Te Tusi a Luka
9 Tenā ne ‵luku mai ei ne ia te toko Sefululua kae tuku atu ki a latou te ‵mana mo te pule i luga i temoni+ katoa kae ke faka‵lei a masaki.+ 2 Kae uga atu ne ia a latou ke olo o talai a te Malo o te Atua kae faka‵lei a masaki, 3 kae fai atu ki a latou: “Ke seai se mea e ave i te malaga, se tokotoko io me se taga meakai, io me ne falaoa io me ne tupe;* io me ne gatu e lua.*+ 4 I so se fale e ulu koutou ki ei, ‵nofo i konā ke oko ki te taimi e tiaki ei ne koutou.+ 5 Kae ko so se koga e se talia ei koutou ne tino, kafai e olo koutou kea‵tea mo te fakai tenā, tuetue atu la a ‵pefu i otou vae ke fai mo molimau ki a latou.”+ 6 Olo ei latou i loto i te fenua kātoa mai i fakai fo‵liki ki nisi fakai fo‵liki, o folafola atu te tala ‵lei kae faka‵lei a masaki i koga katoa.+
7 Ne logo a Helota,* te pule o te kogā fenua tenā, i mea katoa kolā ne ‵tupu, kae ne ‵numi malosi tou tagata ona ko te mea e fai mai a nisi tino me ko oti ne toe fakatu aka a Ioane mai te mate,+ 8 kae e fai mai a nisi tino me ko Elia telā ko oti ne sae mai, kae ko nisi tino e fai mai me ko oti ne tu aka se pelofeta mai aso mua.+ 9 Muna a Helota: “Ne ‵kati ne au te ua o Ioane.+ Ko oi la te tino tenei e logo atu au me e fai ne ia a mea konei?” Tenā ne taumafai ei a ia ke lavea ne ia a te tino tenā.+
10 I te taimi ne ‵foki mai ei a apositolo, ne fakamatala atu ne latou ki a Iesu a mea katoa ne fai ne latou.+ Ne puke ne ia a latou kae olo atu i a latou eiloa ki te fakai e igoa ki a Petesaita.+ 11 Kae i te iloaga ne te vaitino, tau‵tali atu ei i a ia. Ne talia ne ia latou mo te atafai kae kamata o faipati atu ki a latou e uiga ki te Malo o te Atua, kae faka‵lei ne ia a tino kolā ne ma‵nako ki se faka‵leiga.+ 12 Ko pili ki te afiafi kae ne olo atu te toko Sefululua kae fai atu ki a ia: “Uga atu te vaitino ke olo ki fakai mo koga tai ‵pili mai ko te mea ke maua se koga mo olotou malō‵lo mo ne meakai ma latou, me i a tatou nei e ‵nofo atu i se koga ‵mao ‵ki.”+ 13 Kae ne fai atu a ia ki a latou: “Tuku atu ne koutou ne meakai ke ‵kai ei latou.”+ Olotou muna: “E seai ne omotou mea, kae na ko falaoa e lima mo ika e lua, seiloga ke olo atu matou o ‵togi mai ne meakai ma tino katoa konei.” 14 Kāti e nofo ki se toko 5,000 tāgata te lotou aofaki. Kae ne fai atu a ia ki ana soko: “Fai ke saga‵saga latou i potukau e taki 50.” 15 Ne fai eiloa penā ne latou kae ne saga‵saga ei latou katoa ki lalo. 16 Ne puke ne ia a falaoa e lima mo ika e lua, kilo aka ki te lagi kae fai te fakafetai. Tenā ne tofitofi ei ne ia kae kamata o tuku atu ki ana soko ke tufa atu ki te vaitino. 17 Tenā ne ‵kai ei a latou katoa kae ma‵kona, kae ko toegā meakai kolā ne fakaputu aka ne faka‵fonu ki ei a tapola e 12.+
18 Fakamuli ifo, i te taimi ne ‵talo tokotasi ei a ia, ne olo atu ana soko, kae ne fesili atu a ia ki a latou, ana muna: “Ne a muna a te vaitino me ko oi au?”+ 19 Ne tali atu latou, olotou muna: “Ko Ioane te Papatiso, kae ko nisi tino e fai mai me ko Elia, kae e fai mai foki a nisi tino me se tino e tokotasi o te kau pelofeta i aso mua telā ko oti ne fakatu aka.”+ 20 Ne fai atu ei a ia ki a latou: “Kae ko koutou la, se a te otou faka‵tau, ko oi au?” Ne tali atu a Petelu: “A koe ko te Keliso a te Atua.”+ 21 Tenā ne fai atu ei ne ia se fakatonuga ‵mafa ke mo a ma fakaasi atu ne latou te mea tenā ki se isi tino,+ 22 kae fai atu: “E ‵tau o logo‵mae a te Tama a te tagata i mea e uke kae ka ‵teke atu ki a ia a toeaina mo faitaulaga pule mo failautusi, kae ka tamate a ia,+ kae i te tolu o aso ka toe fakatu aka ei a ia.”+
