Mika
6 Fakamolemole, faka‵logo mai ki pati a Ieova.
Tu ki luga, fai atu se tagi ki mua o mauga,
Kae ke lagona ne tamā mauga tou leo.+
2 Faka‵logo mai e mauga, ki te tagi a Ieova,
Mo koutou e fakavae ma‵losi o te lalolagi,+
Me e isi se tagi a Ieova ki ana tino;
Ka kinau atu a ia o ‵teke ki Isalaelu:+
3 “Toku fenua, ne a aku mea ne fai ki a koe?
Ne fakafi‵ta pefea ne au koe?+
Fai mai tau molimau ki a au.
4 Me ne aumai ne au koe ki tua mo te fenua o Aikupito,+
Ne fakasao ne au koe mai te koga ne nofo pologa ei koe;+
Ne uga atu ne au a Mose, Alona mo Miliama+ i ou mua.
5 Toku fenua, fakamolemole ke na masaua a te mea ne manako ki ei a te tupu o Moapi ko Palako,+
Mo te tali a Palaamo te tama tagata a Piolo ki a ia+
—Ko mea ne ‵tupu i Sitima+ ke oko ki Kilikala+—
Ko te mea ke iloa ne koe a faifaiga amio‵tonu a Ieova.”
6 Se a taku mea ka aumai ki ou mua e Ieova?
Se a taku mea ka aumai ke ifo ei au ki te Atua i luga?
E a, ka vau au ki ana mua mo taulaga ‵sunu kātoa,
Fakatasi mo pulumakau kolā ko takitasi tausaga te ma‵tua?+
7 E a, ka fiafia a Ieova ki te fia afe o mamoe,
Fakatasi mo te fia sefuluafe vaitafe o sinu?+
E a, ka tuku atu ne au taku toekimua tagata ona ko aku ‵tekeatuga,
Te fuataga o toku foitino ona ko taku agasala?+
8 Ne fai atu ne ia ki a koe a te mea ‵lei, e te tagata.
Kae se a te mea e manako ki ei a Ieova mai i a koe?
9 A te leo o Ieova e kalaga mai ki te fakai;
A latou kolā e isi se poto i ei ka ma‵taku ki tou igoa.
‵Saga tonu atu ki te tokotoko mo te tino ne fakasopo aka ne ia.+
10 E mata, koi isi ne koloa o te amio masei i te fale o tino amio ma‵sei
Mo te efa* sē kātoa telā e takitaki ‵se ei a tino?
11 E a, e mafai o ‵ma au i mea tau amioga māfai e fakaaoga a fua sē ‵tonu,
Fakatasi mo se taga o fatu fua mea ‵mafa sē ‵tonu?+
12 Me i ana tāgata mau‵mea e ‵fonu i fakasauaga,
Kae ko tino e ‵nofo i ei e fai‵pati ki te loi;+
Olotou alelo i olotou gutu e faka‵se tino.+
13 “Tela la, ka ta ne au koe ke pakia koe,+
Kae fakamasei koe ona ko au agasala.
14 A koe ka kai kae ka se makona;
Ka seai ne mea i tou tinae.+
A te mea e tapale ne koe, ka se puke ne koe mo te saogalemu,
Kae ko mea e puke ne koe, ka tuku atu ne au ki te pelu.
15 Ka ‵toki ne koe a fuaga, kae ka se tau ne koe.
Ka lakalaka ne koe a olive, kae ka se fakaaoga ne koe te sinu;
Kae ka fai ne koe a uaina ‵fou, kae ka se inu koe ki se uaina.+
16 Me i a koe ne tausi ki tulafono fakavae a Omeli mo galuega katoa a te kāiga o Aapo,+
Kae ne sasale koe e ‵tusa eiloa mo olotou pati fakatonutonu.