Te Muamua Samuelu
24 I te fokimaiga o Saulo i te afuliga o tino Filisitia, ne fakailoa atu ne latou ki a ia: “Kiloke! A Tavita telā i te koga lavaki o Eneketi.”+
2 Ne puke ne Saulo a tagata e toko 3,000 kolā ne filifili mai i tino Isalaelu kae olo atu o ‵sala a Tavita mo ana tāgata i kaupapa ma‵luga kolā e ‵nofo ei a kouti o mauga. 3 Ne oko atu a Saulo ki te lulu mamoe ne faite ki fatu i tafa o te auala telā e isi se ana i ei, kae ne fano tou tagata ki ana kona i loto i ei, kae ko Tavita mo ana tāgata e saga‵saga i te feitu ki loto o te ana.+ 4 Ne fai atu a tāgata a Tavita ki a ia: “Tenei eiloa te aso ne fai atu ei a Ieova ki a koe, ‘Kiloke! Ko tuku atu ne au tou fili ki ou lima,+ kae e mafai ne koe o fai ki a ia so se mea e mafaufau koe me e ‵lei ki a koe.’” Tenā ne tu aka ei a Tavita kae ‵kati lēmū ne ia te kapa o te gatu ‵loa o Saulo. 5 Kae fakamuli ifo, ne ma‵sei faeloa+ a lagonaga* o Tavita ona ko te ‵katiga ne ia te kapa o te gatu ‵loa o Saulo. 6 Ne fai atu a ia ki ana tāgata: “E ‵tusa mo te kilokiloga a Ieova e se taitai eiloa o fai ne au se vaegā mea penei ki toku aliki, te tino ne tofi ne Ieova, mai te fakaoko atu o oku lima ki a ia, me i a ia ko te tino ne tofi ne Ieova.”+ 7 Mai i ana pati konā ne taofi aka ei ne Tavita ana tāgata, kae ne seki talia ne ia ke taua atu latou ki a Saulo. Ne tu aka a Saulo mai te ana kae fano i tena auala.
8 Tenā ne tu aka ei a Tavita kae fanatu ki tua mo te ana kae kalaga atu ki a Saulo: “Toku aliki te tupu!”+ I te kiloatuga a Saulo ki ana tua, ne punou ifo a Tavita kae ifo atu ki a ia. 9 Ne fai atu a Tavita ki a Saulo: “Kaia e fakalogo ei koe ki pati a tāgata kolā e fai atu, ‘Kiloke! A Tavita e taumafai o fakapakia a koe’?+ 10 Ko lavea eiloa ne koe ki ou mata i te aso nei a te auala ne tuku mai ei koe ne Ieova ki oku lima i loto i te ana. Kae i te faimaiga se tino ke tamate koe,+ au ne alofa ki a koe kae tali atu, ‘Ka se fakaoko eiloa oku lima ki toku aliki, me i a ia ko te tino ne tofi aka ne Ieova.’+ 11 Kae kiloke, e toku tamana, kilo mai ki te kapa o tou gatu ‵loa i toku lima; i te taimi ne ‵kati ei ne au te kapa o tou gatu ‵loa, ne seki tamate ne au koe. Ko lavea nei ne koe kae malamalama foki koe me i a au e se manako o fakapakia io me ‵teke atu ki a koe, kae ko au e seki agasala atu ki a koe,+ kae ko koe e taumafai eiloa o tamate au.+ 12 Ke fakamasino eiloa ne Ieova a tāua,+ kae ke fakasala koe ne Ieova ona ko au,+ kae ka se oko atu eiloa oku lima ki a koe.+ 13 E pelā eiloa mo te tugapati i aso mua penei, ‘A te masei e māfua mai i te tino amio masei,’ kae e se mafai eiloa o oko atu oku lima ki a koe. 14 Ko oi e afuli ne te tupu o Isalaelu? Ko oi e afuli ne koe? Se kuli mate? Se lago fua e tasi?+ 15 Ke fai eiloa a Ieova mo famasino, kae ka fakamasino ne ia tāua, kae ka lavea ne ia kae ka ‵lago atu a ia ki taku tagi+ kae fakamasino ne ia au kae fakasao au mai i ou lima.”
16 I te otiga eiloa ne fai atu ne Tavita a pati konei ki a ia, ne fai atu a Saulo: “I o koe te leo tenei e taku tama ko Tavita?”+ Kae ne kamata o tagi a Saulo i se leo maluga. 17 Ana muna ki a Tavita: “E sili atu tou amiotonu i lō au, me ko oti ne fai faka‵lei ne koe au kae taui atu ne au koe ki te masei.+ 18 Ao, ne fakamatala mai ne koe ki a au i te aso nei a te mea ‵lei ne fai ne koe, me ne seki tamate ne koe au i te taimi ne tuku atu ei au ne Ieova ki ou lima.+ 19 Ko oi te tagata e maua ne ia tena fili kae tuku atu ke fano mo te filemu? Ka taui atu eiloa ne Ieova a koe ki te ‵lei+ ona ko te mea ne fai ne koe ki a au i te aso nei. 20 Nei la, kiloke! E iloa ‵lei ne au me i a koe ka pule e pelā me se tupu+ kae ka tumau a te malo o Isalaelu i ou lima. 21 Tauto mai nei ki a au i te igoa o Ieova+ me ka se ‵fulu faka‵ma ne koe a tino o toku gafa* mai oku tua kae ka se fakaseai foki ne koe a toku igoa mai te kāiga o toku tamana.”+ 22 Tenā ne tauto atu ei a Tavita ki a Saulo, oti aka fano ei a Saulo ki tena fale.+ Kae ko Tavita mo ana tāgata ne olo ki te lotou koga ‵muni.+