Te Tusi a Mataio

14 I te taimi tenā ne logo a Helota, te pule o te kogā fenua tenā i te tala e uiga ki a Iesu.+ 2 Ana muna ki ana tavini: “A te tino tenei ko Ioane te Papatiso. Ko oti ne fakatu aka a ia mai te mate, kae tenei eiloa te pogai e fai ei ne ia a galuega ‵mana konei.”+ 3 Ko oti ne puke fakapagota ne Helota* a Ioane, saisai, kae ‵pei atu ki te falepuipui ona ko Helotia, te avaga a tena taina ko Filipo.+ 4 Me ne fai sāle atu a Ioane ki a Helota: “E se talia i te tulafono ke fai tou fafine mo fai tau avaga.”+ 5 Kae e tiga eiloa ne manako a Helota ke tamate a Ioane, ne mataku a ia i te vaitino me ne tali‵tonu latou i a Ioane se pelofeta.+ 6 Kae i te fakamanatuga o te aso fanau o Helota,+ ne saka ei i konā a te tama fafine a Helotia kae ne fiafia malosi i ei a Helota.+ 7 Tenā ne tauto atu ei a ia ke tuku atu ki tou fafine so se mea telā e manako a ia ki ei. 8 Kae ona ko te fakamalosiga a tena mātua, fai atu ei a tou fafine: “Aumai nei eiloa ki a au a te ulu o Ioane te Papatiso i luga i se telē.”+ 9 E tiga eiloa ne fanoanoa a Helota i ei, ne fakatonu atu a ia ke fai te mea tenā ona ko tena tautoga ko oti ne fai i mua o tino ‵kami. 10 Tenā ne uga atu ei ne ia se tino ke ‵kati te ua o Ioane i te falepuipui. 11 Ne aumai tena ulu i luga i se telē, tuku atu ki te tamafine, kae aumai ne tou fafine ki tena mātua. 12 Oti aka, o‵mai ei ana soko, puke tena foitino, kae ave o tanu; olo atu ei latou o fakailoa ki a Iesu. 13 I te lagonaga ne Iesu a te mea tenei, fano ei a ia i te pōti ke ‵mao atu kea‵tea mai i a latou. Kae i te ‵logoga o te vaitino, ne sa‵sale atu latou mai i fakai konā o tau‵tali atu i a ia.+

14 I tena fanakaga ki uta, lavea ei ne Iesu se vaitino, kae ne alofa malosi a ia ki a latou,+ faka‵lei ei ne ia olotou tino ma‵saki.+ 15 I te okoga ki te afiafi, olo atu ei ana soko ki a ia kae fai atu: “A te koga tenei e ‵mao ‵ki kae ko pili o po; uga atu te vaitino ko te mea ke olo ki fakai o ‵togi ne olotou meakai i ei.”+ 16 Kae ne fai atu a Iesu ki a latou: “E se ‵tau o olo latou; tuku atu ne koutou ne meakai ke ‵kai ei latou.” 17 Ne fai atu latou ki a ia: “E seai ne omotou meakai i konei kae na ko falaoa fua e lima mo ika e lua.” 18 Ana muna: “Aumai a mea konā ki a au.” 19 Kae ne fakatonu atu a ia ki te vaitino ke saga‵saga ki lalo i mouku. Tenā ne puke ei ne ia a falaoa e lima mo ika e lua, kae kilo aka ki te lagi, fai te fakafetai,+ kae i te otiga ne tofitofi ne ia a falaoa, tuku atu ei ne ia ki ana soko, kae ne tuku atu ne ana soko ki te vaitino. 20 Tenā ne ‵kai ei a latou katoa kae ma‵kona, kae ko meakai kolā ne ‵toe ne faka‵fonu ki ei a tapola e 12.+ 21 A tino kolā ne ‵kai e nofo ki se toko 5,000 tāgata, i tafa o fāfine mo tama‵liki fo‵liki.+ 22 Tenā ne fai atu ei a ia ki ana soko ke ‵sopo ki te pōti kae ke ‵mua atu i a ia ki te suā feitu, ko te mea ke uga atu mua ne ia te vaitino ke olo.+

23 I te otiga ne uga atu ne ia te vaitino ke olo, ne fanaka a ia ki luga i te mauga o ‵talo i ei.+ I te okoga ki te afiafi po, ne nofo tokotasi eiloa a ia i konā. 24 I te taimi tenei, a te pōti ko ‵mao ‵ki* mai te fenua kae ko logo‵fio eiloa ne tuki ne peau me i te matagi e ‵pono tonu mai eiloa i olotou mua. 25 I te fa o ‵tuga o te po,* ne sasale atu a ia ki a latou i luga i te vai. 26 I te laveaga ne ana soko i a ia e sasale i luga i te vai, ne ma‵taku latou, kae fai aka: “A te mea tenei se aitu!” Kae ne paka‵laga latou i te lotou ma‵taku. 27 Ne faipati fakavave atu a Iesu ki a latou, ana muna: “Ke loto ‵toa koutou! Ko au fua tenei; sa ma‵taku.”+ 28 Ne tali atu a Petelu ki a ia: “Te Aliki, kafai ko koe eiloa tenā, fakatonu mai ke fanatu au ki a koe i luga i te vai.” 29 Ana muna: “Vau la!” Tenā sopo ifo ei a Petelu mai te pōti kae sasale atu ki a Iesu i luga i te vai. 30 Kae i tena kiloatuga ki te kaumatagi, mataku ei a ia. Kae i tena kamataga o pulu, kalaga atu ei tou tagata: “Te Aliki, fakasao aka au!” 31 Ne ‵kapa fakavave atu te lima o Iesu, puke ki a ia kae fai atu: “Ko oko eiloa te foliki o tou fakatuanaki, kaia ne fakalotolotolua ei koe?”+ 32 I te lā otiga ne ‵sopo aka ki te pōti, malū ei te kaumatagi. 33 Tenā ne ifo atu ei a latou kolā i te pōti ki a ia, olotou muna: “Ko koe eiloa ko te Tama a te Atua.” 34 Kae ne olo atu latou ki te suā feitu kae oko atu ki te fenua ko Kenesaleta.+

35 I te laveaga ne tino i konā a ia, fakailoa atu ei ne latou ki fenua katoa i olotou tafa, kae ne aumai ne tino i konā a tino ma‵saki katoa ki a ia. 36 Kae ne fakamolemole atu latou ki a ia ke fakapa‵tele fua latou ki te fele o tena gatu,+ kae ko tino katoa kolā ne fakapa‵tele ki ei ne ‵lei katoa.