Esekielu

33 Kae ko te fekau a Ieova ne oko mai ki a au, ana muna: 2 “Te tama a te tagata, faipati atu ki tino o tou fenua,+ kae fai atu ki a latou,

“‘Kafai e aumai ne au te pelu ki luga i te fenua,+ kae puke ne tino katoa o te fenua tenā se tagata kae fai a ia mo olotou leoleo, 3 kae lavea ne ia te pelu e vau ki te fenua kae ili te pu kae fakailoa atu te mea tenā ki tino.+ 4 Kafai e lagona ne se tino te tagi o te pu kae e se fia saga ki te fakailoaga tenā+ kae oko mai te pelu kae tamate atu ei a ia,* ka i luga eiloa i tena ulu ana toto.+ 5 Ne lagona ne ia te tagi o te pu, kae ne seki fia saga atu a ia ki te fakailoaga tenā. Ka i luga eiloa i a ia ana toto. Moi fai ne saga atu a ia ki te fakailoaga tenā, penei ko sao atu tena ola.

6 “‘Kae kafai e lavea ne se tagata leoleo a te pelu ko oko mai kae e se ili te pu+ kae seai se fakailoaga e maua ne tino kae oko mai te pelu kae tamate i ei te ola o se tino tokotasi o latou, ka mate eiloa te tino tenā ona ko tena mea ‵se, kae ka toe taui atu ne au ki te tagata leoleo a toto o te tagata tenā.’+

7 “E pelā mo koe e te tama a te tagata, ko oti ne ‵tofi aka ne au koe e pelā me se leoleo mō te kāiga o Isalaelu; kae kafai e lagona ne koe se fekau mai i toku gutu e ‵tau o fakailoa atu ne koe ki a latou a te mea tenā mai i a au.+ 8 Kafai e fai atu au ki se tino amio masei, ‘E te tino amio masei, a koe ka mate eiloa!’+ kae e se faipati atu koe o fakailoa atu ki te tino amio masei ke ‵fuli tena auala, ka mate eiloa a ia e pelā me se tagata amio masei ona ko tena mea ‵se,+ kae ka taui atu ne au ki a koe a toto o te tagata tenā. 9 Kae kafai ne fakailoa atu ne koe ki te tino amio masei ke ‵fuli kea‵tea mai i tena auala kae ita a ia ma ‵fuli tena auala, ka mate eiloa a ia ona ko tena mea ‵se,+ kae ko fakasao eiloa ne koe a tou ola.+

10 “Kae ko koe e te tama a te tagata, fai atu ki te kāiga o Isalaelu, ‘Ne fai mai koutou: “A omotou ‵tekeatuga mo omotou agasala ko oko eiloa i te ‵mafa i luga i a matou, kae fai ei matou ke gasolo ifo o vāi‵vai;+ tela la, e mafai pefea o tumau matou i te ola?”’+ 11 Fai atu ki a latou, ‘“E pelā eiloa mo au e ola,” ko te folafolaga a te Aliki Sili ko Ieova, “au e se fiafia i te mate o se tino amio masei,+ kae ko te tino amio masei tenā ke na ‵fuli tena auala+ kae tumau i te ola.+ ‵Fuli kea‵tea, ‵fuli kea‵tea mai i otou auala ma‵sei,+ me kaia e ‵tau ei mo koutou o ‵mate, e te kāiga o Isalaelu?”’+

12 “Kae pelā mo koe, e te tama a te tagata, fai atu ki tino o tou fenua, ‘A te amiotonu o te tagata amiotonu ka se fakasao ei a ia māfai ko ‵teke atu a ia;+ io me ko te amio masei o te tāgata amio masei ka fai i ei a ia ke siga māfai ko ‵fuli kea‵tea a ia mai i ana amioga ma‵sei;+ kae ka se mafai foki o tumau se tino amiotonu i te ola faitalia tena amiotonu māfai ko agasala a ia i te aso tenā.+ 13 Kafai e fai atu au ki te tino amiotonu: “A koe ka tumau eiloa i te ola,” kae e loto talitonu a ia ki tena amiotonu kae fai ne ia te mea ‵se,+ e seai loa se faifaiga amiotonu a ia ka masaua atu, kae ka mate a ia ona ko te mea ‵se ne fai ne ia.+

14 “‘Kae kafai e fai atu au ki te tino amio masei: “A koe ka mate eiloa,” kae ‵fuli kea‵tea a ia mai i tena agasala kae fai te mea tonu kae amiotonu,+ 15 kae fakafoki ne te tino amio masei a te mea telā ne puke i te faiga o se tautoga+ kae toe ‵togi atu a te mea ne kaisoa,+ kae sasale a ia e ‵tusa mo tulafono fakavae o te olaga mai te sē fai o te mea ‵se, e mautinoa me ka tumau eiloa a ia i te ola.+ Ka se mate a ia. 16 E seai ne agasala ne fai ne ia ka ‵losi atu ki a ia.+ Me ne fai ne ia te mea tonu kae amiotonu, e mautinoa me ka tumau eiloa a ia i te ola.’+

17 “Kae ko ou tino ne fai aka, ‘A te auala o Ieova e se tonu,’ kae tela la, ko te lotou auala eiloa e se tonu.

