Levitiko

26 “‘E se ‵tau mo koutou o faite ne atua sē aoga mō koutou,+ kae e se ‵tau mo koutou o faite se tupua+ io me se pou fatu tapu mō koutou, kae e se ‵tau mo koutou o fakatu se fatu+ ne fakagaligali i te otou fenua ke ifo koutou ki ei;+ me i a au ko Ieova te otou Atua. 2 E ‵tau o tausi ne koutou aku sapati kae fakaasi atu te fakaaloalo ki* toku koga tapuaki. Au ko Ieova.

3 “‘Kafai e tumau koutou i te tau‵tali ki aku tulafono fakavae kae tausi aku fakatonuga kae faka‵logo ki ei,+ 4 ka faka‵to ifo ne au a vaiua ki a koutou i te taimi tonu,+ kae ka ‵fua mai ne te laukele ana fuataga,+ kae ko lakau o te laukele ka ‵fua mai i ei a fuagalakau. 5 A te taimi e tuki ei otou saito ka oko atu eiloa ki te taimi e tau ei otou fuagavine, kae ko te taimi e tau ei otou fuagavine ka oko atu eiloa ki te taimi e ‵toki i ei; kae ka ‵kai koutou ke ma‵kona i otou meakai kae ‵nofo mo te tokagamalie i te otou fenua.+ 6 Ka fai ne au ke filemu te fenua,+ kae ka ‵moe koutou e aunoa mo te ma‵taku ki se tino;+ ka afuli kea‵tea ne au a manu fakama‵taku o te vao mai te fenua, kae ka seai se pelu o te taua ka fanatu i loto i te otou fenua. 7 Ka afuli ne koutou otou fili, kae ka taka‵vale latou i otou mua i te pelu. 8 Ka afuli ne te tokolima o koutou a te toko 100, kae ka afuli ne te toko 100 o koutou a te toko 10,000, kae ka taka‵vale otou fili i otou mua i te pelu.+

9 “‘Ka saga atu au mo te fiafia ki a koutou kae fai ne au ke ‵fua malosi mai koutou kae fakatokouke foki koutou,+ kae ka tausi ne au taku feagaiga ne fai mo koutou.+ 10 I te taimi koi ‵kai ei koutou ki fuataga mua o te tausaga ko teka, ka manakogina ke ave kea‵tea ne koutou a mea mua ke avanoa se koga mo tuku a mea ‵fou. 11 Kae ka fakatu aka ne au toku faleie tapu i loto i a koutou,+ kae ka se ‵teke atu eiloa au ki a koutou. 12 Ka sasale au i loto i a koutou kae ka fai au mo otou Atua,+ kae ko koutou, ka fai koutou mo oku tino.+ 13 Au ko Ieova te otou Atua, telā ne aumai ne au koutou ki tua mo te fenua o Aikupito ko te mea ke mo a ma toe fai koutou mo olotou pologa, kae ne ‵fati ne au otou amo kae fai ke sa‵sale faka‵lei* koutou.

14 “‘Kae kafai e se faka‵logo koutou ki a au io me tausi a fakatonuga katoa konei,+ 15 kae kafai e ‵teke ne koutou aku tulafono fakavae,+ kae kafai e takalia‵lia koutou ki ikuga o aku fakamasinoga ko te mea ke se tausi ne koutou aku fakatonuga katoa, kae ofa ne koutou taku feagaiga,+ 16 ka fai eiloa ne au a mea konei ki a koutou: ka fakasala ne au koutou ki puapuaga, ki te māmā pala mo te fiva, kae fai ke se ‵kite otou mata, kae ke ma‵sei otou foitino. Ka ‵toki otou fuaga kae ka se aoga me ka kai fua ne otou fili.+ 17 Ka fulitua atu au ki a koutou, kae ka fakatakavale koutou ne otou fili;+ kae ko tino kolā e takalia‵lia ki a koutou ka lakalaka ne latou a koutou ki lalo,+ kae ka sona ‵tele fua koutou e aunoa mo se tino e afuli ne ia koutou.+

18 “‘Kafai foki e se fai ne te mea tenei ke faka‵logo mai koutou ki a au, ka fakaopoopo fakafitu taimi ne au te otou fakasalaga ona ko otou agasala. 19 Ka fakaseaoga ne au te otou fakamaualuga, kae ka fai ne au te otou lagi e pelā me se fiti,+ kae ko otou laukele e pelā me ne kopa. 20 Ka fakamāumāu ne koutou te otou malosi ki te seai, me ka seai ne otou fuataga e ‵fua mai i te laukele,+ kae ko lakau o te laukele ka seai ne fuagalakau e ‵fua mai i ei.

21 “‘Kae kafai e tumau koutou i te ‵teke mai ki a au kae ita ma faka‵logo mai ki a au, ko ‵tau ei o ‵kini ne au koutou fakafitu taimi, e ‵tusa mo otou agasala konā. 22 Ka uga atu ne au a manu o te vao ki a koutou,+ kae ka fai ne latou ke seai ne otou tama‵liki+ kae fakaseai otou manu ‵lata kae fakamu‵tana te otou aofaki, kae ko otou auala ka seai ne tino e oloolo i ei.+

