Te Lua Nofoaiga Tupu

19 Tenā ne foki atu ei a te tupu o Iuta ko Iosefatu ki tena fale* i Ielusalema mo te filemu.+ 2 Ne fanatu a Ieu+ te tama tagata a Hanani+ te tino fakamatala fakaasiga o fakafetaui ki a ia kae fai atu ki te Tupu ko Iosefatu: “E mata, e ‵tau o fesoasoani atu koe ki tino ma‵sei,+ kae e mata, e ‵tau o alofa koe ki tino kolā e takalia‵lia ki a Ieova?+ Ona ko te mea tenei ko oko atu ei te kaitaua o Ieova ki luga i a koe. 3 Kae e isi ne mea ‵lei ne maua atu i a koe,+ me ne tapale kea‵tea ne koe a pou lakau tapu* mai te fenua kae ne fakatoka ne koe tou loto* o ‵sala ki te Atua tonu.”+

4 Ne nofo eiloa a Iosefatu i Ielusalema, kae ne toe fanatu a ia ki ana tino mai Pelesepa ki te koga maugā o Efalaima,+ o faka‵foki mai latou ki a Ieova te Atua o olotou tupuga.+ 5 Ne faka‵sopo aka foki ne ia a famasino i te fenua i fakai katoa o Iuta kolā ne puipui faka‵lei, i fakai takitasi.+ 6 Kae ne fai atu a ia ki famasino: “‵Saga tonu ki otou mea e fai, me e se fai ne koutou a fakamasinoga mō se tagata kae mō Ieova, kae e fakatasi atu a ia ki a koutou māfai ko fai ne koutou a fakaikuga.+ 7 Nei la, ke ma‵taku koutou ki a Ieova.+ Ke fakaeteete i otou mea e fai, me i a Ieova te ‵tou Atua e se fai mea sē tonu,+ e se fakailoga tino,+ kae e se talia foki ne ia a ‵togi fakakolekole.”+

8 E penā foki i Ielusalema, ne faka‵sopo aka ne Iosefatu a nisi tino Levi mo faitaulaga mo nisi ulu o kāiga i olotou tamana ke fai pelā me ne famasino a Ieova kae ke fai ne latou a fakaikuga e uiga ki tagi a tino Ielusalema.+ 9 Kae ne fakatonu atu a ia ki a latou: “Konei a mea e ‵tau o fai ne koutou mo te ma‵taku ki a Ieova, fakatasi mo te fakamaoni mo te loto kātoa:* 10 I so se taimi e o‵mai ei otou taina kolā e ‵nofo i olotou fakai mo se tagi telā e aofia i ei te fakamaligi toto+ io me se fesili e uiga ki se tulafono, se fakatonuga, ne tulafono fo‵liki, io me ne fakamasinoga, e ‵tau o fakailoa atu ne koutou ki a latou ko te mea ke se agasala latou i mua o Ieova; i te mea ma fakaoko atu ne ia tena kaitaua ki a koutou mo otou taina. Tenei te mea e ‵tau o fai ne koutou ko te mea ke se agasala koutou. 11 Tenei a Amalia te faitaulaga pule telā e pule ki a koutou i so se mea e uiga ki a Ieova.+ A Sepatia te tama tagata a Isamaeli ko te takitaki o te kāiga o Iuta i so se mea e uiga ki te tupu. Kae ko tino Levi ka tavini atu e pelā me ne ofisa mō koutou. Ke loto ma‵losi kae gasue‵sue, kae ke fakatasi atu eiloa a Ieova ki a latou kolā e fai a mea ‵lei.”*+