Te Tusi Muamua ki te Kau Kolinito

16 E mafai ne koutou o tau‵tali ki fakatonuga ne tuku atu ne au ki fakapotopotoga i Kalatia e uiga ki te ‵lukuga o tupe mō tino tapu.+ 2 I te aso muamua o vaiaso takitasi, e ‵tau o tuku fakaa‵tea ne tino taki tokotasi i a koutou se mea e ‵tusa mo te mea e mafai ne ia, ko te mea ke seai se ‵lukuga o tupe e fai māfai e oko atu au. 3 Kafai e oko atu au ki konā, ka uga ne au a tāgata kolā ko oti ne talia ne koutou i te otou tusi+ ke ave ne latou otou meaalofa kolā ne fai mo te kaimalie, ki Ielusalema. 4 Kafai e ‵tau foki au o fano ki konā, ko olo fakatasi ei matou.

5 Kae ka fanatu au ki a koutou māfai ko oko atu au ki Maketonia, me ka ui atu au i Maketonia;+ 6 kae kāti ka nofo au io me e fanatu au ke ‵nofo tatou ke oti te tau ‵moko, ko te mea ke olo fakatasi tatou mō se taimi toetoe ko faka‵soko ei taku malaga. 7 Me e se manako au ke fetaui fua tatou i toku auala o fano, me e fakamoemoe au ke ‵nofo tatou i se taimi tai leva,+ māfai ko te loto o Ieova.* 8 Kae ka nofo au i konei i Efeso+ ke oko ki te ‵Kaiga Fiafia o te Penitekoso, 9 me ko oti ne ‵tala mai ki a au te mataloa o galuega e uke,+ kae e tokouke foki a tino e ‵teke mai.

10 E tiga te feitu tenā, kafai e oko atu a Timoteo,+ fai ke mo a ma mataku a ia i tena nofo i a koutou, me e fai foki ne ia te galuega a Ieova,*+ e pelā eiloa mo au. 11 Tela la, ke mo a ma manatu fatauva se tino ki a ia. Uga mai a ia mo te filemu, ko te mea ke vau a ia ki a au, me i a au e faka‵tali atu ki a ia fakatasi mo te kautaina.

12 E pelā mo Apolo+ te ‵tou taina, ne fakamalosi atu au ki a ia ke fanatu ki a koutou fakatasi mo te kautaina. Ne seki manako a ia o fanatu i te taimi nei, kae ka fanatu eiloa a ia māfai e maua sena avanoaga.

13 Ke ala faeloa koutou,+ ke tu ‵mautakitaki i te fakatuanaki,+ ke fai e pelā me ne tāgata,*+ ke loto ma‵losi koutou.+ 14 Ke fai otou mea katoa i te alofa.+

15 Nei la, ko fakamalosi atu au ki a koutou, e oku taina: E iloa ne koutou i te kāiga o Setefana ko fuataga muamua o Akaia me ne fakatoka latou o tavini atu ki tino tapu. 16 Ke tumau foki koutou i te faka‵logo ki tino penā mo tino katoa kolā e fesoasoani kae ga‵lue malosi.+ 17 Kae e fiafia eiloa au i te motou ‵nofo fakatasi mo Setefana,+ Fotunato mo Akaiko, me ko sui ne latou a koutou kolā e se ‵nofo i konei. 18 Me ko oti ne faka‵fou ne latou toku malosi e pelā foki mo koutou. Tela la, ke amanaia eiloa koutou ki vaegā tino penā.

19 Ko ‵moli atu a alofaaga o fakapotopotoga i Asia ki a koutou. Ko a‵lofa atu foki a Akuila mo Piseka* fakatasi mo te fakapotopotoga telā e maopoopo sāle i te lā fale+ ki a koutou kolā ko soko o te Aliki. 20 Ko a‵lofa atu a taina katoa ki a koutou. Ke fakatalofa atu te suā tino ki te suā tino i te sogi tapu.

21 Ko au ko Paulo, ko tusi atu ne au oku alofaaga.

22 Kafai e isi se tino e se alofa ki te Aliki, ke malaia eiloa te tino tenā. Te motou Aliki, na vau! 23 Ke i luga i a koutou te alofa tauanoa o te Aliki ko Iesu. 24 Ke i luga foki i a koutou toku alofa i te ‵kau fakatasi mo Keliso Iesu.