23 “‘Kafai e se talia ne koutou aku pati fakatonutonu+ faitalia a mea katoa konei, kae tumau eiloa koutou i te ‵teke mai ki a au, 24 ka ‵teke atu foki au ki a koutou; kae ka ‵kini ne au koutou fakafitu taimi ona ko otou agasala. 25 Ka aumai ne au ki luga i a koutou se pelu ke taui atu ei te ofāga ne koutou a te feagaiga.+ Kafai e maopoopo koutou ki loto i otou fakai,+ ka aumai ne au a masaki ki a koutou, kae ka tuku atu koutou ki lima o otou fili.+ 26 Kafai ko fakamasei ne au te auala e maua ei otou falaoa,*+ ka tao ne fāfine e tokosefulu otou falaoa i loto i se ogaumu fua e tasi ko vaevae ei otou falaoa e ‵tusa mo te ‵mafa o falaoa konā;+ kae ka ‵kai koutou ki ei kae ka se ma‵kona koutou.+

27 “‘Kafai e se faka‵logo mai koutou ki a au faitalia te mea tenei, kae e tumau eiloa koutou i te ‵teke mai ki a au, 28 ka ‵teke malosi atu au ki a koutou,+ kae ka fakasala eiloa ne au a koutou fakafitu taimi ona ko otou agasala. 29 Tela la, ka ‵kai koutou ki foitino o otou tama tāgata, kae ka ‵kai koutou ki foitino o otou tama fāfine.+ 30 Ka fakaseai ne au otou koga ma‵luga kolā e tapu+ kae ofa ki lalo otou tulaga e ofo atu i ei a mea ma‵nogi, kae fakaputu otou foitino ‵mate i luga i foitino ‵mate o otou tupua fakatakalia‵lia;*+ kae ka fulitua atu au ki a koutou mo te takalialia.+ 31 Ka tuku atu ne au otou fakai ke lepe+ ki lalo, kae fakamasei atu otou faletapu, kae ka se ‵sogi ne au te manogi ‵gali o otou taulaga. 32 Ka fai ne au te otou fenua ke seai ne tino i ei,+ kae ko otou fili kolā e ‵nofo i loto i ei ka onoono atu mo te ofo ki ei.+ 33 Kae ka fai ne au koutou ke salalau atu i fenua katoa,+ kae ka tapale ne au te pelu kae tuku atu ke afuli ne ia koutou;+ kae ka seai ne tino i te otou fenua,+ kae ka maofa valevale otou fakai.

34 “‘I te taimi tenā ka toe ‵togi atu ne te laukele ana sapati i aso katoa kolā e seai ne tino i ei, i te taimi koi ‵nofo ei koutou i te fenua o otou fili. I te taimi tenā ka malōlō* te laukele, me e ‵tau o toe ‵togi atu ne ia ana sapati.+ 35 I aso katoa kolā e seai ne tino i ei, ka malōlō te laukele, me e seki malōlō eiloa i taimi o otou sapati i te otou ‵nofoga i ei.

36 “‘E pelā mo latou kolā ne ‵sao,+ ka fakavāivāi ne au olotou loto i fenua o olotou fili; kae ka ‵tele latou i te logoa o lau o lakau kolā e agi ne te matagi, kae ka ‵tele latou e pelā me se tino e tele kea‵tea mai te pelu kae ‵siga e aunoa mo se tino e afuli ne ia latou.+ 37 Ka fakatau ‵siga latou ki luga i a latou eiloa e pelā mo tino kolā e ‵tele kea‵tea mai te pelu, e tiga eiloa e seai se tino e afuli ne ia latou. Ka se mafai eiloa ne koutou o ‵teke otou fili.+ 38 Ka ‵mate koutou i fenua fakaa‵tea,+ kae ka ‵sunu koutou ne otou fili. 39 A tino o koutou kolā e ‵toe ka tuku eiloa ke ‵pala i fenua o otou fili+ ona ko otou mea ‵se. Ao, ka ‵pala eiloa latou ona ko mea ‵se a olotou tamana.+ 40 Tenā ko taku tonu mai ei ne latou te lotou mea ‵se+ mo te mea ‵se a olotou tamana mo te lotou sē fakamaoni, kae fakaasi ‵tonu mai me ne seki fakamaoni latou i te lotou ‵teke mai ki a au.+ 41 Ka ‵teke atu foki au ki a latou+ kae avatu latou ki te fenua o olotou fili.+

“‘E se taumate ka maua ne olotou loto kolā e seki pilitome* a te loto maulalo,+ ko ‵togi ei ne latou te lotou mea ‵se. 42 Kae ka masaua ne au taku feagaiga ne fai mo Iakopo,+ mo taku feagaiga ne fai mo Isaako,+ kae ka masaua ne au taku feagaiga ne fai mo Apelaamo,+ kae ka masaua ne au te laukele. 43 I te taimi e tiakina ei ne latou te laukele, ko toe ‵togi atu ne te laukele ana sapati+ kae tuku ke seai ne tino i ei, kae ko ‵togi ne latou olotou mea ‵se me ne ‵teke ne latou a ikuga o aku fakamasinoga kae ne takalia‵lia foki ki aku tulafono fakavae.+ 44 Kae e tiga eiloa a mea katoa konei, i te taimi e ‵nofo ei latou i te fenua o olotou fili, ka se ‵teke katoatoa+ ne au latou io me tuku tiaki atu latou ki te tulaga telā ka fakaseai katoatoa atu ei latou, me ka fakaseaoga i ei taku feagaiga+ mo latou, me i a au ko Ieova te lotou Atua. 45 Ona ko latou ka masaua ei ne au taku feagaiga ne fai mo olotou tupuga+ kolā ne aumai ne au ki tua mo te fenua o Aikupito kae lavea ne tino o fenua fakaa‵tea,+ ke fakamaoni atu ei i a au ko te lotou Atua. Au ko Ieova.’”

46 Konei a tulafono fo‵liki, ikuga o fakamasinoga, mo tulafono a Ieova ne fai i te va o ia mo tino Isalaelu i te Mauga o Sinai e auala i a Mose.+