Hosea
1 Ko te fekau a Ieova telā ne oko mai ki a Hosea* te tama tagata a Peeli i aso o Usia,+ Iotama,+ Aasa,+ mo Hesekia,+ ko tupu o Iuta,+ mo aso o Ielopoamo+ te tama tagata a Ieoasa+ te tupu o Isalaelu. 2 I te taimi ne kamata ei a Ieova o faipati atu tena fekau e auala i a Hosea, ne fai atu a Ieova ki a Hosea, penei: “Fano o avaga mo se fafine talitāgata* kae fai au tama mai i faifaiga talitāgata,* me ko amioga talitāgata* ne fulitua katoatoa ei a te fenua mai te tau‵tali atu i a Ieova.”+
3 Tenā ne fano ei a ia o avaga mo Komeli te tama fafine a Tipelaima, kae ne faitama tou fafine kae fanau mai ne ia se tamaliki tagata.
4 Muna a Ieova ki a ia: “Fakaigoa a ia ki a Ieseleelu,* me i se taimi pili mai ka fakaoko atu ne au te taui ki te kāiga o Ieu+ ona ko faifaiga fakamaligi toto i Ieseleelu, kae ka fakagata ne au te pulega fakatupu a te kāiga o Isalaelu.+ 5 I te aso tenā ka ‵fati ne au te kausana a Isalaelu i te Vanu o Ieseleelu.”
6 Ne toe faitama tou fafine kae fanau mai ne ia se tamaliki fafine. Muna a Ia ki tou tagata: “Fakaigoa a ia ki a Loluama,* me ka se toe fakaasi atu ne au te alofa fakamagalo+ ki te kāiga o Isalaelu, me ka afuli eiloa kea‵tea ne au a latou.+ 7 Kae ka fakaasi atu ne au te alofa fakamagalo ki te kāiga o Iuta,+ kae ka faka‵sao ne au latou e auala i a Ieova te lotou Atua;+ ka se faka‵sao ne au latou e auala i se kausana io me auala i se pelu io me auala i se taua io me auala i solofanua io me auala i tāgata faka‵tele solofanua.”+
8 Mai tua o te ‵vaega kea‵tea o Loluama mai te ū, ne faitama tou fafine kae fanau ne ia se tamaliki tagata. 9 Tenā ne fai atu ei a Ia: “Fakaigoa a ia ki a Loami,* me i a koutou e se ko oku tino kae ko au e se ko te otou Atua.
10 “Kae ko te aofaki o tino Isalaelu ka pelā mo one i te tai, kolā e se mafai o fua io me lau aka.+ Kae i te koga telā ne fai atu ei ki a latou a pati konei, ‘A koutou e se ko oku tino,’+ ka fai atu i ei ki a latou, ‘Tama a te Atua ola.’+ 11 Kae ko tino o Iuta mo Isalaelu ka fakamaopoopo fakatasi mo te ‵kau fakatasi+ kae ka filifili ne latou te lotou ulu e tokotasi kae olo ki tua mo te fenua, me i te aso o Ieseleelu se aso tāua.+