Te Lua Nofoaiga Tupu

7 I te taimi eiloa ne palele ei te ‵talo+ a Solomona, ko te afi eiloa ko vau mai te lagi+ o ‵sunu te taulaga ‵sunu mo taulaga, kae ne ‵fonu a te fale i te ‵malu o Ieova.+ 2 Ne seki mafai ne faitaulaga o ulu ki loto i te fale o Ieova me ko ‵fonu a te fale o Ieova i te ‵malu o Ieova.+ 3 Kae ko tino Isalaelu katoa ne ‵kilo atu ki te fanaifoga o te afi kae ko te ‵malu o Ieova ko nofo i luga i te fale, kae ne ifo atu latou mo olotou mata e ‵fuli ki te laukele i luga i te fola kae punou ifo latou ki lalo kae fakafetai atu ki a Ieova “me i a ia e ‵lei; a tena alofa fakamaoni e tumau ki te se-gata-mai.”

4 Ne ofo atu ne te tupu mo tino katoa a taulaga i mua o Ieova.+ 5 Ne ofo atu ne te Tupu ko Solomona a te taulaga o pulumakau e 22,000 mo mamoe e 120,000. Tenā ne fakaulufale ei ne te tupu mo tino katoa a te fale o te Atua tonu.+ 6 Ne ‵tu a faitaulaga i koga e fai ei olotou tiute, e pelā mo tino Levi kolā e ‵nofo mo mea fakatagi‵tagi ke fakaaoga ke usu atu ei a pese ki a Ieova.+ (Ne faite ne te Tupu ko Tavita a mea fakatagi‵tagi konei ke avatu i ei te fakafetai ki a Ieova—“me i tena alofa fakamaoni e tumau ki te se-gata-mai”—i te taimi e ofo atu ei ne Tavita a vikiga fakatasi mo latou.*) Kae ko faitaulaga e ili malosi ne latou a pu+ i mua o latou, kae ko tino Isalaelu katoa e ‵tu i luga.

7 Tenā ne fakatapu ei ne Solomona a te kogaloto o te koga ateatea i mua o te fale o Ieova, me tenā te koga ne ofo atu ei ne ia a taulaga ‵sunu+ mo gako o taulaga ‵kai fakatasi, me i te fatafaitaulaga kopa+ telā ne faite ne Solomona e se mafai o ofi i ei a taulaga ‵sunu,+ taulaga meakai mo gako.+ 8 I te taimi tenā ne fai ei ne Solomona a te ‵kaiga fiafia fakatasi mo tino Isalaelu katoa i aso e fitu,+ se fakapotopotoga lasi ‵ki eiloa mai Lepo-hamata* ke oko ki lalo i te Vanu* o Aikupito.+ 9 Kae i te valu o aso* ne fai ei ne latou se maopoopoga ‵malu,+ me ne fakatapu ne latou a te fatafaitaulaga i aso e fitu mo te ‵kaiga fiafia i aso e fitu. 10 Kae i te 23 o aso o te fitu o masina, ne uga atu ei ne ia a tino ke olo ki olotou fale mo te fia‵fia+ kae ‵lifu i olotou loto ona ko te aga‵lei ne fakaasi atu ne Ieova ki a Tavita mo Solomona mo ana tino Isalaelu.+

11 Tenā ne fakaoti ei ne Solomona a te fale o Ieova mo te fale o te tupu;+ kae ko mea katoa kolā ne manako a te loto o Solomona ke fai ki te fale o Ieova mo tena fale totino ne taunu katoa mo te manuia.+ 12 Oti aka, ne fakasae atu a Ieova ki a Solomona+ i te po kae fai atu ki a ia: “Ko oti ne lagona ne au tau ‵talo, kae ko oti foki ne filifili ne au te koga tenei mō oku ke fai mo fale e ofo atu ei a taulaga.+ 13 Kafai ko ‵pono ne au a te lagi kae ko seai ne vaiua kae kafai e fakatonu atu au ki sikusikulauniu ke kai ne latou a lakau kaina o te fenua kae kafai e fai ne au ke poko se famai i oku tino, 14 kafai e loto maulalo+ oku tino kolā ne fakaigoa+ ki toku igoa kae ‵talo kae ‵sala mai ki a au kae ‵fuli kea‵tea mai olotou auala ma‵sei,+ ka lagona ne au latou mai te lagi kae fakamagalo te lotou agasala kae faka‵lei aka te lotou fenua.+ 15 Nei la, ka ‵pula eiloa oku mata kae tuku tonu atu oku taliga ki ‵talo e fai i te koga tenei.+ 16 Kae nei ko oti ne filifili kae fakatapu ne au te fale tenei ko te mea ke tumau eiloa toku igoa i te koga tenā,+ kae ko oku mata mo toku loto ka tuku faeloa i konā.+

17 “Kae ko koe, kafai e sasale koe i oku mua e pelā mo te auala ne sasale i ei tou tamana ko Tavita mai te faiga o mea katoa kolā ne fakatonu atu ne au ki a koe, kae fakalogo koe ki aku tulafono fo‵liki mo aku fakamasinoga,+ 18 tenā ka fakatu aka ei ne au te nofogaaliki o tau pulega fakatupu,+ e pelā eiloa mo taku feagaiga ne fai mo tou tamana ko Tavita,+ penei, ‘Ka se mafai eiloa o seai se tagata i tou gafa e pule i luga i Isalaelu.’+ 19 Kae kafai koe e ‵fuli kea‵tea kae fakapuli aku tulafono fakavae mo aku fakatonuga kolā ne tuku atu ne au ki a koe kae fano koe o tavini atu ki nisi atua kae ifo atu ki a latou,+ 20 ka unu kea‵tea ne au a Isalaelu mai toku fenua telā ne tuku atu ne au ki a latou,+ kae ko te fale tenei ne fakatapu ne au mō toku igoa ka ave kea‵tea ne au mai oku mua, kae ka fai ne au e pelā me se mea fai fa‵kata* kae se mea fakaitaita a tino katoa.+ 21 Kae ko te fale tenei ka fai pelā me se faka‵tuga o mea ne fakamasei. So se tino e fakasili atu i konā ka kilo atu ki ei mo te ofo+ kae fai aka, ‘Kaia ne fai ei ne Ieova a te mea tenā ki te fenua tenei mo te fale tenei?’+ 22 Tenā ka fai atu ei latou, ‘Ne fai penā me ne tiakina ne latou a Ieova+ te Atua o olotou tupuga, telā ne aumai ne ia latou ki tua mo te fenua o Aikupito,+ kae ‵piki ‵mau latou ki nisi atua kae ifo ki ei kae tavini atu ki a latou.+ Tenā te pogai ne aumai ei ne ia a puapuaga katoa konei ki a latou.’”+