Te Muamua Samuelu

23 Fakamuli ifo, ne avatu te fakailoaga ki a Tavita: “A tino Filisitia ko taua atu ki Keila,+ kae ko ‵fao ne latou a mea i te koga tuki saito.” 2 Tenā ne fesili atu ei a Tavita ki a Ieova:+ “E mata, e ‵tau o fano au o ‵ta a tino Filisitia konei?” Muna Ieova ki a Tavita: “Fano o ‵ta a tino Filisitia kae fakasao a Keila.” 3 Kae ne fai atu a tāgata a Tavita ki a ia: “Kiloke! A tatou nei ko ‵nofo ma‵taku i konei i Iuta;+ kae sili atu la māfai ko olo tatou ki Keila o taua atu ki te kautau a Filisitia!”+ 4 Tenā ne toe fesili atu ei a Tavita ki a Ieova.+ Kae ne tali mai a Ieova: “Tu ki luga; fanaifo ki Keila me ka tuku atu ne au a tino Filisitia ki ou lima.”+ 5 Tenā ne olo ei a Tavita mo ana tāgata ki Keila o taua atu ki tino Filisitia; ne puke ne ia olotou lafu manu kae ‵ta valevale ne ia latou, kae ne faka‵sao ne Tavita a tino e ‵nofo i Keila.+

6 I te taimi ne tele atu ei a Aviata+ te tama tagata a Aimeleka ki a Tavita i Keila, e isi se efota ne puke atu ne ia. 7 Ne avatu te fakailoaga ki a Saulo: “A Tavita ko oti ne fano ki Keila.” Tenā ne fai aka ei a Saulo: “Ko oti ne tuku mai ne te Atua a ia ki a au,*+ me ne fai ne ia a ia eiloa ke lave i te matasele mai te ulu atu ki loto i se fakai telā e isi ne ana mataloa mo lakau faka‵lava.” 8 Ne fakatonu atu a Saulo ki tino katoa ke olo ki te taua, ke olo ifo ki Keila o taua atu ki a Tavita mo ana tāgata. 9 I te iloaga ne Tavita i a Saulo ko taumafai o taua atu ki a ia, ne fai atu a ia ki a Aviata te faitaulaga: “Aumai te efota ki konei.”+ 10 Tenā ne fai atu ei a Tavita: “Ieova te Atua o Isalaelu, ko oti ne logo tau tavini me i a Saulo e fakatoka o vau ki Keila o fakamasei te fakai ona ko au.+ 11 E mata, ka tuku atu au ne takitaki* o Keila ki ana lima? E mata, ka vau eiloa a Saulo e pelā mo te tala ne logo i ei tau tavini? Ieova te Atua o Isalaelu, fakamolemole tali mai aka ki tau tavini.” Tenā ne fai atu ei a Ieova: “A ia ka fanatu eiloa.” 12 Ne fesili atu a Tavita: “E mata, ka tuku atu au mo aku tāgata ne takitaki o Keila ki lima o Saulo?” Ne tali atu a Ieova: “Ka tuku atu eiloa ne latou a koutou.”

13 Tenā ne ‵tu aka ei a Tavita mo ana tāgata, kāti e toko 600 te lotou aofaki,+ kae tiaki ne latou a Keila kae olo ki so se koga e mafai o olo latou ki ei. I te taimi ne fakailoa atu ei ki a Saulo i a Tavita ko oti ne tele kea‵tea mai Keila, ne seki fano a ia ki ei. 14 Ne nofo a Tavita i te koga lavaki i koga e faigata o oko a tino ki ei, i te koga maugā o te koga lavaki o Sifo.+ Ne salasala faeloa+ a Saulo ki a ia, kae ne seki tuku eiloa ne Ieova a ia ki ana lima. 15 Ne iloa ne Tavita i a* Saulo e ‵sala ke tamate a ia i te taimi koi nofo ei a ia i te koga lavaki o Sifo i Holesa.

16 Ne fano a Ionatana te tama tagata a Saulo ki a Tavita i Holesa, kae ne fesoasoani atu a ia o fakamalosi tena loto talitonu ki a Ieova.+ 17 Ana muna ki a ia: “Sa mataku, me ka se maua eiloa koe ne toku tamana ko Saulo; a koe ka fai mo tupu o Isalaelu,+ kae ko au e tulaga lua ki a koe; kae ko toku tamana ko Saulo e iloa foki ne ia te mea tenā.”+ 18 Tenā ne fai ei ne lāua se feagaiga+ i mua o Ieova, ne nofo a Tavita i Holesa, kae foki atu a Ionatana ki tena fale.

19 Fakamuli ifo, ne olo atu a tāgata Sifo ki a Saulo i Kipea+ kae fai atu: “E mata, a Tavita e se ‵muni pili mai fua ki a tatou+ i koga kolā e faigata o olo a tino ki ei i Holesa,+ i te tamā mauga o Hakila,+ i te feitu ki saute* o Iesimoni?*+ 20 I so se taimi e ‵lei ki a koe ke fanaifo, e te tupu, ko fanaifo la koe, kae ka tuku atu ne matou a ia ki lima o te tupu.”+ 21 Tenā ne fai atu ei a Saulo: “Ke fakamanuia koutou ne Ieova, me ne fakaasi mai ne koutou te alofa atafai ki a au. 22 Fakamolemole, olo kae taumafai ke iloa tonu ne koutou te koga e nofo a ia i ei kae ko oi foki ne lavea ne latou a ia i konā, i a au ne logo me ko ia loa ko poto i te faitogafiti. 23 Ke fakamautinoa faka‵lei mai ana koga ‵muni katoa kae toe ‵foki mai ki a au mo otou fakamaoniga. Ko olo fakatasi ei tatou, kae kafai e nofo a ia i te fenua tenā ka ‵sala eiloa ne au a ia i loto i te fia afe o tino Iuta.”

24 Tenā ne mua atu ei latou i a Saulo o olo ki Sifo,+ kae ko Tavita mo ana tāgata ne ‵nofo i te koga lavaki o Maono,+ i te Alapaa+ i te feitu ki saute o Iesimoni. 25 Tenā ne olo atu ei a Saulo mo ana tāgata o ‵sala a ia.+ I te fakailoatuga ki a Tavita a te mea tenei, ne fanaifo fakavave a ia ki te kaupapa+ kae nofo i te koga lavaki o Maono. I te logoga a Saulo i te mea tenei, ne afuli ne ia a Tavita ki te koga lavaki o Maono. 26 I te okoatuga a Saulo ki te feitu e tasi o te mauga, kae ko Tavita mo ana tāgata e ‵nofo i te suā feitu o te mauga. Ne fakava‵vave a Tavita o tele kea‵tea+ mai i a Saulo, kae ko Saulo mo ana tāgata ko pili atu eiloa ki a Tavita mo ana tāgata o puke latou.+ 27 Kae ne oko atu se avefekau ki a Saulo, kae fai atu: “Vau fakavave, me i tino Filisitia ko ‵mai o taua ki ‵tou fenua!” 28 I konā, ne seki toe fanatu a Saulo o afuli a Tavita+ kae fanatu eiloa o taua ki tino Filisitia. Tenā te pogai ne fakaigoa ei te koga tenā ki te Kaupapa o te Mavaega.

29 Tenā ne fano ei a Tavita mai konā o nofo i koga kolā e faigata o oko ki ei a tino i Eneketi.+