Esekielu
28 Ne toe oko mai te fekau a Ieova ki a au, ana muna: 2 “Te tama a te tagata, fai atu ki takitaki o Tulo, ‘Konei a pati a te Aliki Sili ko Ieova ne fai mai:
“Ona ko koe ne loto fakamaualuga,+ ne fai aka faeloa koe, ‘Au se atua.
Au e sagasaga i te nofogaaliki o se atua i te kogaloto o te tai.’+
Kae ko koe se tagata fua, e sē se atua,
Faitalia eiloa me fai aka tou loto i a koe se atua.
3 Kiloke! A koe e poto atu i a Tanielu.+
E seai ne mea ‵funa ne ‵funa mai i a koe.
4 Ko oti ne fai ne koe ke maumea koe e auala i tou poto mo tou atamai,
Kae ne fakaputu faeloa ne koe a aulo mo siliva i ou potu ‵teu koloa.+
5 A tou apo i mea fakapisinisi ne aumai ei ki a koe a koloa e uke,+
Kae ne gasolo aka eiloa tou loto fakamaualuga ona ko ou koloa.”’
6 “‘Tela la, konei a pati a te Aliki Sili ko Ieova ne fai mai:
“Ona ko koe ne fai aka i tou loto me i a koe se atua,
7 Ka aumai ne au ki a koe ne tino fakaa‵tea ke taua atu ki a koe, ko toe tino fakasaua eiloa o atufenua,+
Kae ka tapale olotou pelu o taua atu ki te gali o tou poto
Kae fakalailai te gali o tou ‵malu.+
8 Ka tuku ifo ne latou a koe ki lalo i te lua,
Kae ka mate koe i te mate fakasaua i te kogaloto o te tai lasi.+
9 E a, ka tumau eiloa koe i te fai atu, ‘Au se atua,’ ki te tino e tamate ne ia koe?
A koe se tagata fua, e sē se atua, i lima o latou kolā ka fakalailai ne latou koe.”’
10 ‘E auala i lima o tino fakaa‵tea, ka mate ei koe i te mate o tino e seki pilitome,
Me i a au ko oti ne faipati,’ ko te folafolaga a te Aliki Sili ko Ieova.”
11 Kae ne toe oko mai te fekau a Ieova ki a au, ana muna: 12 “Te tama a te tagata, usu se pese fanoanoa e uiga ki te tupu o Tulo, kae fai atu ki ei, ‘Konei a pati a te Aliki Sili ko Ieova ne fai mai:
13 A koe ne nofo i Etena, te fatoaga o te Atua.
A koe ne teuteu ki fatu tāua katoa
—Lupi, topasa mo te iasipi;
kuate lanu ‵sega, onika mo te iasepi; safaila, takosi+ mo te emela;
Kae ko mea e tuku i ei mo mea e teuteu ki ei ne faite ki te aulo.
Ne fakatoka a mea konā i te aso ne faite ei koe.
14 Ne ‵tofi aka ne au koe e pelā me se kelupi puipui telā ne fakaekegina.
A koe ne nofo i te mauga tapu o te Atua,+ kae ne sasale koe i luga i fatu ‵ka.
15 E seai se mea ‵se i ou auala mai i te aso ne faite ei koe
Ke oko ki te taimi ne maua atu ei te sē amiotonu i a koe.+
Tela la, ka ‵pei ne au koe ki tua e pelā me se mea sē ‵ma mai i te mauga o te Atua kae fakamasei atu koe,+
E te kelupi puipui, ke ‵pei kea‵tea mai i fatu ‵ka.
17 A koe ne loto fakamaualuga ona ko tou gali.+
Ne fakamasei ne koe tou poto ona ko te gali o tou ‵malu.+
Ka ‵pei ifo ne au koe ki te laukele.+
Ka fai ne au koe e pelā me se mea fakamaimoa i mua o tupu.
18 Ona ko te uke o au mea ‵se mo au mea fakapisinisi sē ‵tonu, ne fakalailai ei ne koe ou koga tapuaki.
Ka fai ne au se afi ke ‵ka i loto i a koe, kae ka ‵ka i ei a koe.+
Ka fai ne au koe ke liu lefu i te laukele i mua o latou katoa kolā e kilo‵kilo atu ki a koe.
19 A tino katoa o te fenua kolā e iloa ne latou koe ka ‵kilo atu ki a koe mo te ofo.+
A tou gataga ka oko fakapoi mai kae ka matagā foki,
Kae ka galo atu eiloa koe mō taimi katoa.”’”+
20 Kae ne toe oko mai te fekau a Ieova ki a au, ana muna: 21 “Te tama a te tagata, ‵fuli atu ou mata ki Saitonu,+ kae ‵valo o ‵teke atu ki a ia. 22 E ‵tau mo koe o fai atu, ‘Konei a pati a te Aliki Sili ko Ieova ne fai mai:
‘Au tenei e taua atu ki a koe, e Saitonu, kae ka fakamaluga aka au i loto i a koe;
Kae ka iloa ei ne tino i a au ko Ieova māfai ko fakaoko atu ne au te fakasalaga ki luga i a ia kae fakamaluga aka au i loto i a ia.
23 Ka avatu ne au a famai ki loto i a ia kae ka ‵tafe mai a toto i ana auala.
A tino ka ‵mate i loto i a ia māfai ko oko mai te pelu o taua atu ki a ia mai i feitu katoa;
Kae ka iloa ei ne latou i a au ko Ieova.+
24 “‘“Tenā ko se toe fakatamilo ei a te kāiga o Isalaelu ne lakau makai‵kai fakapa‵kia tino mo lakau tala‵tala+ fakalogo‵mae, ko tino kolā e fakatauemu atu ki a latou; kae ka iloa ei ne tino i a au ko te Aliki Sili ko Ieova.”’
25 “‘Konei a pati a te Aliki Sili ko Ieova ne fai mai: “Kafai ko toe fakamaopoopo ne au te kāiga o Isalaelu mai i fenua ne fakasalalau atu latou ki ei,+ ka fakamaluga aka au i loto i a latou i mua o atufenua.+ Kae ka ‵nofo latou i te lotou fenua+ telā ne tuku ne au ki taku tavini ko Iakopo.+ 26 Ka ‵nofo latou i ei mo te tokagamalie+ kae faite a fale kae ‵toki togavine,+ kae ka ‵nofo latou mo te tokagamalie māfai ko fakaoko atu ne au te fakamasinoga ki a latou katoa i olotou tafa kolā e fakatauemu atu ki a latou;+ kae ka iloa ei ne latou i a au ko Ieova te lotou Atua.”’”