18 “Kafai e tiaki ne se tino amiotonu a tena amiotonu kae fai a te mea ‵se, e ‵tau eiloa mo ia o mate ona ko tena mea ‵se tenā.+ 19 Kae kafai ko ‵fuli kea‵tea se tino amio masei mai i ana amioga ma‵sei kae fai a te mea tonu kae amiotonu, ka tumau eiloa a ia i te ola ona ko te faiga o te mea tenā.+

20 “Kae ko koe ne fai aka, ‘A te auala o Ieova e se tonu.’+ Ka fakamasino ne au a koutou taki tokotasi e ‵tusa eiloa mo otou amioga, e te kāiga o Isalaelu.”

21 Fakamuli ifo i te 12 o tausaga, i te sefulu o masina, i te lima o aso o te masina ne ave fakapagota ei matou, ne vau ki a au se tagata telā ne sao mai i Ielusalema+ kae fai mai: “A te fakai ko oti ne ofa ki lalo!”+

22 I te afiafi mai mua o te okomaiga o te tagata telā ne sao, ne oko mai ki luga i a au a te lima o Ieova, kae ne fakamaga ne ia toku gutu kae koi tuai o vau a te tagata tenā ki a au i te tafataeao. Tenā ne fakamaga ei toku gutu, kae ne toe mafai ei ne au o faipati.+

23 Tenā ne oko mai ei te fekau a Ieova ki a au, ana muna: 24 “Te tama a te tagata, a tino kolā e ‵nofo i koga konei ne fakamaseigina+ ne fai mai e uiga ki te fenua o Isalaelu, ‘A Apelaamo se tagata fua e tokotasi, kae ne puke mō ia te fenua.+ Kae ko tatou e tokouke; e mautinoa me ne tuku mai ki a tatou a te fenua ke fai mō tatou.’

25 “Tela la, fai atu ki a latou, ‘Konei a pati a te Aliki Sili ko Ieova ne fai mai: “A koutou e ‵kai ki meakai e isi ne toto i ei,+ kae e ‵kilo aka otou mata ki otou tupua fakatakalia‵lia, kae tumau eiloa koutou i te fakama‵ligiga o toto.+ Tela la, kaia e ‵tau ei o tuku atu ki a koutou a te fenua? 26 A koutou ne fakalago‵lago ki otou pelu,+ ne aofia koutou i faifaiga fakatakalia‵lia, kae ko koutou taki tokotasi ne fakalai‵lai ne koutou a avaga a otou tuakoi.+ Tela la, kaia e ‵tau ei o tuku atu ki a koutou a te fenua?”’+

27 “Konei a pati e ‵tau o fai atu ne koe ki a latou, ‘Konei a pati a te Aliki Sili ko Ieova ne fai mai: “E pelā eiloa mo au e ola, a latou kolā e ola i koga ne fakamaseigina ka ‵mate i te pelu; a latou kolā e ‵nofo i laukele ateatea, ka tuku atu ne au e pelā me ne meakai ki manu fe‵kai; kae ko latou kolā e ‵nofo i koga ne puipui faka‵lei mo ana ka ‵mate e auala i masaki.+ 28 Ka fai ne au te fenua ke masei valevale kae e se aoga,+ kae ko tena fia sili mo tena fakamatamata ka oko eiloa ki tena gataga, kae ko mauga o Isalaelu ka ma‵sei valevale,+ e aunoa mo se tino e mafai o ui atu i ei. 29 Kae ka iloa ei ne latou i a au ko Ieova māfai ko fai ne au te laukele ke masei valevale kae e se aoga+ ona ko mea fakatakalia‵lia katoa ne fai ne latou.”’+

30 “E pelā mo koe e te tama a te tagata, ou tino e fai‵pati i a latou eiloa e uiga ki a koe i tafa o ‵pui mo auala ki loto i fale.+ E fai atu te suā tino ki te suā tino, ko tino taki tokotasi ki olotou taina, ‘O‵mai, ke faka‵logo tatou ki te fekau mai i a Ieova.’ 31 Ka maopoopo fakatasi latou o saga‵saga i ou mua e pelā me ko toku fenua; kae ka faka‵logo latou ki au pati, kae ka se fai ne latou.+ Me mai i olotou gutu e tavae fakaloiloi ne latou a koe, kae e kaima‵nako olotou loto ke maua a mea i auala sē ‵tonu. 32 Kiloke! A koe e fai pelā me se pese fakafamau ki a latou, e usu i se leo gali kae tātā mo te atamai i luga i se mea fakatagitagi e isi ne uka i ei. Ka lagona ne latou au pati, kae seai se tino e fai ne ia a mea konā. 33 Kae kafai ko taunu a mea konā​—kae ka taunu eiloa​—ka iloa ei ne latou me ne isi se pelofeta ne ‵nofo mo latou.”+