23 Ne fai atu a ia ki a latou katoa: “So se tino e fia tautali mai i a au, ke se toe mafaufau ki a ia eiloa,+ kae ke amo tena pou fakasaua* i aso takitasi kae tumau i te tautali mai i a au.+ 24 Me ko so se tino e manako o fakasao tena ola ka se maua ne ia, kae ko so se tino e galo tena ola ona ko au e toe maua ne ia.+ 25 Kae se a te mea ‵lei ka maua ne se tagata māfai e maua ne ia te lalolagi kātoa kae galo atu tena ola io me ko ana mea katoa?+ 26 Me ko so se tino e mā i a au mo aku pati, ka mā foki a te Tama a te tagata i te tino tenā i te taimi e vau ei a ia i tena ‵malu mo te ‵malu o tena Tamana mo ana agelu tapu.+ 27 Kae e fai ‵tonu atu au ki a koutou, e isi ne tino e ‵tu mai i konei ka se ‵mate* seiloga ke lavea muamua ne latou te Malo o te Atua.”+
28 E tonu, kāti ko te valu o aso mai tua o te faiatuga o pati konei, puke ei ne ia a Petelu, Ioane mo Iakopo kae ‵kake aka ki luga i te mauga o ‵talo.+ 29 Kae koi ‵talo a ia, ne ‵fuli a foliga o ana mata kae ne malapu‵lapu mai ana gatu ‵kena. 30 Kae kiloke! e tokolua a tāgata e sau‵tala fakatasi mo ia, ko Mose mo Elia. 31 Ne ‵sae aka a lāua konei mo te ‵malu kae ne kamata o sau‵tala latou e uiga ki te taimi ka tiaki ei ne ia te lalolagi, telā ko pili o fakataunu ne ia i Ielusalema.+ 32 Ne ‵moe pala‵pala a Petelu mo ana taugasoa, kae i te taimi ne ala faka‵lei aka ei, lavea ei ne latou tena ‵malu+ mo te tokolua tāgata e ‵tu i ana tafa. 33 Kae i te taimi ko olo ei kea‵tea a te tokolua konā mai i a ia, fai atu ei a Petelu ki a Iesu: “Te Faiakoga, ko ‵lei aka eiloa ke ‵nofo matou i konei. Tela la, ka faka‵tu ne matou a faleie e tolu, e tasi mō koe, e tasi mō Mose, kae e tasi mō Elia.” Kae e seki iloa ne ia ana pati kolā ne fai atu. 34 Kae koi faipati atu a ia e uiga ki mea konei, ne fakatu aka se kaumana kae kamata o ufi i luga i a latou. I te taimi ne ulu atu ei latou ki loto i te kaumana, ne ma‵taku ei latou. 35 Ne faipati mai se leo+ i loto i te kaumana, penei: “Tenei eiloa taku Tama, ko ia telā ko oti ne filifili aka.+ Faka‵logo ki a ia.”+ 36 I te taimi ne faipati mai ei te leo, kae ko Iesu ko nofo tokotasi fua. Ne seki fai‵pati latou kae ne seki fakamatala atu foki ne latou ki se isi tino i aso konā a mea kolā ne lavea ne latou.+
37 I te aso mai tua, i te taimi ne olo ifo ei latou mai te mauga, ne fakafetaui atu ki a ia se vaitino.+ 38 Kae kiloke! ne kalaga mai se tagata mai te vaitino, ana muna: “Te Faiakoga, au e fakamolemole atu ke onoono aka koe ki taku tamaliki tagata, me ko ia aka eiloa taku tama e tokotasi.+ 39 Kae kiloke! ko pukea a ia ne se agaga masei, kae se mea vave loa o pakalaga, kae fai ne ia ke pole malosi mo kapiaga e ‵sali mai i tena gutu, kae faigata o fano kea‵tea mai i a ia seiloga ko oti ne fakapakia ne ia tou tagata. 40 Ne fakamolemole au ki ou soko ke afuli aka te agaga tenā kea‵tea kae ne seki mafai ne latou.” 41 Ne tali atu a Iesu, ana muna: “Te kautama sē fakatuanaki kae fai mea piko‵piko+ tenei, ka pefea te leva e fesoasoani kae fa‵ki ei au i a koutou? Aumai tau tama ki konei.”+ 42 Kae i te taimi ne fanatu ei te tamaliki, ne ‵pei a ia ne te temoni ki lalo kae fai ne ia ke fitifiti valevale. Kae ne ‵liko ne Iesu te agaga masei kae faka‵lei a te tamaliki, tuku atu ei ne ia ki tena tamana. 43 Ne ofo a tino katoa i te ‵mana o te Atua.
