Tanielu

10 I te tolu tausaga o te pulega a te Tupu o Pelesia ko Kulesa,+ ne oko atu ei se fakaasiga ki a Tanielu, telā e fakaigoa ki a Peletisala;+ kae ko te fekau tenā e tonu, se fekau e uiga ki se kinauga lasi. Ne malamalama a ia i te fekau kae ne tuku atu ki a ia te malamalama e uiga ki ana mea ne lavea.

2 I aso konā, au, Tanielu, ne tagi fanoanoa+ i vaiaso kātoa e tolu. 3 Ne seki kai au ki meakai ‵gali, kae seai ne ‵kano o manu io me ne uaina ne ulu ki toku gutu, kae ne seki ‵mili ne au toku foitino ki sinu i vaiaso kātoa e tolu. 4 I te po 24 o te masina muamua, i te taimi ne nofo ei au i te kaugutu o te vaitafe lasi, ko te Taikelise,*+ 5 ne kilo aka au kae lavea ne au se tagata e pei ki gatu lino,+ kae e fakatamilo i tena taugasulu se fusi aulo mai Ufasa. 6 A tena foitino e pelā eiloa mo te kuate lanu ‵sega,+ ana foliga e ‵pau mo te uila, ana mata e pelā mo molisulu afi, ana lima mo ana vae e foliga pelā me ne kopa matilotilo,+ kae ko te ‵tagi o ana pati e pelā mo te ‵tagi o se vaitino e tokouke. 7 Ko au fua, Tanielu, ne lavea ne au te fakaasiga; e seki lavea ne tāgata kolā ne ‵nofo mo au a te fakaasiga.+ Kae ne oko atu ki a latou te mataku lasi, kae ne ‵tele kea‵tea latou o ‵muni.

8 Tenā ne nofo tokotasi ei au, kae i te laveaga ne au te fakaasiga sili tenei, ko seai eiloa se malosi e ‵toe i loto i a au kae ko oku foliga ‵malu ne ‵galo mai i a au kae ne seki ai eiloa se malosi o oku.+ 9 Tenā ne lagona ei ne au te leo o ia e faipati; kae i te lagonaga ne au a ia e faipati, ne tō fakavave taku moe mo oku mata e ‵fuli ki te laukele.+ 10 Kae ne fakapatele mai se lima ki a au,+ kae fakamalosi ne ia au ke tu ki luga i oku lima mo tulivae. 11 Tenā ne fai mai ei a ia ki a au, penei:

“Tanielu, te tagata tāua ‵ki,*+ saga tonu mai ki pati ka faipati atu ne au ki a koe. Tu i tou koga, me i a au ne uga mai ki a koe.”

I te faimaiga ne ia a pati konei ki a au, ne tu aka au mo te polepole.

12 Ne fai mai a ia ki a au: “Sa mataku,+ e Tanielu. Ko oti ne lagona atu au pati mai te aso muamua ne tuku atu ei tou loto ki te malamalama kae loto maulalo koe i mua o tou Atua, kae ko au ne vau ona ko au pati.+ 13 Kae ko te pelenise+ o te malo o Pelesia ne tu o ‵teke mai ki a au i aso e 21. Kae ko Mikaele,*+ se tokotasi o pelenise tāua, ne vau o fesoasoani mai ki a au; kae ne nofo au i konā i tafa o tupu o Pelesia. 14 Au ne vau o fai koe ke malamalama i te mea ka tupu ki tou fenua i te fakaotiotiga o aso fakaoti,+ me i te mea tenei se fakaasiga mō aso ka oko mai.”+

15 I te faipatimaiga ne ia a pati konei ki a au, ne ‵fuli oku mata ki te laukele kae e se mafai o faipati. 16 Kae ko te tino telā e foliga pelā me se tagata ne fakapatele mai ki oku laugutu,+ kae ne fakamaga toku gutu kae fai atu au ki te tino telā e tu i oku mua: “Toku aliki, au ko polepole i te mataku ona ko te fakaasiga, kae ko seai soku malosi.+ 17 Tela la, e mafai pefea o faipati atu te tavini a toku aliki ki toku aliki?+ Me nei la ko seai soku malosi, kae ko seai se mānava koi ‵toe i a au.”+

18 A te tino telā e foliga pelā me se tagata ne toe fakapatele mai ki a au kae fakamalosi ne ia au.+ 19 Tenā ne fai mai ei a ia: “Sa mataku,+ e te tagata tāua ‵ki.*+ Ke i luga i a koe te filemu.+ Fakamalosi, ao, fakamalosi.” I tena faipatimaiga ki a au, ne maua ne au te malosi kae fai atu au: “Ke faipati eiloa a toku aliki, me ne fakamalosi ne koe au.”

20 Ne fai mai a ia: “E iloa ne koe me kaia ne vau ei au ki a koe? Nei la, ka foki atu au o taua ki te pelenise o Pelesia.+ Kafai au ko fano, kae ka vau a te pelenise o Eleni. 21 Kae ka fai atu ne au ki a koe a mea ne fakamau i tusitusiga o te munatonu. E seai se tino e ‵lago malosi ne ia au i mea konei kae na ko te pelenise+ o koe ko Mikaele.+