Esekielu

24 Ne toe oko mai te fekau a Ieova ki a au i te iva o tausaga, i te sefulu o masina, i te po sefulu o te masina, ana muna: 2 “Te tama a te tagata, fakamau ki lalo te po masina tenei, ko te aso eiloa tenei. A te tupu o Papelonia ko oti ne kamata o taua atu ki Ielusalema i te aso eiloa tenei.+ 3 Kae fai atu se faigamuna e uiga ki te kāiga ‵teke, kae fai atu e uiga ki a latou:

“‘Konei a pati a te Aliki Sili ko Ieova ne fai mai:

“Fakatu se ulo ‵tunu meakai; fakatu ki luga i te afi kae ‵ligi atu ne vai ki loto i ei.+

 5 Puke te ‵toe mamoe ‵lei mai i te lafu,+ kae fakaputu aka a lakau e fakatamilo mai i lalo o te ulo.

Saka a ivi, kae ‵tunu atu a ivi i loto i ei.”’”

6 “Tela la, konei a pati a te Aliki Sili ko Ieova ne fai mai:

‘Kalofa eiloa i te fakai fakamaligi toto,+ ko te ulo ‵tunu meakai ‵popo, telā e seki kana kea‵tea a mea ‵popo i ei!

Tapale a mea takitasi ki tua;+ kae ke mo a eiloa e fai se vili mō mea konā.

 7 Me i tena toto e maua i loto i ei;+ ne ‵ligi ne ia ki tua i te kaupapa e seai ne mea i ei.

Ne seki ‵ligi ne ia ki te laukele ke ufi ne te ‵pefu.+

9 “Tela la, konei a pati a te Aliki Sili ko Ieova ne fai mai:

‘Kalofa eiloa i te fakai fakamaligi toto!+

Ka fai ne au te fakaputuga fafie ke maluga.

Ka liuvai a mea lai‵lai i loto i ei,+ kae ko mea ‵popo i ei ka ‵ka.

‵Pei atu ki loto i te afi fakatasi mo ana mea ‵popo!

13 “‘A tou sē ‵ma ne māfua mai i au amioga matagā.+ Ne taumafai au o ‵fulu a koe ke ‵ma, kae e se mafai eiloa koe o ‵ma mai tou tulaga lailai. A koe ka se ‵ma eiloa ke oko ki te taimi e ‵noga ei toku kaitaua ki a koe.+ 14 Ko au, ko Ieova, ko oti ne faipati atu. Ka taunu eiloa. Ka gasuesue au e aunoa mo te fakatalave, e aunoa mo te fanoanoa, e aunoa mo te salamō.+ Ka fakamasino ne latou koe e ‵tusa eiloa mo ou auala mo au faifaiga,’ ko te folafolaga a te Aliki Sili ko Ieova.”

15 Kae ne toe oko mai te fekau a Ieova ki a au, ana muna: 16 “Te tama a te tagata, i se ‵pusi fua e tasi ko pili o ave kea‵tea ne au a tau fagasele mai i a koe.+ E se ‵tau mo koe o fanoanoa;* io me ‵tau mo koe o tagi io me ‵sali ou loimata. 17 Tagi filemu, kae ke mo a ma fai a faifaiga masani e fai ki se tino ma mate.+ ‵Sai tou pulou laugatu,+ kae pei ou taka.+ E se ‵tau mo koe o ufi tou talafa,*+ kae ke mo a ma kai ki meakai e aumai ne nisi tino ki a koe.”+

18 Kae ne faipati atu au ki te fenua i te tafataeao, kae ne mate taku avaga i te afiafi. Tenā ne fai ei ne au i te tafataeao a mea ne fakatonu mai ki a au. 19 Ne fai mai a te fenua ki a au: “E a, e se mafai o fai mai ne koe me ka pokotia pefea matou i mea konei e fai ne koe?” 20 Ne tali atu au ki a latou: “Ne oko mai te fekau a Ieova ki a au, ana muna, 21 ‘Fai atu ki te kāiga o Isalaelu: “Konei a pati a te Aliki Sili ko Ieova ne fai mai, ‘Ko pili o fakamasei ne au toku koga tapuaki,+ ko te pogai o te otou fakamatamata sili, ko te mea e fakapelepele ne koutou mo te manakoga o otou loto. A otou tama tāgata mo tama fāfine kolā ne tiaki ne koutou ka ‵mate i te pelu.+ 22 Tenā ko ‵tau ei o fai ne koutou a te mea ne fai ne au. Ka se ufi ne koutou otou talafa, kae ka se ‵kai koutou ki meakai ne aumai ne nisi tino ki a koutou.+ 23 A otou pulou laugatu ka tuku i luga i otou ulu kae ko otou taka i otou vae. A koutou ka se ‵tagi fanoanoa io me ‵tagi mautuutu. I lō te fai penā, a koutou ka ‵pala masei eiloa ona ko otou mea ‵se,+ kae ka fakatau ‵tagi fanoanoa te suā tino ki te suā tino. 24 A Esekielu ko fai pelā me se fakailoga ki a koutou.+ A mea ne fai ne ia, ka fai foki ne koutou. Kafai e ‵tupu a mea konā, ka iloa ei ne koutou i a au ko te Aliki Sili ko Ieova.’”’”

25 “Kae e pelā mo koe e te tama a te tagata, i te aso e ave ei kea‵tea ne au mai i a latou te lotou puipuiga​—ko te mea gali o te lotou fia‵fia, ko te mea e fakapelepele ne latou, ko te manakoga o olotou loto​—fakatasi mo olotou tama tāgata mo tama fāfine,+ 26 ka lipoti atu a te mea tenā ki a koe ne se tino telā ne sao i ei.+ 27 I te aso tenā ka fakamaga tou gutu o faipati ki te tino telā ne sao, kae ko koe ka se toe gūgū.+ Ka fai koe pelā me se fakailoga ki a latou, kae ka iloa ei ne latou i a au ko Ieova.”