Te Tusi a Luka

18 Tenā ne fai atu ei ne Iesu ki a latou se tala fakatusa e uiga ki te manakoga ke ‵talo faeloa latou kae ke mo a ma ‵fiu,+ 2 ana muna: “Ne nofo atu i se fakai e tasi se famasino telā e se mataku ki te Atua kae e se āva foki ki tino. 3 E isi foki se fafine ko mate tena avaga i te fakai tenā ne fanatu sāle ki tou tagata kae fai atu, ‘Onoono faka‵lei ke maua ne au se fakamasinoga tonu mai toku fili telā ne fai tena tagi.’ 4 Ne seki fia saga sāle atu a ia ki te fafine tenā, kae fakamuli ifo, ne fai ifo a ia penei, ‘E tiga eiloa e se mataku au ki te Atua io me e se āva ki se tino, 5 kae ona ko te fakalavelave mai faeloa o te fafine tenei ki a au ka fai eiloa ne au se fakamasinoga tonu mō ia ko te mea ke se toe foki mai a ia o fakafi‵ta au ki tena manakoga.’”+ 6 Tenā ne fai atu ei te Aliki: “Faka‵logo ki pati ne fai atu ne te famasino, e tiga eiloa e se amiotonu a ia! 7 E tonu la, e mata, ka se fai eiloa ne te Atua se fakamasinoga tonu mō ana tino filifilia kolā e ka‵laga atu ki a ia i te ao mo te po,+ e tiga eiloa te lasi o tena loto kufaki mō latou?+ 8 Au e fai atu ki a koutou, ka fai fakavave eiloa ne ia te fakamasinoga tonu mō latou. E ui i ei, kafai e oko mai te Tama a te tagata, e mata, ka maua eiloa ne ia te fakatuanaki* tenei i te lalolagi?”

9 Ne fai atu foki ne ia te tala fakatusa tenei ki nisi tino kolā ne tali‵tonu ki a latou eiloa me i a latou e amio‵tonu kae mafau‵fau me e seai se aoga o nisi tino: 10 “E tokolua tāgata ne olo atu ki te faletapu o ‵talo i ei, e tokotasi se Falesaio kae ko te suā tino se tino ‵tae lafoga. 11 Ne tu te Falesaio kae kamata o ‵talo kae fai atu a pati konei i tena loto, ‘Te Atua, au e fakafetai atu ki a koe i a au e se fai pelā mo nisi tino katoa, ne tino kaisoa, tino sē amio‵tonu, tino mulilua io me fai pelā mo te tino ‵tae lafoga tenei. 12 Au e fakalikiliki fakalua i te vaiaso; kae e tuku atu ne au te tasi-vae-sefulu o aku mea katoa e maua.’+ 13 Kae ne tu atu te tino ‵tae lafoga i se koga tai ‵mao kae e se mafai o kilo aka ona mata ki te lagi, kae ne pāpā faeloa tena fatafata, ana muna, ‘Te Atua, alofa mai ki a au* te tino agasala.’+ 14 Au e fai atu ki a koutou, ne foki atu te tagata tenei ki tena fale kae ne sili atu tena amiotonu i lō te Falesaio tenā.+ Me ko so se tino e fakamaluga ne ia a ia eiloa ka fakamalalogina, kae ko so se tino e fakamalalo ne ia a ia eiloa ka fakamalugagina.”+

15 Ne avatu foki ne tino olotou tama‵liki ki a ia ko te mea ke fakapatele atu a ia ki a latou, kae i te laveaga ne ana soko a te mea tenei, kamata ei o ‵liko atu ki a latou.+ 16 Kae ne kalaga atu a Iesu ke olo atu a tama‵liki ki a ia, ana muna: “Tuku a tama‵liki fo‵liki ke o‵mai ki a au, kae sa taumafai o taofi latou, me i o tino penā a te Malo o te Atua.+ 17 Au e fai ‵tonu atu ki a koutou, so se tino e se talia ne ia te Malo o te Atua e pelā me se tamaliki foliki ka se mafai eiloa o ulu atu ki loto i ei.”+

