Sakalia
1 I te valu o masina i te lua tausaga o te pulega a Taliu,+ ne oko mai te fekau a Ieova ki te pelofeta ko Sakalia*+ te tama tagata a Pelekia te tama tagata a Ito, ana muna: 2 “A Ieova ne kaitaua malosi ki otou tupuga.+
3 “Fai atu ki a latou, ‘Konei a pati a Ieova o kautau ne fai mai: “‘‵Foki mai ki a au,’ ko te folafolaga a Ieova o kautau, ‘kae ka toe foki atu au ki a koutou,’+ ko muna a Ieova o kautau.”’
4 “‘Sa fai pelā mo otou tupuga, kolā ne folafola atu ki ei a pelofeta i aso mua: “Konei a pati a Ieova o kautau ne fai mai, ‘Fakamolemole, ‵fuli kea‵tea mai i otou amioga matagā mo otou faifaiga matagā.’”’+
“‘Kae ne seki faka‵logo latou, kae seki ‵saga mai ki a au,’+ ko te folafolaga a Ieova.
5 “‘Kofea nei otou tupuga? Kae e mata, ne ola a pelofeta ki te se-gata-mai? 6 Kae e pelā eiloa mo aku muna mo aku tulafono kolā ne fakatonu atu ne au ki aku tavini ko pelofeta, e a, ne seki lavea ne otou tupuga a te lotou fakataunuga?’+ Tenā ne toe ‵foki mai ei latou ki a au kae fai mai: ‘A Ieova o kautau ne saga mai ki a matou e ‵tusa eiloa mo omotou auala mo omotou faifaiga, e pelā eiloa mo te mea ne mafaufau a ia o fai.’”+
7 I te po 24 o te 11 o masina, telā ko te masina o Sepata,* i te lua o tausaga o te pulega a Taliu,+ ne oko mai te fekau a Ieova ki te pelofeta ko Sakalia te tama tagata a Pelekia te tama tagata a Ito, ana muna: 8 “Ne lavea ne au se fakaasiga i te po. E isi se tagata e tele i luga i se solofanua lanu kula, kae ne tu a ia i te va o lakau ko metolo i te vanu; kae i ana tua ko solofanua lanu kula, lanu kulakula mo te lanu ‵kena.”
9 Tenā ne fai atu ei au: “Ko oi a latou konei, e toku aliki?”
Ne tali mai a te agelu telā ne fai‵pati mo au: “Ka fakaasi atu ne au ki a koe me ko oi a latou konei.”
10 Tenā ne fai mai ei a te tagata telā ne tu i te va o lakau ko metolo, ana muna: “Konei a tino ne uga mai ne Ieova ke sa‵sale i luga i te lalolagi.” 11 Kae ne fai atu latou ki te agelu a Ieova telā e tu i te va o lakau ko metolo: “A matou ne sa‵sale i luga i te lalolagi, kae kiloke! a te lalolagi kātoa e se logoa kae seai ne fakalavelave i ei.”+
12 Tenā ne fai atu ei a te agelu a Ieova: “Ieova o kautau, ka pefea te leva e taofi ei ne koe tou alofa fakamagalo mai i Ielusalema mo fakai o Iuta,+ kolā ne kaitaua malosi koe ki ei i tausaga e 70 konei?”+
13 Ne tali atu a Ieova ki te agelu telā ne fai‵pati mo au, i pati atafai kae fakamafanafana. 14 Tenā ne fai mai ei te agelu telā ne fai‵pati mo au: “Kalaga atu, ‘Konei a pati a Ieova o kautau ne fai mai: “Au e loto finafinau ona ko Ielusalema kae sili atu toku loto finafinau ona ko Siona.+ 15 Mai te lasi o toku kaitaua e kaitaua malosi au ki atufenua kolā e ‵nofo filemu,+ me ne foliki fua toku kaitaua,+ kae ne fakaopoopo ne latou te lotou fakalavelave.”’+
16 “Tela la, konei a pati a Ieova ne fai mai: ‘“Au ka foki ki Ielusalema mo te alofa fakamagalo,+ kae ka faite aka toku fale i loto i konā,”+ ko te folafolaga a Ieova o kautau, “kae ka ‵futi aka i loto i Ielusalema kātoa se uka e fua i ei a mea.”’+
17 “Toe kalaga atu kae fai atu, ‘Konei a pati a Ieova o kautau ne fai mai: “Ka toe ‵fonu maligiligi oku fakai i te aga‵lei; kae ka toe fakamafanafana ne Ieova a Siona+ kae ka toe filifili aka a Ielusalema.”’”+
18 Tenā ne kilo aka au, lavea ei ne au a sau e fa.+ 19 Ne fesili atu au ki te agelu telā ne fai‵pati mo au: “Ne a mea konei?” Ne tali mai a ia: “A mea konei ko sau kolā ne fai ei ke salalau valevale a Iuta,+ Isalaelu+ mo Ielusalema.”+
20 Tenā ne fakaasi mai ei ne Ieova a tufuga faite mea e tokofa. 21 Ne fesili atu au: “Ne a mea a tino konei e o‵mai o fai?”
Ana muna: “A mea konei ko sau kolā ne fai ei ke salalau valevale a Iuta ki te tulaga telā ko seai se tino e mafai o sau aka ne ia tena ulu. A nisi tino konei ka o‵mai o fakamatakutaku latou, o ofa ki lalo a sau o fenua kolā ne sisi aka olotou sau o ‵teke atu te fenua o Iuta, ko te mea ke salalau valevale a ia.”