Te Muamua Samuelu

31 I te taimi tenā, a tino Filisitia ne taua atu ki tino Isalaelu.+ Kae ko tāgata Isalaelu ne ‵tele kea‵tea mai tino Filisitia, kae tokouke a tino ne ‵mate i te Mauga o Kilipoa.+ 2 Ne fakapili‵pili atu faeloa a tino Filisitia ki a Saulo mo ana tama tāgata, kae ne tamate ne tino Filisitia a Ionatana,+ Apinatapu mo Malekisua, ko tama tāgata a Saulo.+ 3 Ne gasolo aka eiloa o malosi te taua ki a Saulo, kae ne maua a ia ne tino sana matasana kae ne pakia malosi a ia i matasana a tino sana.+ 4 Tenā ne fai atu ei a Saulo ki tena tino ave meatau: “Tapale tau pelu o ‵suki au ki ei, ko te mea ke se o‵mai a tāgata seki pilitome+ konei o ‵suki au kae fai fakamasei au.” Kae ko tena tino ave meatau e se manako ke fai ne ia te mea tenā, me ne mataku malosi a ia. Tenā ne puke ei ne Saulo te pelu kae fakasiga ki luga i ei.+ 5 I te laveaga ne tena tino ave meatau i a Saulo ko mate,+ ne fakasiga foki a ia ki luga i tena pelu, ‵mate tasi ei lāua. 6 Tenā ne ‵mate tasi ei a Saulo mo ana tama tāgata e tokotolu, tena tino ave meatau mo ana tāgata katoa i te aso tenā.+ 7 I te taimi ne lavea ei ne tino Isalaelu kolā ne ‵nofo i tafa o te vanu mo kogā koga o te Iolitana me ko ‵tele kea‵tea a te kautau a Isalaelu kae ko Saulo mo ana tama tāgata ko ‵mate, ne kamata o tiaki ne latou a fakai kae ‵tele kea‵tea;+ tenā ne o‵mai ei a tino Filisitia o ‵nofo i ei.

8 I te suā aso, ne olo a tino Filisitia o puke a mea a tāgata kolā ne ‵mate i te taua, ne maua ne latou a Saulo mo ana tama tāgata e tokotolu e ‵mate i luga i te Mauga o Kilipoa.+ 9 Ne ‵kati kea‵tea ne latou tena ulu kae tapale tena gatu tau kae fakailoa atu ki te fenua kātoa o tino Filisitia ke fakasalalau te tala+ tenā ki fale* katoa o olotou tupua+ mo olotou tino. 10 Ne tuku ne latou tena gatu tau ki loto i te fale e tuku i ei te fakatusa o Asitate, kae ‵tuki tena foitino mate ki luga i te ‵pui o Peta-sana.+ 11 I te ‵logoga o tino e ‵nofo i Iapese-kileata+ i mea ne fai ne tino Filisitia ki a Saulo, 12 ne ‵tu aka a tāgata ‵toa katoa kae olo atu i te po tenā o tuku ifo a foitino ‵mate o Saulo mo ana tama tāgata mai te ‵pui o Peta-sana. Ne ‵foki latou ki Iapese kae ‵sunu a foitino ‵mate konā i ei. 13 Tenā ne puke ei ne latou olotou ivi+ kae tanu mai lalo o te lakau ko te tamalisi i Iapese,+ kae ne fakaliki‵liki latou i aso e fitu.