Sapakuka
1 Ko te fekau telā ne maua ne Sapakuka* te pelofeta i se fakaasiga:
2 E pefea te leva, e Ieova, e ‵tau ei mo au o tagi atu mō se fesoasoani, kae e se lagona ne koe?+
E pefea te leva e ‵tau ei mo au o fakamolemole atu mō se fesoasoani ona ko fakasauaga, kae e se saga mai koe?+
3 Kaia e fai ei ne koe ke kilo atu au ki amioga ma‵sei?
Kaia e talia ei ne koe a amioga fakasaua?
Kaia e isi ei ne fakamaseiga mo fakasauaga i oku mua?
Kae kaia ko uke ei a kinauga mo taua?
4 A te tulafono ko seai sena malosi,
Kae ko seai se fakamasinoga tonu.
Me i tino amio‵tonu ko fakatamilo ne tino amio ma‵sei;
Tenā te pogai ko ‵fuli fakakotua ei te fakamasinoga tonu.+
5 “Kilo ki atufenua kae saga tonu mai!
‵Pula ‵toka atu mo te ofo mo te poi;
Me ka isi se mea ka tupu i ou aso
Telā ka se talitonu koe ki ei faitalia me fai atu ki a koe.+
6 Me ka faka‵tu aka eiloa ne au a tino Kaletaia,+
Te atufenua fakasaua kae pati ‵pole.
E ‵fulu faka‵ma ne latou a koga ‵lasi o te lalolagi
Ke puke ne fale mō latou.+
7 E fakama‵taku latou kae e ma‵taku a atufenua i a latou.
E fai eiloa ne latou olotou tulafono mo te lotou pulega.+
8 Olotou solofanua e ma‵kini atu i lō lepoti,
Kae e fe‵kai atu i lō kuli vao i te po.+
Olotou solofanua tau e ‵tele ma‵kini ki mua;
Olotou solofanua e o‵mai i koga ‵mao.
E faka‵to ifo latou ki lalo e pelā eiloa me se aeto ko fanaifo fakavave o kai.+
9 E ma‵nako malosi eiloa latou o fakasaua atu.+
Kafai ko olo fakatasi atu a latou katoa, ko fai eiloa latou e pelā me se matagi mai i te feitu ki saegala,+
Kae asu aka ne latou a tino ne ave fakapagota e pelā me ne one.
10 E fakatauemu ne latou a tupu
Kae ‵kata ki ofisa ma‵luga.+
E ‵kata latou ki koga ma‵luga katoa;+
E fakaputu aka ne latou a kele ke ma‵luga ko puke ei ne latou te fakai.
11 Tenā ko olo ei latou ki mua e pelā me se matagi kae olo atu i loto i ei,
Kae ka agasala eiloa latou,+
Me ne fai atu me maua te lotou malosi mai i te lotou atua.”*+
12 E a, a koe e seki ola mai i te se-gata-mai, e Ieova?+
Toku Atua, toku Atua Tapu, a koe e se mate.*+
Ieova, ne faka‵sopo aka ne koe latou ke fai te fakamasinoga;
Toku Kaupapa,+ ne faka‵tu aka ne koe latou mō te fakasalaga.+
13 Ou mata ko tō ‵ma ke kilo ki se mea matagā,
Kae e se mafai o talia ne koe se amioga masei.+
Kaia la e talia ei ne koe a tino amio faitogafiti+
Kae nofo filemu māfai ko folo ne se tagata masei se tino e amiotonu atu i a ia?+
14 Kaia e fai ei ne koe a te tagata ke pelā me se ika o te tai,
E pelā mo mea ‵tolo kolā e seai se lotou pule?
15 A mea katoa konei e faka‵lave ne ia* ki se kafilo.
E ‵poa ne ia i tena tili,
Kae fakamaopoopo ne ia i tena tili faiika.
Tenā te pogai e fiafia malosi ei a ia.+
16 Tenā te pogai e ofo ei ne ia a taulaga ki tena tili
Kae fai a taulaga ki tena tili faiika;
Me e auala i mea konā e maumea ei a ia,
Kae ‵gali ana meakai.
17 E a, ka tumau a ia i te ‵ligi ki tua o tena tili ke seai ne mea i ei?
E a, ka tumau a ia i te tamatega o atufenua e aunoa mo te alofa atafai?+