga i te Fakai o Tavita.+ 29 Ko te 11 o tausaga o te pulega a Iolama te tama tagata a Aapo kae ne fai ei a Aasaia+ mo tupu o Iuta.)
30 I te fanatuga a Ieu ki Ieseleelu,+ ne logo a Iesepela+ i te mea tenā. Ne pēni ne ia ana mata ki te pēni uli* kae teu fakagaligali tena ulu kae kilo ifo ki lalo mai te famalama. 31 I te uluatuga a Ieu ki loto i te mataloa o te fakai, ne fai atu tou fafine: “E a, e ‵lei a Semeli, te tino ne tamate ne ia tena aliki?”+ 32 Ne kilo aka tou tagata ki luga i te famalama, kae fai atu: “Ko oi e kau i a au? Ko oi?”+ I konā eiloa ne ‵kilo fakavave ifo a ofisa e tokolua io me tokotolu ki lalo i a ia. 33 Ne fai atu a ia: “‵Pei ifo tou fafine ki lalo!” Tenā ne ‵pei ifo ei ne latou a ia ki lalo, kae ne ‵pisi atu a toto o tou fafine ki luga i te ‵pui mo solofanua, kae ne tele atu a ia i luga i tou fafine. 34 Oti aka, ne fano a ia ki loto o kai kae inu. Tenā ne fai atu ei a ia: “Fakamolemole, fai faka‵lei aka te fafine masei tenā kae avatu o tanu. Me i a ia ko te tama fafine a te tupu.”+ 35 Kae i te lotou oloatuga o tanu tou fafine, e seai ne olotou mea ne maua kae na ko tena gatiulupoko fua mo ana vae mo ana alofilima.+ 36 I te lotou ‵fokimaiga kae fai atu te mea tenā ki a ia, ana muna: “Ko fakataunu ne te mea tenei a pati a Ieova+ ne fai e auala i tena tavini ko Elia te tino Tisepi, ana muna, ‘I te laukele o Ieseleelu, ka kai ei ne kuli te foitino o Iesepela.+ 37 Kae ko te foitino mate o Iesepela ka fai pelā me ne kaiao i te laukele o Ieseleelu, ko te mea ke se fai mai latou penei: “Tenei a Iesepela.”’”