Kenese

21 Ne saga atu a Ieova ki a Sala e pelā eiloa mo ana pati ne fai, kae ne fai ne Ieova ki a Sala a te mea telā ne tauto a ia ki ei.+ 2 Ne faitama+ a Sala kae ne fanau ne ia se tamaliki tagata ma Apelaamo telā ko matua ‵ki, i te taimi eiloa telā ne folafola atu ne te Atua ki a ia.+ 3 Ne fakaigoa ne Apelaamo tena tamaliki tagata i a Sala ki a Isaako.+ 4 Kae ne pilitome ne Apelaamo a tena tamaliki tagata ko Isaako i te valu o aso, e pelā eiloa mo te fakatonuga a te Atua ki a ia.+ 5 Ko 100 tausaga o Apelaamo i te taimi ne fanau ei tena tamaliki tagata ko Isaako. 6 Tenā ne fai aka ei a Sala; “Ko fai ne te Atua se mea ke kata ei au: a tino katoa e ‵logo i te mea tenei ka ‵kata fakatasi mo au.”* 7 Kae ne toe fai atu tou fafine: “Ko oi ne mafai o fai atu ki a Apelaamo, ‘Ka puti aka ne Sala ne tama‵liki’? E tiga te feitu tenā, ko oti ne fanau ne au se tamaliki tagata ma ia i te taimi ko toeaina ei a ia.”

8 Ne tupu aka te tamaliki kae ne ‵vae kea‵tea mo te u, kae ne fakatoka ne Apelaamo se ‵kaiga lasi i te aso ne ‵vae kea‵tea ei a Isaako mo te ū. 9 Kae ne lavea faeloa ne Sala a te tamaliki a te fafine Aikupito ko Hakala,+ telā ne fai i a Apelaamo, e fakaitaita ne ia a Isaako.+ 10 Ne fai atu a ia ki a Apelaamo: “Afuli kea‵tea te pologa fafine tenei mo tena tamaliki, me i te tamaliki a te pologa fafine tenei e se mafai o fai mo sui fakatasi mo taku tama ko Isaako!”+ 11 Ko oko eiloa i te se fiafia o Apelaamo ki pati ne fai atu ne tou fafine e uiga ki tena tamaliki.+ 12 Tenā ne fai atu ei a te Atua ki a Apelaamo: “Sa ita ki pati a Sala konā e fai atu e uiga ki tau tamaliki tagata mo tau pologa fafine. Fakalogo ki a ia,* me i te tino telā ka taku ko tau tama* ka vau e auala i a Isaako.+ 13 Kae e pelā mo te tamaliki tagata a te pologa fafine,+ ka fai foki ne au ke māfua mai i a ia se atufenua,+ me i a ia ko tau tama.”*

14 Ne ala aka Apelaamo i te tafataeao ‵malu kae puke ne ia ne falaoa mo se fagu vai ne faite ki pa‵kili o manu kae tuku atu ki a Hakala. Ne tuku atu ne ia a mea konā ki te tuauma o tou fafine, kae uga atu ke olo mo tena tama.+ Ne tiaki ne tou fafine te koga tenā kae fano sāle i loto i te koga lavaki o Pelesepa.+ 15 Oti aka, ‵masa ei a vai i te fagu ne faite ki pa‵kili o manu kae ne tuku atu fua ne ia te tamaliki i lalo o se vao lakau. 16 Ne fanatu a ia o nofo i a ia eiloa, i se ‵mao telā e ‵pau mo te ‵mao o te matasana māfai e sana, me ne fai aka a ia: “Au e se manako ke lavea ne au te tamaliki māfai ko mate.” Ne sagasaga a ia ki lalo i se koga tai ‵mao kae kamata o tagi i se leo maluga kae tagi mautuutu.

17 Ne lagona ne te Atua a te leo o te tamaliki,+ kalaga atu ei a te agelu a te Atua mai te lagi ki a Hakala:+ “Se a te mea e tupu ki a koe, e Hakala? Sa mataku, me i te Atua ko oti ne lagona ne ia te leo o te tamaliki i te koga telā e nofo i ei. 18 Tu ki luga, sau te tamaliki kae puke ‵mau a ia i ou lima, me ka fai ne au a ia mo fai se atufenua lasi ‵ki.”+ 19 Tenā ne faka‵pula ei ne te Atua a mata o tou fafine kae ne matea ne ia se vaikeli, kae ne fano a ia o faka‵fonu ki vai a te fagu ne faite ki pa‵kili o manu kae tuku atu ki te tamaliki ke inu. 20 Kae ne fakatasi atu te Atua ki te tamaliki+ i te taimi ne tupu aka ei a ia. Ne nofo a ia i te koga lavaki kae ne fai a ia mo fai se tino e apo i te fakaaogaga o te kausana. 21 Ne nofo a ia i te koga lavaki o Palana,+ kae ne puke mai ne tena mātua se avaga ma tou tagata mai te fenua o Aikupito.

22 I te taimi tenā, ne fai atu a Apimeleko mo Pikolo te takitaki o tena kautau, ki a Apelaamo: “A te Atua e fakatasi atu faeloa ki a koe i mea katoa e fai ne koe.+ 23 Tela la, tauto mai nei ki a au i te igoa o te Atua me ka se fai ne koe se mea masei ki a au mo aku tama mo tino mai toku gafa, kae ka fakaasi mai ne koe ki a au mo tino katoa i te fenua tenā e nofo koe i ei a te alofa fakamaoni telā ne fakaasi atu ne au ki a koe.”+ 24 Ne fai atu a Apelaamo: “Ko tauto atu eiloa au e uiga ki te mea tenei.”

25 Kae ne fameo a Apelaamo ki a Apimeleko e uiga ki te vaikeli telā ne ‵fao mālō ne tavini a Apimeleko.+ 26 Ne tali atu a Apimeleko: “E se iloa ne au me ko oi ne fai ne ia te mea tenei; e seki fai mai ne koe ki a au e uiga ki ei, kae ne fatoa logo au i ei i te aso nei.” 27 Tenā ne ave ei ne Apelaamo a mamoe mo pulumakau ki a Apimeleko, kae ne fai ne lāua se feagaiga. 28 I te taimi ne ‵vae ei kea‵tea ne Apelaamo a tamā mamoe fāfine e fitu mai te lafu mamoe ke ‵tu i a latou eiloa, 29 ne fai atu a Apimeleko ki a Apelaamo: “Kaia ko ‵vae kea‵tea ei ne koe a mamoe fāfine e fitu konei?” 30 Tenā ne fai atu ei tou tagata: “Ke talia ne koe a mamoe fāfine e fitu konei mai i a au, ke fai mo molimau me ne keli ne au te vaikeli tenei.” 31 Tenā te pogai ne fakaigoa ei ne Apelaamo te koga tenā ki a Pelesepa,*+ me tenā te koga ne fai ei ne lāua tokolua se feagaiga. 32 Ne fai ne lāua se feagaiga+ i Pelesepa, oti aka ‵tu ei a Apimeleko mo Pikolo te takitaki o tena kautau, kae ‵foki atu ki te fenua o tino Filisitia.+ 33 Mai tua i konā, ne ‵toki ne ia te lakau ko te tamalisi i Pelesepa, kae kalaga atu a ia ki te igoa o Ieova,+ ko te Atua ki te se-gata-mai,+ i te koga tenā. 34 Kae ne nofo* atu Apelaamo i te fenua o tino Filisitia i se taimi leva ‵ki.*+