Ielemia

40 Ko te fekau ne oko mai ki a Ielemia mai i a Ieova i te otiga ne fakasaoloto a ia ne Nepusalatana+ te pule o leoleo mai i Lama.+ Ne puke ne ia a tou tagata ki konā mo ana lima e pikifao, kae ne aofia a ia i tino Ielusalema mo tino Iuta katoa kolā ne ave fakapagota ki Papelonia. 2 Tenā ne puke ei ne te pule o leoleo a Ielemia kae fai atu ki ei: “A Ieova tou Atua ne folafola mai ne ia te fakalavelave telā ka tupu ki te koga tenei, 3 kae ne fakataunu eiloa ne Ieova a te mea tenā e ‵tusa eiloa mo ana pati, me i a koutou ne agasala ki a Ieova kae seki faka‵logo ki tena leo. Tenā te pogai ne tupu ei te mea tenei ki a koutou.+ 4 Nei la, ko fakasaoloto ne au koe i te aso nei mai mea pikifao konā i ou lima. Kafai e ‵lei ki a koe ke olo tāua ki Papelonia, vau la, kae ka tausi ne au koe. Kae kafai e se fia vau koe i a au ki Papelonia, sa vau. Kiloke! A te fenua kātoa tenā i ou mua. Fano ki so se koga e filifili ne koe.”+

5 Kae koi tuai o ‵fuli atu te tua o Ielemia, kae ko fai atu a Nepusalatana: “Foki ki a Ketalia+ te tama tagata a Aikamo+ te tama tagata a Safana,+ telā ne ‵tofi aka ne te tupu o Papelonia ke pule atu ki fakai o Iuta, kae ‵nofo mo ia fakatasi mo nisi tino; io me fano ki so se koga e filifili ne koe.”

Tenā ne tuku atu ei ne te pule o leoleo ne meakai mo se meaalofa kae tuku atu a ia ke fano. 6 Ne fano a Ielemia ki a Ketalia te tama tagata a Aikamo i Mesepa+ kae ‵nofo mo ia fakatasi mo nisi tino kolā ne ‵toe i te fenua.

7 Fakamuli ifo, ne ‵logo a takitaki kautau katoa kolā ne ‵nofo i te vao fakatasi mo olotou tāgata me ne ‵tofi ne te tupu o Papelonia a Ketalia te tama tagata a Aikamo ke pule i te fenua kae ne ‵tofi foki ne ia tou tagate ke pule atu ki tāgata, fāfine, mo tama‵liki mai i tino ma‵tiva o te fenua kolā ne seki ave ki Papelonia.+ 8 Tenā ne o‵mai ei latou ki a Ketalia i Mesepa.+ A latou konā ko Isamaeli+ te tama tagata a Netania, Ioananu+ mo Ionatana ko tama tāgata a Kalia, Selaia te tama tagata a Tanumeta, ko tama tāgata a Efai te tino Netopa, mo Iesanaia+ te tama tagata a te tino Maakata, fakatasi mo olotou tāgata. 9 A Ketalia te tama tagata a Aikamo te tama tagata a Safana ne tauto atu ki a latou mo olotou tāgata, ana muna: “Sa ma‵taku o tavini atu ki tino Kaletaia. ‵Nofo i te fenua kae tavini atu ki te tupu o Papelonia, kae ka manuia koutou.+ 10 E pelā mo au, ka nofo au i Mesepa o sui koutou ki tino Kaletaia kolā e o‵mai ki a matou. Kae e ‵tau mo koutou o fakamaopoopo fakatasi a uaina, fuagalakau o te ‵tau vela, mo sinu kae tuku i mea e tausi i ei kae ‵nofo i fakai kolā ne puke ne koutou.”+

11 Kae ko tino Iutaia katoa i Moapi, Amoni mo Etoma e pelā foki mo latou katoa kolā e ‵nofo i nisi fenua, ne ‵logo foki me ne talia ne te tupu o Papelonia ke ‵nofo se ‵toega o tino i Iuta kae ne ‵tofi aka ne ia a Ketalia te tama tagata a Aikamo te tama tagata a Safana ke pule i a latou. 12 Tenā ne kamata ei a tino Iutaia mai koga katoa kolā ne fakasalalau latou ki ei o ‵foki, kae ne o‵mai latou ki te fenua ko Iuta, ki a Ketalia i Mesepa. Kae e uke ‵ki a uaina mo fuagalakau o te ‵tau vela ne fakamaopoopo ne latou.

13 A Ioananu te tama tagata a Kalia mo takitaki kautau katoa i te vao ne o‵mai ki a Ketalia i Mesepa. 14 Ne fai atu latou ki a ia: “E a, e se iloa ne koe i a Paalisa te tupu o tino Amoni+ ko oti ne uga mai ne ia a Isamaeli te tama tagata a Netania ke tamate koe?”+ Kae ko Ketalia te tama tagata a Aikamo ne seki talitonu ki a latou.

15 Kae ko Ioananu te tama tagata a Kalia ne fai atu i se auala ‵muni ki a Ketalia i Mesepa: “Au e manako o fano o tamate a Isamaeli te tama tagata a Netania, kae ka seai se tino e iloa ne ia. Kaia e ‵tau ei o tamate ne ia koe, kae kaia e ‵tau ei o salalau valevale a tino Iuta kolā ne maopoopo mai ki a koe kae ‵mate atu a te ‵toega o tino Iuta?” 16 Kae ko Ketalia+ te tama tagata a Aikamo ne fai ki a Ioananu te tama tagata a Kalia: “Sa fai te mea tenei, me i te tala ne fai mai ne koe e uiga ki a Isamaeli se loi fua.”