Te Pese a Solomona
5 “Ko oti au ne ulu ki loto i taku fatoaga,+
E toku tuagane, te fafine telā ka fakaipoipo au ki ei.
Ko oti ne tau ne au aku mulo mo aku mea fakama‵nogi.+
Ko oti au ne kai ki taku hani mai ofaga o lagofufu mo taku hani;
Ko oti au ne inu ki taku uaina mo taku susu.”+
“‵Kai, e oku taugasoa pele!
Inu kae ke fia‵fia ki fakaasiga o te alofa!”+
2 “Au ko moe, kae ko toku loto koi ala.+
E lagona ne au te tukituki a taku akoi i te mataloa!”
“‵Tala mai ki a au, e toku tuagane, e taku pele,
Taku lupe, telā e seai sena pona!
Me i toku ulu ko ‵siu i te ‵sau,
Mo toku laulu i te ‵sau o te po.”+
3 “‘Ko oti ne tapale ne au toku gatu ‵loa.
E a, e ‵tau mo au o toe pei ki ei?
Ko oti ne ‵fulu ne au oku vae.
E a, e ‵tau mo au o toe fakalai‵lai oku vae?’
4 Ne ‵futi ne taku akoi a tena lima kea‵tea mo te pūga o te mataloa,
Kae ne ma‵losi eiloa oku lagonaga mō tou tagata.
5 Ne tu aka au o ‵tala te mataloa ki taku akoi;
Oku lima ne moti‵moti mai i ei a mulo,
Kae ko oku matikao lima ko sua o mulo,
Ki luga i kau o te ‵loka.
6 Ne ‵tala ne au ki taku akoi,
Kae ko taku akoi ko fulitua mai kae ko galo atu.
Ne fanoanoa au i te taimi ne fano ei a ia.
Ne ‵sala atu au ki tou tagata, kae ne seki maua eiloa ne au a ia.+
Ne kalaga atu au ki a ia, kae ne seki tali mai a ia ki a au.
7 Ne maua au ne tāgata leoleo kolā e tausi ne latou te fakai.
Ne ta ne latou au, ne fakapakia ne latou au.
Ne puke kea‵tea ne tāgata leoleo o ‵pui a te laugatu e pulou ei toku ulu.*
8 Ko fakatauto ne au koutou, e tama fāfine o Ielusalema:
Kafai e maua ne koutou taku akoi,
Fai ki tou tagata i a au ko masaki i te alofa.”
9 “I te auala fea e sili atu ei te ‵lei o tau akoi i lō nisi akoi aka,
A koe e te ‵toe fafine tinogali?
I te auala fea e sili atu ei te ‵lei o tau akoi i lō nisi akoi aka,
Ko fakatauto ei ne koe matou penei?”
10 “A taku akoi e taulekaleka kae gali tena pa‵kili,
E tu ‵kese eiloa tou tagata mai te fia sefuluafe.
11 A tena ulu e gali e pelā me se aulo, te ‵toe aulo ‵lei.
Ana laulu e fati‵fati e pelā mo kaufui pama,
Kae uli e pelā mo te leveni.
12 Ana mata e pelā mo lupe i tafa o tamā vaitafe,
E kou‵kou i loto i susu,
Kae e saga‵saga i tafa o se vai telā ko ‵fonu maligiligi.
13 Ana kalafou e pelā me se moega o mea fakama‵nogi,+
Se fakaputuga o lau manogi ‵gali.
Ana laugutu ne lili e moti‵moti mai i ei a sua o mulo.+
14 Ana matikao lima ne aulo e teu ki kuate lanu ‵sega.
A tena tinae e maniania e pelā mo nifo o elefane kae ufi ki safaila.
15 Ana vae ne pou mapu e ‵tu i luga i lagolago ne fai ki te ‵toe aulo ‵lei.
Ana foliga e pelā mo Lepanona, e se fakanafagina e pelā mo alasi.+
16 A tena gutu e magalo i a ia eiloa,
Kae ko mea katoa e uiga ki tou tagata e ‵gali.+
Tenei taku akoi, tenei taku pele, e tama fāfine o Ielusalema.”