Galuega a Apositolo

27 Ona ko te mea ko oti ne fakaiku aka ke fo‵lau atu matou ki Italia,+ ne tuku atu ne latou a Paulo mo nisi pagota ki te ofisa o te kautau e igoa ki a Iulio mai te potukau o te kautau a Aokuso. 2 Ne ‵sopo matou ki se vaka mai Atamutiu telā ko pili o ‵tala ki koga ‵sai vaka e ‵tu i te tafatai o te kogā fenua o Asia, fo‵lau atu ei matou; ne olo fakatasi matou mo Alitako,+ se tino Maketonia mai i Tesalonia. 3 Ne oko atu matou ki Saitonu i te suā aso, kae ne atafai eiloa a Iulio ki a Paulo kae talia ne ia ke fano ki ana taugasoa ko te mea ke fia‵fia fakatasi latou.

4 Ne tiakina ne matou te koga tenā kae fo‵lau atu i te feitu ki lalo o Kupelu me i te matagi ko ‵pono tonu mai i omotou mua. 5 Tenā ne tele atu ei te motou vaka i te vasa o Kilikia mo Pafulia kae ne tau matou i te koga ‵sai vaka i Mula i Lukia. 6 Ne maua ne te ofisa o te kautau i konā se vaka mai i Alesania telā ka ‵tala atu ki Italia, kae fai mai ke ‵sopo matou i ei. 7 Ne teletele malie te motou vaka i aso e tai uke kae ne faigata ke oko atu matou ki Nitoi. Ona ko te matagi ko tu ‵tonu mai eiloa i omotou mua, ne fo‵lau atu ei matou i te feitu ki lalo o Keleta i Salamone. 8 Kae ne tele fakapilipili atu matou ki uta i te fenua mo te faigata kae oko atu ki te koga e igoa ki te Taulaga Malu, i tafa o te fakai ko Lasea.

9 Ne ‵teka atu a aso e uke kae ko faigata foki te folau ona ko te mea ko ‵seke foki te taimi e fakaliki‵liki ei i te Aso o te Faka‵māga,+ tenā ne fai atu ei te manatu o Paulo 10 ki a latou: “Oku tāgata, e iloa ne au me ka lasi ‵ki te fakamaseiga i te malaga tenei, e se gata fua ki kako mo te vaka kae e pelā foki mo ‵tou ola.” 11 E ui i ei, ne fakalogo eiloa te ofisa o te kautau ki te kapeni mo te tino i o ia te vaka i lō pati a Paulo. 12 Ona ko te sē ‵lei o te koga e ‵tau i ei a vaka i te taimi o te tau ‵moko, ne fai ei te tokoukega o latou ke ‵tala te vaka mai konā ko te mea ke oko atu latou ki Foinia i te taimi o te tau ‵moko, se koga e ‵tau i ei a vaka i Keleta telā e fakasaga atu tena feitu e tasi ki mātū-saegala kae tasi ki saute-saegala.

13 I te taimi ne agi malielie ei te matagi mai saute, ne mafau‵fau latou me ka fakataunu eiloa te lotou fakamoemoega kae ne ‵futi aka te lotou taula kae kamata o folau atu latou i gatai o Keleta. 14 Ne seki leva kae poko mo te kaumatagi e igoa ki a Eulokuto* ki te lotou vaka. 15 Ne peipei valevale te vaka ne te matagi kae ko se mafai o saga tena taumua ki te matagi, telā fakatapea ei te vaka kae tuku ke ave ne te matagi. 16 Tenā ne tele atu ei matou i gatai o te tamā fenua e igoa ki a Kauta o fakamalu i ei, kae ne faigata o avaka ne matou a te tamā pōti i te taumuli o te vaka. 17 Kae i te otiga ne avaka te pōti ki luga ne saisai ei ne latou ke ‵mau ki lalo a te pōti; kae ona ko te lotou ma‵taku i te mea ma kasa te vaka i Silitusi,* ne tuku ifo ne latou a lōpu mo nisi mea faigaluega, tuku ei ke tapea te vaka. 18 Ona ko matou ko peipei valevale ne te kaumatagi, ne kamata o laku ne latou a mea ki te tai ke tai māmā te vaka i te aso mai tua ifo. 19 Kae i te tolu o aso, ne ‵pei ne latou a nisi lōpu o te vaka ki te tai.

