Te Lua Nofoaiga Tupu
10 Ne fanatu a Leopoamo ki Sekema,+ me i tino Isalaelu katoa ne o‵mai ki Sekema o fai a ia mo tupu.+ 2 I te taimi eiloa ne logo ei a Ielopoamo+ te tama tagata a Nepata i te mea tenā (koi nofo eiloa tou tagata i Aikupito me ne tele a ia kea‵tea ona ko te Tupu ko Solomona),+ foki mai ei a Ielopoamo mai Aikupito. 3 Tenā ne uga atu ei te lotou fekau ke vau a ia kae ne o‵mai ei a Ielopoamo mo Isalaelu kātoa ki a Leopoamo kae fai atu: 4 “A tou tamana ne fai ne ia te motou amoga ke faigata.+ Kae kafai e fakafaigofie ne koe a galuega faiga‵ta a tou tamana, kae fakamāmā ne koe te amoga ‵mafa ne tuku mai ne ia ki a matou, ka tavini atu matou ki a koe.”
5 Ana muna ki a latou: “Toe ‵foki mai ki a au mai tua o aso e tolu.” Tenā ne olo kea‵tea ei a tino.+ 6 Ne faipati atu a te Tupu ko Leopoamo ki tāgata ma‵tua* kolā ne tavini atu ki tena tamana ko Solomona i te taimi koi ola ei a ia, ana muna: “Ne a otou manatu ki te tali ka fai atu ne au ki tino konei?” 7 Ne tali atu latou ki a ia: “Kafai e fai faka‵lei ne koe a tino konei kae fakafiafia ne koe latou kae tuku atu se tali ‵lei ki a latou, ka fai faeloa latou mo fai au tavini.”
8 Kae ne ‵teke atu a ia ki manatu o tāgata ma‵tua* kolā ne fai atu, kae ne ‵sala atu a ia ki pati fakatonutonu mai tamataene kolā ne ‵tupu tasi aka mo ia kae ko fai nei mo ana tino fesoasoani.+ 9 Ne fesili atu a ia ki a latou: “Ne a otou manatu ki te tali ka fai atu ne tatou ki tino kolā ne fai mai ki a au penei, ‘Fai aka ke māmā a te amoga ne tuku mai ne tou tamana ki a matou’?” 10 Ne fai atu a tamataene kolā ne ‵tupu tasi aka mo ia: “Konei a pati e ‵tau o fai ne koe ki tino kolā ne fai atu ki a koe, ‘A tou tamana ne fai ne ia ke ‵mafa te motou amoga kae e ‵tau o fai ne koe ke māmā mō matou’; konei a pati e ‵tau o fai ne koe ki a latou, ‘A toku matikao lima foliki ka ‵fula atu i kautega o toku tamana. 11 A toku tamana ne fai ne ia otou amoga ke ‵mafa, kae ka fakaopoopo atu ne au te amoga a koutou. A toku tamana ne fakasala ne ia koutou ki ‵kini, kae ka fakasala ne au koutou ki ‵kini makai‵kai.’”
12 Ne olo atu a Ielopoamo mo tino katoa ki a Leopoamo i te tolu o aso, e pelā eiloa mo pati a te tupu ne fai atu: “‵Foki mai ki a au i te tolu o aso.”+ 13 Kae ne tali atu te tupu ki a latou mo te kaitaua. Tenā ne seki talia ei ne te Tupu ko Leopoamo a manatu o tāgata ma‵tua.* 14 Ne fai atu ne ia ki a latou a manatu mai tamataene, ana muna: “Ka fai ne au a te otou amoga ke ‵mafa atu, kae ka fakaopoopo atu ne au a mea ki ei. A toku tamana ne fakasala ne ia koutou ki ‵kini, kae ka fakasala ne au koutou ki ‵kini makai‵kai.” 15 Tela la, a te tupu ne seki fakalogo eiloa ki tino, me ne fai ne te Atua tonu ke tupu a te mea tenei,+ ke fakataunu ei a pati a Ieova ne fai atu e auala i a Aita+ te tagata Sailo ki a Ielopoamo te tama tagata a Nepata.
16 E pelā mo Isalaelu kātoa, ona ko te tupu ne seki fia fakalogo ki a latou, ne tali atu a tino ki te tupu: “Se a te motou vaega e maua mai i a Tavita? E seai se motou tofi i te tama tagata a Iese. Isalaelu, toe ‵foki ki otou atua! Tausi atu la tou kāiga e Tavita.”+ I konā eiloa, ‵foki ei a tino Isalaelu ki olotou fale.*+
17 Kae ne tumau eiloa a Leopoamo i te pule atu ki tino Isalaelu kolā e ‵nofo i fakai o Iuta.+
18 Tenā ne uga atu ei ne te Tupu ko Leopoamo a Hatolama,+ telā ko te pule o tino kolā e ‵tau o ga‵lue fakagamua mō te tupu, kae ne peipei a ia ne tino Isalaelu ki fatu ke mate. Ne sopo aka a te Tupu ko Leopoamo ki tena kaliota kae tele ki Ielusalema.+ 19 Kae ne tumau eiloa a tino Isalaelu i te ‵teke atu ki te kāiga o Tavita ke oko mai ki te aso nei.