I te taimi koi ofo ei a tino katoa i mea katoa kolā ne fai ne ia, fai atu ei a ia ki ana soko: 44 “Fakalogo‵logo faka‵lei mai kae masaua a pati konei, me i te Tama a te tagata ka tuku atu ki lima o tāgata faitogafiti.”+ 45 Kae ne seki malamalama latou i ana pati ne fai. E tonu, ne ‵funa aka eiloa a mea konā mai i a latou ko te mea ke se malamalama latou i ei, kae ne ma‵taku latou ma fesili atu ki a ia e uiga ki pati konei.
46 Tenā ne kinau ei latou me ko oi te ‵toe tino sili i a latou.+ 47 Ne iloa ne Iesu olotou mafaufauga, puke mai ei ne ia se tamaliki foliki, fakatu i ana tafa, 48 kae fai atu ki a latou: “So se tino e talia ne ia te tamaliki tenei ona ko toku igoa, e talia foki ne ia au, kae ko so se tino e talia ne ia au, e talia foki ne ia a te Atua telā ne uga mai ne ia au.+ Me ko te tino e fai ne ia a ia e pelā me se tino sē taulia i a koutou katoa, ko ia tenā e tafasili i te maluga.”+
49 Ne tali atu a Ioane: “Te Faiakoga, ne lavea ne matou se tagata e afuli ne ia a temoni mai te fakaaogaga o tou igoa, kae ne taumafai matou o taofi a ia, me i a ia e se tautali mai i a matou.”+ 50 Kae ne fai atu a Iesu ki a ia: “Sa taumafai koutou o taofi a ia, me ko so se tino telā e se ‵teke ki a koutou e kau mo koutou.”
51 I te taimi ko pili ei o fanaka a ia ki te lagi,+ ne malosi eiloa tena loto ke fanatu a ia ki Ielusalema. 52 Ne uga atu ne ia a avefekau ke ‵mua atu i a ia. Kae ne olo atu latou ki se fakai foliki o tino Samalia, o fai a fakatokatokaga mō ia i ei. 53 Kae ne seki talia ne latou a ia+ me ko oti ne fakaiku aka ne ia ke fanatu a ia ki Ielusalema. 54 I te laveaga ne te avā soko, ko Iakopo mo Ioane+ a te mea tenei, fai atu ei lāua: “Te Aliki, e manako koe ke ka‵laga māua ke tō mai te afi mai te lagi o fakaseai atu latou?”+ 55 Ne mafuli aka tou tagata kae ‵liko atu ki a lāua. 56 Olo atu ei latou ki se isi fakai foliki.
57 Kae koi olo atu latou i te auala ne fai atu se tino ki a ia: “Au ka tautali atu i a koe i so se koga e fano koe ki ei.” 58 Kae ne fai atu a Iesu ki a ia: “E isi ne lua o alope, kae ko manu eva o te lagi e isi ne olotou ofaga, kae ko te Tama a te tagata e seai se koga mo ana moe.”+ 59 Ne fai atu tou tagata ki te suā tino: “Vau o tautali mai i a au.” Muna a te tagata tenā: “Te Aliki, talia mai ke fano mua au o tanu toku tamana.”+ 60 Kae ne fai atu a Iesu ki a ia: “Tuku ei a tino ‵mate+ ke tanu olotou tino ‵mate, kae fano koe o folafola atu te tala ‵lei e uiga ki te Malo o te Atua ki koga katoa.”+ 61 Ne toe fai atu te suā tino: “Ka tautali atu au i a koe, e te Aliki, kae talia mai ke fakatofa muamua au ki tino o toku kāiga.” 62 Muna a Iesu ki a ia: “E seai se tino e puke tena lima ki se mea fakamalū laukele, kae toe kilo ki mea i ana tua+ e aoga mō te Malo o te Atua.”+