Te Tusi a Maleko
11 I te lotou piliatuga ki Ielusalema, ki Petefake mo Petania+ i te mauga o Olive, ne uga atu ne Iesu ana soko e tokolua+ 2 kae fai atu ki a lāua: “Olo ki te fakai tenā e lavea ne koulua, kae kafai e oko atu koulua ki ei, ka maua atu ne koulua se tamā asini e ‵sai, telā e seki sopo aka eiloa se tagata i ei ke oko mai ki te taimi nei. ‵Tala, ko aumai ei ki konei. 3 Kae kafai e fai atu se tino ki a koulua, ‘Kaia e fai ei ne koulua te mea tenā?’ fai atu ki ei, ‘E manako ki ei te Aliki, kae ka fakafoki fakavave mai ne ia ki konei.’” 4 Ne olo atu lāua kae maua atu ne lāua a te tamā asini e ‵sai i te mataloa, i tua o te fale i tafa o te auala, ‵tala ei ne lāua.+ 5 Kae ne fai atu a nisi tino kolā ne takatu‵tu i konā ki a lāua: “Kaia e ‵tala ei ne koulua te tamā asini tenā?” 6 Ne fai atu ne lāua ki tino konā a pati ne fai atu ne Iesu; tuku atu ei ne latou a lāua ke olo.
7 Kae ne aumai ne lāua te tamā asini+ ki a Iesu, kae ‵fola ne latou olotou gatu i luga i te asini, sagasaga ei tou tagata i luga i ei.+ 8 Ne ‵fola foki ne tino e tokouke olotou gatu i te auala, kae ko nisi tino ne ‵kati ne latou ki lalo a kaula o lakau i tafa o te auala.+ 9 Kae ne paka‵laga atu faeloa a latou kolā e olo atu i mua mo latou kolā e olo atu mai tua penei: “Matou e ‵talo ke fakaola a ia!+ Ke manuia a te tino telā e vau i te igoa o Ieova!*+ 10 Ke manuia te Malo o te ‵tou tamana ko Tavita telā ka oko mai!+ Matou e ‵talo ki a ia telā e nofo i te koga maluga ke fakaola ne ia te tino tenei!” 11 Kae ne oko atu a ia ki Ielusalema kae ulu atu ki loto i te faletapu, ne kilokilo atu a ia ki mea katoa, kae ona ko te mea ko leva te taimi, ne olo ei latou mo te toko Sefululua ki Petania.+
12 I te tiakinaga ne latou a Petania i te suā aso, ne fiakai a ia.+ 13 Kae koi tai ‵mao kae lavea ne ia te lakau ko te mati telā e isi ne ana lau. Ne fanatu tou tagata o onoono me isi ne ana fuaga e maua i luga i ei me ikai. I tena okoatuga ki ei, lavea ei ne ia me e seai ne fuaga i ei kae na ko lau fua, me e se ko te tau o mati i te taimi tenā. 14 Fai atu ei tou tagata ki ei: “Ke se toe ai se tino e kai ne ia se fuaga mai i a koe ke oko eiloa ki te se-gata-mai.”+ Kae ko ana soko ne fakalogo‵logo atu ki a ia.
15 I te taimi nei, ko oko atu latou ki Ielusalema. Ne ulu atu a ia ki loto i te faletapu kae afuli ne ia ki tua a tino katoa kolā e fakatau kae ‵togi olotou mea i ei, kae ‵fuli ne ia ki lalo a taipola a tino ‵fuli tupe mo nofoga o tino fakatau lupe,+ 16 kae ne seki talia ne ia ke amo ne se tino se mea i loto i te faletapu. 17 Ne akoako kae fai atu a ia ki a latou: “E a, e se tusi i te tusi: ‘A toku fale ka taku ko te fale ‵talo mō fenua katoa’?+ Kae ko fai ne koutou mo fai se ana o tino kai‵soa.”+ 18 Ne lagona ne faitaulaga pule mo failautusi a te mea tenā, kamata ei latou o salasala ki se auala ke tamate a ia,+ me ne ma‵taku latou i a ia ona ko te mea ko oko eiloa i te ofo o te vaitino i ana akoakoga.+
19 I te okoga ki te afiafi, olo ei latou ki tua mo te fakai. 20 Kae i te lotou oloatuga i te taeao ‵malu, lavea ei ne latou te mati ko magemage ke oko ki ana aka.+ 21 Ne masaua ne Petelu te mea tenā, fai atu ei ki a ia: “Te Faiakoga, kilo atu! a te mati telā ne fetū ne koe ko magemage.”+ 22 Ne tali atu a Iesu ki a latou: “Fakatuanaki ki te Atua. 23 Au e fai ‵tonu atu ki a koutou me i so se tino e fai atu ki te mauga tenei, ‘Masagi ki luga kae tō ki te tai,’ kae e se fakalotolotolua i tena loto kae e fakatuanaki i ana pati kolā ne fai ka taunu eiloa, ka tupu eiloa te mea tenā.+ 24 Tenei te pogai e fai atu ei au ki a koutou, a mea katoa kolā e ‵talo kae fakatagi atu koutou ki ei mo te fakatuanaki, ka maua eiloa ne koutou.+ 25 Kae kafai e ‵tu koutou o ‵talo, fakamagalo atu so se tino telā e ita koe ki ei, ko te mea ke fakamagalo foki ne te otou Tamana telā i te lagi au mea ‵se.”+ 26* ——
27 Ne toe ‵foki atu latou ki Ielusalema. Kae koi sasale atu a ia i loto i te faletapu kae olo atu a faitaulaga pule mo failautusi mo toeaina ki a ia 28 kae fai atu ki a ia: “I o oi te malosi e fai ei ne koe a mea konei? Io me ko oi ne tuku atu ne ia te malosi tenei ke fai ei ne koe a mea konei?”+ 29 Ne fai atu a Iesu ki a latou: “Ka ‵sili atu ne au ki a koutou se fesili e tasi. Tali mai ki a au, kae ka fai atu ne au ki a koutou me i o oi te malosi e fai ei ne au a mea konei. 30 E mata, a te papatisoga a Ioane+ ne māfua mai i te lagi io me mai i tāgata?”* Tali mai ki a au.+ 31 Ne fakatau tītī olotou manatu i a latou eiloa, kae fai aka penei: “Kafai e fai atu tatou, ‘Mai te lagi,’ ka fai mai a ia, ‘Kaia la ne seki tali‵tonu ei koutou ki a ia?’ 32 Kae e se ‵tau eiloa o fai atu tatou, ‘Mai tāgata’?” Ne ma‵taku latou i te vaitino, me e tali‵tonu latou i a Ioane se pelofeta.+ 33 Tela la, ne tali atu latou ki a Iesu: “E se iloa ne matou.” Ne fai atu a Iesu ki a latou: “E se fakaasi atu foki ne au ki a koutou me i o oi te malosi e fai ei ne au a mea konei.”