20 I te taimi ne seki ‵kasa ei te la io me ‵sae mai a fetū i aso e uke kae ko logofiofio matou i te kaumatagi, ne ‵galo atu ei omotou fakamoemoega katoa ke ‵sao matou. 21 Mai tua o se taimi leva ne seki ai ei ne olotou meakai, ne tu aka a Paulo i mua o latou kae fai atu: “Oku tāgata, ne ‵tau o talia ne koutou toku manatu ke se tiakina ne tatou a Keleta, penei e seai se mea e fakamasei kae māumāu.+ 22 E tiga te feitu tenā, e fakamalosi atu au ki a koutou ke loto ‵toa, me e seai se tino i a koutou ka mate, ko te vaka fua ka fakamaseigina. 23 Me ne tu mai i oku tafa i te po a te agelu+ a te Atua telā e tapuaki au ki ei kae e tavini foki au ki ei, 24 kae fai mai, ‘Sa mataku e Paulo. E ‵tau mo koe o tu atu i mua o Kaisala,+ kae kiloke! ko oti ne tuku atu ne te Atua ki a koe a tino katoa kolā e fo‵lau fakatasi mo koe.’ 25 Tela la, ke loto ‵toa e oku tāgata, i a au e talitonu i te Atua ka fakataunu eiloa ne ia a te mea ko oti ne fai mai ki a au. 26 Kae e ‵tau eiloa mo tatou o ake aka i se fenua.”+

27 I te okoga ki te 14 o po kae ne peipei valevale matou i te Tai o Atelia, ne kamata o iloa ne kauvaka i te valuapo me ko pili latou ki se fenua. 28 Ne fua ne latou te ‵poko kae maua aka ne latou e 20 gafa;* ne tai momea atu latou kae toe fua foki ne latou te ‵poko kae maua aka me ko 15 gafa.* 29 Kae ona ko te ma‵taku i a matou ma kasa ki luga i kaupapa, ne ‵pei ifo ne latou a taula e fa i te taumuli o te vaka, kae olioli ke na ao. 30 Kae i te taimi ne taumafai ei a kauvaka ke ‵tele latou kea‵tea mai te vaka, ne tuku ifo ne latou te pōti o te vaka ke fai aka pelā i a latou e olo o ‵pei ifo a taula i te taumua, 31 ne fai atu a Paulo ki te ofisa o te kautau mo sotia: “E se mafai koutou o ‵sao seiloga ke ‵nofo a tāgata konei i luga i te vaka.”+ 32 Tenā ne ‵kati ei ne sotia a lōpu o te tamā pōti kae tiaki atu ke tapea.

33 Ko pili o ao, ne fakamalosi atu a Paulo ki tino katoa ke ‵kai, ana muna: “A te aso tenei ko te 14 o aso ne ‵nofo fakatali‵tali ei koutou mo te manava‵se, kae ne seki ‵kai eiloa koutou. 34 Tela la, e fakamalosi atu au ke ‵kai koutou; me e tāua te mea tenei mō te otou ‵lei; me ka seai eiloa se laulu e tasi i otou ulu ka tō kea‵tea.” 35 I te otiga o ana pati konā, ne puke foki a ia ki se falaoa, fai te fakafetai ki te Atua i mua o latou katoa, tofitofi kae kamata o ‵kai. 36 Ne loto ‵toa katoa latou kae kamata o ‵kai. 37 E ‵tusa mo te toko 276 a matou katoa i luga i te vaka. 38 I te otiga ne ‵kai kae ma‵kona latou, ne laku ne latou a saito ki te tai ke tai māmā te vaka.+

39 I te taeaoakaga, ne seki iloa ne latou te igoa o te fenua+ tenā kae ne lavea ne latou a te pikoga o te fenua mo tena tafatai, kae ne taumafai malosi latou ke fakakasa te vaka ki uta i konā. 40 Tela la, ne ‵kati ne latou a taula ke ‵to ki te tai, ne ‵tala ne latou a lōpu ne ‵sai ei a foe; kae i te otiga ne sisi ne latou a te la ko te mea ke agi ne te matagi, tele atu ei latou ki te tafatai. 41 Ne tele ‵tonu atu te vaka ki te kauone, kasa ei tena taumua ko te mea eiloa ko se gasue, kae ne kamata o malepelepe tena taumuli ne peipei ne galu.+ 42 I konā ne fakaiku aka ne sotia ke tamate a pagota ko te mea ke seai se tino i a latou e ‵kau kea‵tea ke sao a ia. 43 Kae ne fakaiku aka ne te ofisa o te kautau ke fakasao a Paulo, taofi ei ne ia ke mo a ma fai ne latou a te lotou aofaga. Ne fakatonu atu a ia ki tino kolā e mafai o ‵kau ke eva ki te tai kae ke mua o ‵kau ki uta i te fenua, 44 kae ko te ‵toega o tino ne ‵piki ki laupapa mo nisi mea o te vaka kae ‵kau atu ki uta. Tela la, ne ‵sao eiloa a latou katoa ki uta i te fenua.+