Sakalia
13 “I te aso tenā ka ‵tala ei se vaikeli ki te kāiga o Tavita mo tino e ‵nofo i Ielusalema mo faka‵ma a agasala mo mea sē ‵ma.+
2 “I te aso tenā,” ko te folafolaga a Ieova o kautau, “ka ‵solo ne au a igoa o tupua mai i te fenua,+ kae ka se toe masaua latou; kae ka fulu faka‵ma ne au te laukele mai i pelofeta+ mo te agaga o te sē ‵ma. 3 Kae kafai e isi se tagata e toe ‵valo fakapelofeta, a tena tamana mo tena mātua kolā ne fanau ne lāua a ia ka fai atu ki a ia, ‘A koe ka se ola, me ne faipati koe ki te loi i te igoa o Ieova.’ Kae ko tena tamana mo tena mātua kolā ne fanau ne lāua a ia ka ‵suki ne lāua a ia ona ko ana valoaga.+
4 “I te aso tenā a pelofeta takitasi ka ma‵vale i olotou fakaasiga māfai ko ‵valo fakapelofeta latou; kae ka se ‵pei latou ki gatu fulufulua+ ke faka‵se i ei a tino. 5 Kae ka fai mai a ia, ‘Au e sē se pelofeta. Au se tagata fai fatoaga, me ne ‵togi au ne se tagata i taku folikiga.’ 6 Kae kafai e fesili atu se tino ki a ia, ‘Ne a pa‵kiaga konei i te va ou tuauma?’* ka tali mai a ia, ‘Ko pa‵kiaga ne maua ne au i te fale o oku taugasoa.’”*
7 “Te pelu, ala mai o ‵teke ki taku tausi mamoe,+
O ‵teke a te tagata telā ko toku taugasoa,” ko te folafolaga a Ieova o kautau.
“Tamate a te tausi mamoe,+ kae tuku ke mafuta valevale a te lafu mamoe;+
Kae ka ‵fuli atu toku lima ki a latou kolā e se tāua.”
8 “Kae i te fenua kātoa,” ko te folafolaga a Ieova,
“E lua vaega i ei ka ‵kati kea‵tea kae fakaseai;
Kae ko te tolu o vaega ka faka‵toe mai i loto i ei.
9 Kae ka aumai ne au te tolu o vaega i loto i te afi;
Kae ka faka‵ma ne au e pelā mo te faka‵māga o siliva,
Kae tofotofo aka e pelā mo te tofotofoga o te aulo.+
Ka ka‵laga mai latou ki toku igoa,
Kae ka tali atu au ki a latou.
Ka fai atu au, ‘A latou ko oku tino,’+
Kae ka fai mai latou, ‘A Ieova ko te motou Atua.’”