Neemia

1 Ko pati a Neemia*+ te tama tagata a Hakalia: I te masina o Kisilevu,* i te 20tausaga o te pulega a te tupu,* ne nofo atu au i Susana*+ te taoa* malosi. 2 I te taimi tenā, ne oko mai a Hanani,+ se tokotasi o oku taina fakatasi mo nisi tāgata mai i Iuta, kae ne fesili atu au ki a latou e uiga ki te ‵toega o tino Iutaia kolā ne ‵sao mai te ave fakapagotaga,+ kae e uiga foki ki Ielusalema. 3 Ne tali mai latou: “A te tulaga o tino ne ‵toe mai i te kogā fenua tenā, kolā ne ‵sao i te ave fakapagotaga, ko oko eiloa i te masei kae fakamasiasi.+ A ‵pui o Ielusalema ko maofa ki lalo,+ kae ko ana mataloa ko oti ne ‵sunu ki te afi.”+

4 I te taimi eiloa ne logo ei au i pati konei, ne sagasaga ifo au ki lalo kae kamata o tagi mautuutu kae fanoanoa i aso e uke, ne fakalikiliki+ faeloa au kae ‵talo i mua o te Atua o te lagi. 5 Aku muna: “Ieova te Atua o te lagi, te Atua sili kae fakaofoofogia telā e tausi ki tena feagaiga kae fakaasi atu te alofa fakamaoni ki a latou kolā e a‵lofa ki a ia kae tausi ki ana fakatonuga,+ 6 fakamolemole tuku mai ou taliga kae ‵pula mai ou mata o fakalogo ki te ‵talo a tau tavini telā e ‵talo atu ki a koe i te aso nei, i te ao mo te po,+ e uiga ki au tavini ko tino Isalaelu, ke fakaasi ‵tonu atu a agasala kolā ne fai ne tino Isalaelu ki a koe. A matou ko agasala, ko au mo te kāiga o toku tamana.+ 7 Ne fai eiloa ne matou a faifaiga sē ‵tonu ki a koe+ mai te sē tausi faka‵lei ki fakatonuga, tulafono fo‵liki, mo ikuga o fakamasinoga kolā ne avatu ne koe ki tau tavini ko Mose.+

8 “Fakamolemole, ke masaua a pati ne fakatonu atu ne koe ki tau tavini ko Mose: ‘Kafai e se fakamaoni koutou, ka fakasalalau ne au koutou ki fenua katoa.+ 9 Kae kafai e ‵foki mai koutou ki a au kae tausi ki aku fakatonuga kae faka‵logo ki ei, faitalia eiloa te salalau valevale ou tino ki koga ‵mao, ka fakamaopoopo+ mai ne au latou mai koga konā kae aumai ki te koga telā ne filifili ne au ke tuku i ei toku igoa.’+ 10 A latou ko au tavini mo ou tino, kolā ne faka‵sao ne koe ki tou malosi sili mo tou lima malosi.+ 11 Ieova, fakamolemole, fakalogo faka‵lei mai ou taliga ki te ‵talo a tau tavini mo te ‵talo a au tavini kolā e loto fia‵fia o ma‵taku ki tou igoa, kae fakamolemole fakamanuia mai tau tavini kae ke fakaasi mai ne te tagata tenei a te alofa atafai ki a au.”+

Au ko te tino ave ipu uaina a te tupu.+