Ielemia

27 I te kamataga o te pulega a Ieoiakimo te tama tagata a Iosia, te tupu o Iuta, ne oko mai ei te fekau tenei ki a Ielemia mai i a Ieova: 2 “Konei a pati a Ieova ne fai mai ki a au, ‘Faite ne mea ‵sai mō koe mo ne amo, kae tuku ki luga i tou ua. 3 Tenā ko avatu ei a mea konā ki te tupu o Etoma,+ te tupu o Moapi,+ te tupu o tino Amoni,+ te tupu o Tulo,+ mo te tupu o Saitonu+ e auala i lima o avefekau kolā ne o‵mai ki Ielusalema ki te tupu o Iuta ko Setekaia. 4 Fai atu ki a latou a te fakatonuga tenei ke fai ki olotou matai:

“‘“Konei a pati a Ieova o kautau, te Atua o Isalaelu ne fai mai; konei a pati e ‵tau o fai ne koutou ki otou matai, 5 ‘Ko au ne faite ne au te lalolagi, tino mo manu kolā e ‵nofo i luga i te laukele e auala i toku ‵mana malosi kae e auala i toku lima mafi; kae ko oti ne tuku atu ne au ki so se tino e fiafia au ki ei.+ 6 Kae nei la, ko oti ne tuku atu ne au a fenua katoa konei ki te lima o taku tavini ko te tupu o Papelonia ko Nepukanesa;+ ke oko foki ki manu fe‵kai o te vao ko oti ne tuku ne au ki a ia ke tavini atu ki a ia. 7 A atufenua katoa ka tavini atu ki a ia mo tena tama tagata mo tena mokopuna tagata ke oko ki te taimi o tena fenua,+ māfai ko fai a ia ne atufenua e uke mo tupu takutakua mo fai te lotou pologa.’+

8 “‘“‘Kafai e ita se atufenua io me se malo ma tavini atu ki te tupu o Papelonia ko Nepukanesa kae ita ma tuku tena ua mai lalo i te amo a te tupu o Papelonia, ka fakasala ne au te atufenua tenā ki te pelu,+ te oge mo te famai,’ ko te folafolaga a Ieova, ‘ke oko ki te taimi e fakapalele ei ne au latou e auala i tena lima.’

9 “‘“‘Tela la, ke mo a ma faka‵logo ki otou pelofeta, otou tino fakataulaitu, otou tino fai moemiti, otou tino faivailakau, mo otou tino fai tapune, kolā e fai atu ki a koutou: “A koutou ka se tavini atu ki te tupu o Papelonia.” 10 Me e ‵valo atu ne latou a mea ‵loi ki a koutou, ko te mea ke ave koutou kea‵tea ki se koga ‵mao mai i te otou fenua kae ka fakasalalau ne au koutou kae ka ‵mate atu koutou.

11 “‘“‘Kae ko te atufenua telā e tuku tena ua mai lalo i te amo a te tupu o Papelonia kae tavini atu ki a ia, ka talia ne au ke nofo i luga i tena fenua,’ ko te folafolaga a Ieova, ‘ke galue i ei kae nofo i ei.’”’”

12 Ne fai atu foki ne au a pati penā ki te tupu o Iuta ko Setekaia,+ aku muna: “Tuku otou ua mai lalo i te amo a te tupu o Papelonia kae tavini atu ki a ia mo ana tino, kae ka tumau koutou i te ola.+ 13 Kaia e ‵tau ei o ‵mate ou tino i te pelu,+ te oge+ mo te famai,+ e pelā mo pati a Ieova ne fai e uiga ki te atufenua telā ka se tavini atu ki te tupu o Papelonia? 14 Ke mo a ma faka‵logo ki pati a pelofeta kolā e fai atu ki a koutou, ‘A koutou ka se tavini atu ki te tupu o Papelonia,’+ me e ‵valo atu ne latou a mea ‵loi ki a koutou.+

15 “‘Me ne seki uga atu ne au latou,’ ko te folafolaga a Ieova, ‘kae e ‵valo atu ne latou a mea ‵loi i toku igoa, fakatasi mo te ikuga me ka fakasalalau ne au koutou kae ka ‵mate atu koutou, ko koutou mo pelofeta kolā e ‵valo atu ki a koutou.’”+

16 Kae e fai atu au ki faitaulaga mo tino katoa konei, “Konei a pati a Ieova ne fai mai, ‘Ke mo a ma faka‵logo ki pati a otou pelofeta kolā e ‵valo atu ki a koutou: “Kiloke! A meāfale o te fale o Ieova ko pili o faka‵foki mai i Papelonia!”+ me e ‵valo atu ne latou a mea ‵loi ki a koutou.+ 17 Ke mo a ma faka‵logo ki a latou. Tavini atu ki te tupu o Papelonia kae ka tumau koutou i te ola.+ Kaia e ‵tau ei o fakamaseigina te fakai tenei? 18 Kae kafai e fai eiloa a latou e pelā me ne pelofeta kae maua atu foki i a latou a muna a Ieova, fakamolemole fai atu ke fakatagi latou ki a Ieova o kautau ko te mea ke se ave kea‵tea ki Papelonia a te ‵toega o meāfale i te fale o Ieova, i te fale o te tupu o Iuta mo Ielusalema.’

19 Me konei a pati a Ieova o kautau ne fai e uiga ki pou,+ te Tai,*+ ki kā+ mo te ‵toega o meāfale kolā ne ‵toe mai i te fakai tenei, 20 kolā ne seki puke ne te tupu o Papelonia ko Nepukanesa i te taimi ne ave fakapagota ei ne ia a Iekonia te tama tagata a Ieoiakimo, te tupu o Iuta, mai i Ielusalema ki Papelonia, fakatasi mo tino tāua katoa o Iuta mo Ielusalema;+ 21 ao, konei a pati a Ieova o kautau, te Atua o Isalaelu, ne fai e uiga ki meāfale kolā ne ‵toe i te fale o Ieova, te fale* o te tupu o Iuta mo Ielusalema: 22 ‘“Ka ave a mea konā ki Papelonia,+ kae ka tuku i konā ke oko ki te aso e saga atu ei au ki mea konā,” ko te folafolaga a Ieova. “Ka oti, ko toe aumai ei ne au a mea konā kae toe faka‵foki atu ki te koga tenei.”’”+