Te Tusi i te Lua ki te Kau Kolinito

13 Tenei te tolu o taimi ka fanatu ei au ki a koutou. “E ‵tau o fakatalitonu aka a mea katoa i molimau a tino e tokolua io me e tokotolu.”+ 2 E tiga eiloa e galo au i otou tafa, kae e pelā eiloa me ne nofo atu au i a koutou i te lua o taimi, kae ke na fai atu ne au aku pati ki a latou kolā ko oti ne agasala muamua e pelā foki mo nisi tino katoa, me kafai e toe foki atu au ka seai eiloa se tino o latou e sao i a au, 3 ona ko koutou e salasala ki se fakamaoniga me i a Keliso, telā e se vāivāi e uiga ki a koutou kae e malosi ‵ki i a koutou, e faipati atu e auala i a au. 4 E tonu, ne tamate a ia i te pou ona ko tena foitino vāivāi, kae ko ola a ia ona ko te ‵mana o te Atua.+ E tonu, e vāi‵vai fakatasi tatou mo ia, kae ka ola fakatasi tatou mo ia+ e auala i te ‵mana o te Atua i a koutou.+

5 Ke tumau i te tofotofo aka o koutou me e mata, e ‵piki ‵mau koutou ki te fakatuanaki; ke tumau faeloa i te fakamaoni aka ne koutou a koutou eiloa.+ E a, e se lavea ne koutou me e ‵kau fakatasi koutou mo Iesu Keliso? Seiloga ke se talia koutou ne te Atua. 6 Au e fakamoemoe me ka iloa ne koutou me e talia eiloa matou ne te Atua.

7 Nei la, e ‵talo matou ki te Atua ko te mea ke se fai ne koutou se mea ‵se, kae e se ona ko te mea ke foliga atu i a matou ko talia ne ia, kae ko te mea ke fai ne koutou a te mea ‵lei, e tiga te motou foliga atu me e se taliagina matou. 8 Me e seai se mea e mafai o fai ne matou ke ‵teke atu ki te munatonu, kae na ko te ‵lago atu ki te munatonu. 9 E fia‵fia eiloa matou māfai e vāi‵vai matou kae ko koutou e ma‵losi. Kae tenei eiloa te mea e ‵talo atu matou e uiga ki ei, ke fakatonutonu aka koutou. 10 Tenā te pogai e tusi atu ei ne au a mea konei kae galo au i otou tafa, me kafai ko fakatasi tatou, e se fakaaoga ne au i se auala faigata a te malosi pule telā ne tuku mai ne te Aliki ki a au,+ ke ati aka ei koutou kae ke se lepe koutou ki lalo.

11 Taina, konei aku toe muna, tumau i te fia‵fia, fakatonutonu otou mafaufau, ke talia a pati fakamalosi,+ ke ‵pau a mea e mafau‵fau koutou ki ei,+ ke ola i se olaga filemu;+ kae ka nofo i luga i a koutou a te Atua o te alofa mo te filemu.+ 12 Ke fakatau fakatalofa atu koutou i te sogi tapu. 13 Ko ‵moli atu a alofaaga o tino tapu katoa ki a koutou.

14 Ke i luga i a koutou katoa te alofa tauanoa o te Aliki ko Iesu Keliso mo te alofa o te Atua i te ‵kau fakatasi mo te agaga tapu.