Isaia
38 I aso konā a Hesekia ne masaki kae toeitiiti eiloa ko mate.+ Ne vau a te pelofeta ko Isaia+ te tama tagata a Amota kae fai atu ki a ia, “Konei a pati a Ieova ne fai mai: ‘Tuku atu a fakatonuga ki tou kaufale, me i a koe ka mate; a koe ka se toe ‵lei.’”+ 2 I konā loa, ne ‵fuli atu a mata o Hesekia ki te ‵pui kae kamata o ‵talo ki a Ieova: 3 “Ko akai atu au ki a koe e Ieova, fakamolemole, ke masaua+ ne koe te auala ne sasale ei au i ou mua mo te fakamaoni mo te loto kātoa,+ kae ne fai ne au a mea ‵lei i tau kilokiloga.” Kae ne kamata a Hesekia o tagi malosi.
4 Tenā ne oko mai ei te fekau a Ieova ki a Isaia, ana muna: 5 “Toe foki o fai ki a Hesekia,+ ‘Konei a pati a Ieova te Atua o Tavita tou tupuga ne fai mai: “Ko oti ne lagona ne au tau ‵talo.+ Ko oti foki ne lavea ne au ou loimata.+ Ko fakaopoopo atu nei ne au e 15 tausaga ki tou olaga,+ 6 kae ka fakasao ne au koe mo te fakai tenei mai lima o te tupu o Asulia, kae ka ‵pulu ne au te fakai tenei.+ 7 Tenei te fakailoga mai i a Ieova e fakaasi atu i ei ki a koe me ka fakataunu ne Ieova ana pati ne fai:+ 8 Nei la, ka fai ne au a te ata o te la i luga i te kakega* o Aasa ke gasue ki tua i sitepu e sefulu.”’”+ Tenā ne gasue ei ki tua a te la i sitepu e sefulu i luga i te kakega telā ne fanaifo i ei.
9 Ko tusitusiga a te tupu o Iuta ko Hesekia i te taimi ne masaki ei kae toe ‵lei mai i tena masaki.
10 Aku muna: “I te kogaloto o toku olaga
E ‵tau mo au o fano ki loto i mataloa o ‵pui o te Tanuga.*
Ka ave kea‵tea mai i a au a te ‵toega o oku tausaga.”
11 Aku muna: “Ka se lavea ne au a Ioa,* Ioa i te laukele o tino ola.+
Ka se toe kilo atu au ki tino
Māfai ko ‵nofo au mo tino o te koga telā e se gasue‵sue a mea katoa i ei.
12 Ko oti ne tapale oku koga ‵nofo kae ave kea‵tea mai i a au+
E pelā mo te faleie o se tausi mamoe.
Ko oti ne pelu aka ne au toku ola e pelā me se tino galue i te ‵laga laugatu;
E ‵kati ne ia au kea‵tea e pelā me se laugatu ko oti ne ‵laga i te mea ‵laga laugatu.
Mai te ao ke oko ki te po e aumai faeloa ne koe ki a au a mea faiga‵ta.+
13 E nofo filemu au ke oko ki te tafataeao.
E pelā me se leona, e fatifati faeloa ne ia oku ivi;
Mai te ao ke oko ki te po e aumai faeloa ne koe ki a au a mea faiga‵ta.+
14 E pelā mo te tamā manu eva ko te suifi io me ko te tuluse, e tagitagi faeloa au;+
E tagi faeloa au e pelā mo te lupe.+
E kilo aka oku mata ki te koga maluga mo te fi‵ta:+
‘Ieova, au ko oko eiloa i te puapuaga;
‵Lago mai aka ki a au!’+
15 Ne a aku pati e mafai o fai?
Ko oti ne faipati mai a ia ki a au kae fai ne ia.
Ka sasale au mo te loto maulalo i oku tausaga katoa
Ona ko te lasi o toku loto mafatia.
16 ‘Ieova, e auala i mea konei* e ola ei tāgata katoa,
Kae e maua foki i ei te malosi o toku ola.
Ka toe fakafoki mai ne koe toku malosi kae tausi au ke ola.+
17 Kiloke! I lō te filemu, e mafatia malosi au;
Kae ona ko tou alofa mai ki a au,
Ne fakasao ne koe au mai te lua o te fakaseaiga.+
Ko oti ne ‵pei ne koe aku agasala katoa ki ou tua.*+
A latou kolā e olo ifo ki lalo i te lua e se mafai o fakamoe‵moe ki tou fakamaoni.+
19 A tino ola, a tino ola e mafai o tavae ne latou a koe,
E pelā eiloa mo te mea e mafai o fai ne au i te aso nei.
E mafai o tuku atu ne se tamana ki ana tama a te iloaga e uiga ki tou fakamaoni.+
20 Ieova, fakasao mai au,
Kae ka fakatagi‵tagi ne matou aku pese ki kitala+
I aso katoa o omotou olaga i te fale o Ieova.’”+
21 Tenā ne fai atu ei a Isaia: “Aumai se keke o mati ma‵lō kae tuku atu ki luga i te fakafoa, ko te mea ke mafai o ‵lei a ia.”+ 22 Ne fesili atu a Hesekia: “Se a te fakailoga e iloa ei me ka fano au ki te fale o Ieova?”+