Te Muamua Samuelu

26 Fakamuli ifo, ne olo atu a tāgata Sifo+ ki a Saulo i Kipea,+ kae fai atu: “E mata, a Tavita e se ‵muni i te tamā mauga o Hakila telā e saga ki Iesimoni?”*+ 2 Ne tu aka a Saulo kae fanaifo ki te koga lavaki o Sifo mo tāgata filifilia o Isalaelu e toko 3,000 o ‵sala a Tavita i te koga lavaki o Sifo.+ 3 Ne nofo a Saulo i te tamā mauga o Hakila telā e saga atu ki Iesimoni, i tafa o te auala. A Tavita i te taimi tenā e nofo i te koga lavaki, kae ne logo a ia me i a Saulo e fanatu o ‵sala a ia i te koga lavaki. 4 Tenā ne uga atu ei ne Tavita a sipai ke fakamautinoa aka me ko Saulo ne fanatu o ‵sala a ia io me ikai. 5 Fakamuli ifo, ne fanatu a Tavita ki te koga e nofo ei a Saulo, kae lavea ne Tavita a te koga e ‵moe i ei a Saulo mo Apinelu+ te tama tagata a Nelu, te takitaki kautau; kae ko Saulo e moe i te kogaloto o te lotou koga ‵nofo kae ko ana kautau e fakatamilo i a ia. 6 Tenā ne fai atu ei a Tavita ki a Aimeleka te tagata Heti+ mo Apisai+ te tama tagata a Seluia,+ te taina o Ioapo: “Ko oi e olo mo au ki te koga e nofo ei a Saulo?” Ne tali atu a Apisai: “Tāua e olo.” 7 Ne olo atu a Tavita mo Apisai ki te koga e ‵nofo ei te kautau i te po, kae lavea atu ne lāua a Saulo e moe i konā mo tena tao e ‵toki ki te laukele i tafa o tena ulu; a Apinelu mo te kautau e ‵moe fakatamilo i ana tafa.

8 Muna a Apisai ki a Tavita: “I te aso nei ko oti ne tuku atu ne te Atua a tou fili ki ou lima.+ Tela la, fakamolemole tuku mai ke velo fakatasi fua ne au a ia ki te tao ke ‵mau ki te laukele, e se ‵tau o velo fakalua ne au.” 9 Kae ne fai atu a Tavita ki a Apisai: “Sa fai ne koe se mea ki ei. Ko oi te tino e mafai o fakaoko ana lima ki te tino ne ‵tofi ne Ieova+ kae e se agasala i ei?”+ 10 Ne toe fai atu a Tavita: “E pelā eiloa mo Ieova e ola, ka tamate a ia ne Ieova,+ io me ka oko mai eiloa tena aso+ ka mate ei a ia, io me ka fanatu a ia ki te taua ko mate ei a ia.+ 11 E ‵tusa mo te kilokiloga a Ieova e se taitai eiloa o fakaoko ne au oku lima ki te tino ne tofi aka ne Ieova!+ Tela la, fakamolemole puke mai te tao tenā i tafa o tena ulu mo te tiā vai, ko olo ei tāua.” 12 Ne puke ne Tavita a te tao mo te tiā vai i tafa o te ulu o Saulo, olo ei lāua. E seai eiloa se tino ne lavea+ io me iloa ne ia te mea tenā io me ne ala aka, me ne ‵to katoa olotou ‵moe, me ne fai ne Ieova ke ‵moe pala‵pala latou. 13 Tenā ne fano ei a Tavita ki te suā feitu kae tu i te ulu o te mauga, kae e tai ‵mao eiloa te koga tenā mo latou.

14 Ne kalaga atu a Tavita ki te kautau mo Apinelu+ te tama a Nelu, ana muna: “Apinelu, e a, e se tali mai koe ki a au?” Ne tali atu a Apinelu: “Ko oi koe ke kalaga mai koe ki te tupu?” 15 Ne fai atu a Tavita ki a Apinelu: “E a, a koe na e sē se tagata? Ko oi te tagata e ‵pau mo koe i Isalaelu? Kaia e seki puipui faka‵lei ei ne koe a tou aliki, te tupu? E isi se sotia ne fanatu o tamate tou aliki, te tupu.+ 16 A te mea ne fai ne koe e se ‵lei. E pelā eiloa mo Ieova e ola, e ‵tau koe o tamate, me i a koe e seki puipui faka‵lei ne koe tou aliki, te tino ne tofi aka ne Ieova.+ Kilo aka ki ou tafa! Tefea te tao a te tupu mo te tiā vai+ i tafa o tena ulu?”

17 Tenā ne iloa ei ne Saulo a te leo o Tavita kae fai atu: “I o koe te leo tenei e taku tama ko Tavita?”+ Ne tali atu a Tavita: “Ko toku leo eiloa tenā, e toku aliki, te tupu.” 18 Ne toe fai atu a ia: “Kaia e afuli ei ne toku aliki a tena tavini,+ se a taku mea ne fai, kae se a taku agasala ne fai?+ 19 Toku aliki, te tupu, fakamolemole fakalogo mai ki pati a tau tavini: Kafai ko Ieova ne fakamalosi ne ia koe ke ‵teke mai ki a au, ke talia la ne ia taku taulaga meakai. Kae kafai ne fakamalosi aka koe ne tāgata,+ ko malaia eiloa latou i mua o Ieova, me ko oti ne afuli kea‵tea ne latou au i te aso nei ke se maua ne au te tofi mai i a Ieova,+ kae fai mai, ‘Fano o tavini ki nisi atua!’ 20 Kae nei la, ke mo a ma talia ne koe ke ‵sali oku toto ki te laukele i se koga e ‵mao mai i a Ieova, me i te tupu o Isalaelu ko oti ne fano o afuli se lago fua e tasi,+ e pelā eiloa me fano o afuli se manu eva i luga i mauga.”

21 I konā ne fai atu a Saulo: “Au ko agasala.+ Foki mai e taku tama ko Tavita, me ka se fai ne au se mea ki a koe, me ne fai ne koe toku ola e pelā me se mea tāua+ i te aso nei. Ao, ne fai ne au se mea valea kae e masei ‵ki taku mea ne fai.” 22 Ne tali atu a Tavita: “Tenei te tao a te tupu. Tuku mai se tamataene ke vau o puke atu. 23 Ko Ieova eiloa e taui atu ne ia te amiotonu+ mo te fakamaoni o tino taki tokotasi, me i te aso nei ne tuku mai koe ne Ieova ki oku lima, kae ko au e seki manako o fakaoko atu oku lima ki te tino ne tofi aka ne Ieova.+ 24 Kiloke! E pelā eiloa mo te tāua o tou ola ki a au i te aso nei, ke penā foki te tāua o toku ola i te kilokiloga a Ieova, kae ke fakasao ne ia au mai puapuaga katoa.”+ 25 Ne tali atu a Saulo ki a Tavita: “Ke manuia eiloa koe e taku tama ko Tavita. Ka fai ne koe a mea fakaofoofogia, kae ka manumalo eiloa koe.”+ Tenā ne fano ei kea‵tea a Tavita, kae toe foki atu a Saulo ki tena koga nofo.+