Te Lua Tupu
13 I te 23 tausaga o te pulega a Ioasa+ te tama tagata a Aasaia+ te tupu o Iuta, ne fai a Ioasasa te tama tagata a Ieu+ mo fai te tupu o Isalaelu i Samalia, kae ne pule a ia i tausaga e 17. 2 Ne fai faeloa ne ia a mea ma‵sei i te kilokiloga a Ieova, kae ne tumau a ia i te faiga o te agasala a Ielopoamo te tama tagata a Nepata telā ne fai ei a Isalaelu ke agasala.+ Ne seki fuli kea‵tea a ia mai i ei. 3 Ne kaitaua malosi a Ieova+ ki tino Isalaelu,+ kae ne tuku atu ne ia latou ki lima o te tupu o Sulia ko Hasaeli+ mo lima o Peniata+ te tama tagata a Hasaeli i aso katoa o olotou olaga.
4 Fakamuli ifo, ne fakatagi atu a Ioasasa ke maua te taliaga a Ieova, kae ne fakalogo a Ieova ki a ia, me ne lavea ne ia a te pule fakasaua o te tupu o Sulia ki luga i Isalaelu.+ 5 Tenā ne tuku mai ei ne Ieova ki Isalaelu se fakaola+ ke fakasaoloto latou mai lima o Sulia, kae ne mafai ei o ‵nofo a tino Isalaelu i olotou fale e pelā mo taimi mua.* 6 (Kae ne seki tiaki ne latou a te agasala a te kāiga o Ielopoamo telā ne fai ne ia a Isalaelu ke agasala.+ Ne tumau latou i te agasala* tenā, kae ne tu eiloa a te pou lakau tapu*+ i Samalia.) 7 A te kautau a Ioasasa ne ‵toe mai e toko 50 tāgata faka‵tele solofanua, e 10 kaliota, kae 10,000 sotia sa‵sale, me ne fakaseai ne te tupu o Sulia a latou,+ kae lakalaka ki lalo e pelā mo pefu i te taimi e tuki ei saito.+
8 Kae ko te tala fakasolopito kātoa o Ioasasa, ana mea katoa ne fai mo tena malosi katoatoa, e a, e se tusi katoa i te tusi o tala fakasolopito i taimi o tupu o Isalaelu? 9 Tenā ne takato ifo ei a Ioasasa o malō‵lo fakatasi mo ana tupuga, kae ne tanu ne latou a ia i Samalia;+ kae ko tena tama tagata ko Ioasa ne fai mo tupu e sui ei a ia.
10 I te 37 tausaga o te pulega a te tupu o Iuta ko Ioasa, a Ioasa+ te tama tagata a Ioasasa ne fai mo tupu o Isalaelu i Samalia, kae ne pule a ia i tausaga e 16. 11 Ne fai faeloa ne ia a mea ma‵sei i te kilokiloga a Ieova, kae ne seki tiaki ne ia a agasala katoa a Ielopoamo te tama tagata a Nepata kolā ne fai ei ke agasala a Isalaelu.+ Ne tumau* a ia i te faiga o agasala konei.
12 Kae ko te tala fakasolopito kātoa o Ioasa, ana mea katoa ne fai mo tena malosi katoatoa mo te auala ne taua atu ei a ia ki te tupu o Iuta ko Amasia,+ e a, e se tusi katoa i te tusi o tala fakasolopito i taimi o tupu o Isalaelu? 13 Tenā ne takato ifo ei a Ioasa o malō‵lo fakatasi mo ana tupuga, kae ne sagasaga a Ielopoamo*+ i tena nofogaaliki. Ne tanu a Ioasa i Samalia fakatasi mo tupu o Isalaelu.+
14 I te taimi ne masaki ei a Elisaia+ i te masaki telā ne mate fakamuli a ia i ei, ne fanaifo a Ioasa te tupu o Isalaelu ki a ia kae tagi mautuutu ki a ia, ana muna: “Toku tamana, toku tamana! Te kaliota a Isalaelu mo ana tāgata faka‵tele solofanua!”+ 15 Tenā ne fai atu ei a Elisaia ki a ia: “Puke se kausana mo matasana.” Tenā ne puke ei ne ia se kausana mo matasana. 16 Ne fai atu a ia ki te tupu o Isalaelu: “Puke tou lima ki te kausana.” Tenā ne puke ei tena lima ki ei, kae na atu ne Elisaia ana lima mai luga i lima o te tupu. 17 Ne fai atu a ia: “‵Tala te famalama i te feitu ki saegala.” Tenā ne ‵tala ei ne ia. Ne fai atu a Elisaia: “Sana!” Tenā ne sana ei ne ia. Ne fai atu tou tagata: “Ko te matasana o te manumalo* o Ieova, te matasana o te manumalo i* Sulia! Ka ‵ta* ne koe a Sulia i Afeka+ ke oko ki te taimi ko oti ne fakaseai ei ne koe.”
18 Ne toe fai atu a ia: “Puke a matasana,” tenā ne puke ei ne ia. Ne fai atu a ia ki te tupu o Isalaelu: “‵Kini te laukele.” Ne ‵kini ne ia te laukele fakatolu taimi, tenā gata atu i ei. 19 Ne kaitaua te tagata o te Atua tonu ki a ia, ana muna: “Ne ‵tau o ‵kini ne koe fakalima io me fakaono taimi a te laukele! Tenā ko mafai ei ne koe o fakaseai katoatoa a Sulia, kae nei ka ta fua ne koe a Sulia fakatolu taimi.”+
20 Fakamuli ifo, ne mate a Elisaia kae ne tanu a ia. E isi ne potukau o tino kai‵soa o Moapi+ e o‵mai sāle ki loto i te fenua i te kamataga o te tausaga. 21 E isi ne tāgata ne tanu ne latou se tagata, ne lavea ne latou te potukau o tino kai‵soa, tenā ne ‵pei fakavave ei ne latou te tagata ki loto i te tanuga o Elisaia kae ‵tele kea‵tea. I te taimi eiloa ne patele ei a te tagata tenei ki ivi o Elisaia, ne toe ola tou tagata+ kae tu ki luga.
22 Kae ko te tupu o Sulia ko Hasaeli+ ne pule fakasaua atu ki Isalaelu+ i aso katoa o Ioasasa. 23 Kae ko Ieova ne talia ne ia latou kae fakamagalo latou+ kae fakaasi atu ne ia tena manavase mō latou ona ko tena feagaiga ne fai mo Apelaamo,+ Isaako+ mo Iakopo.+ Ne seki manako a ia ke fakaseai atu latou, kae ne seki ave kea‵tea ne ia latou mai i ana mua ke oko mai ki te aso nei. 24 I te taimi ne mate ei a te tupu o Sulia ko Hasaeli, ne fai a tena tama tagata ko Peniata mo fai te tupu e sui ei a ia. 25 Tenā ne toe puke mai ei ne Ioasa te tama tagata a Ioasasa mai i a Peniata te tama tagata a Hasaeli a fakai kolā ne puke ne ia mai tena tamana ko Ioasasa i te taua. E tolu taimi ne ta* ei ne Ioasa a ia,+ kae ne maua mai ei ne ia a fakai o Isalaelu.