18 Kae ne fesili atu se tino pule e tokotasi ki a ia, ana muna: “Te Faiakoga ‵lei, ne a mea e ‵tau o fai ne au ke maua ei te ola se-gata-mai?”+ 19 Muna a Iesu ki a ia: “Kaia e fai mai ei koe i a au e ‵lei? E seai se tino e ‵lei, e tokotasi fua te tino ‵lei, ko te Atua.+ 20 E iloa ne koe a tulafono: ‘Sa mulilua,+ sa tatino,+ sa kaisoa,+ sa molimau ‵pelo,+ āva ki tou tamana mo tou mātua.’”+ 21 Ne fai atu a ia: “Ko oti ne fai ne au a mea katoa konei talu mai te taimi koi talavou ei au.” 22 I te lagonaga ne Iesu te mea tenā, fai atu ei a ia ki te tagata tenā: “E toe tasi eiloa te mea e galo mai i a koe: Fakatau atu au mea katoa kae tufa atu a tupe ki tino ma‵tiva, kae ka maua ne koe a koloa e uke i te lagi; ko vau ei koe o fai mo oku soko.”+ 23 I te lagonaga ne ia te mea tenei, ne fanoanoa malosi a ia, me ne maumea ‵ki eiloa a ia.+

24 Ne kilo atu a Iesu ki a ia kae fai atu: “Ko oko eiloa i te faigata ke ulu atu a tino kolā e uke olotou tupe ki loto i te Malo o te Atua!+ 25 E tonu, e faigofie atu ke ulu se kamela ki loto i te pu o se nila suisui i lō te ulu atu o se tagata maumea ki te Malo o te Atua.”+ 26 Ne fai atu a tino kolā ne lagona ne latou te mea tenei: “Ko oi la e mafai o sao?”+ 27 Ana muna: “A mea kolā e se mafai ne tāgata o fai e mafai fua o fai ne te Atua.”+ 28 Kae ne fai atu a Petelu: “Kiloke! Ko oti ne tiaki ne matou omotou mea kae tau‵tali atu i a koe.”+ 29 Ne fai atu a Iesu ki a latou: “Au e fai ‵tonu atu ki a koutou, so se tino telā ko oti ne tiaki ne ia tena fale io me ko tena avaga io me ko ana taina io me ko ana mātua io me ko ana tama‵liki ona ko te Malo o te Atua+ 30 ka uke fakafia atu ana mea e maua i te vaitaimi tenei, kae i te taimi mai mua, ko te ola se-gata-mai.”+

31 Tenā ne ‵taki ei ne ia te toko Sefululua ki se feitu kae fai atu ki a latou: “Kiloke! A tatou e olo ki Ielusalema kae ko mea katoa kolā ne tusi e auala i pelofeta e uiga ki te Tama a te tagata ka fakataunu* i ei.+ 32 Ka tuku atu a ia ki tino o fenua fakaa‵tea+ kae ka fakatauemugina+ kae ta fakamasei kae puapuaki atu ki ei.+ 33 Kafai ko oti ne fakapuapuagatia a ia, ko tamate ei ne latou,+ kae i te tolu o aso ka toe fakatu aka a ia.”+ 34 Kae ne seki maina latou i uiga o mea katoa konei, me ne ‵funa mai i a latou a pati konei, kae ne seki malamalama latou i pati kolā ne fai atu.

35 I te piliatuga a Iesu ki Ieliko e isi se tagata ‵kivi ne sagasaga i tafa o te auala kae e akai mea.+ 36 Ne lagona ne ia se vaitino e olo atu i konā, kae fesili atu me se a te mea e tupu. 37 Ne fai atu a tino ki a ia: “Ko Iesu te Nasaleta tenā e vau!” 38 Ne pakalaga atu a ia: “Iesu, te Tama a Tavita, ke alofa* mai koe ki a au!” 39 Kae ko tino kolā ne ‵tu atu i ana mua ne ‵liko atu ki a ia kae fai atu ki ei ke se fakalogoa, kae ne pakalaga malosi atu faeloa tou tagata: “Te Tama a Tavita, ke alofa* mai koe ki a au!” 40 Ne tu a Iesu kae fakatonu atu ke avatu te tagata tenā ki a ia. I tena piliatuga, ne fesili atu a Iesu ki a ia: 41 “Se a te mea e manako koe ke fai ne au mō koe?” Ana muna: “Te Aliki, faka‵pula aka oku mata.” 42 Tenā ne fai atu ei a Iesu ki a ia: “Ke ‵kite ou mata, ko tou fakatuanaki ne ‵lei ei koe.”+ 43 Ne ‵lei fakavave ana mata, kae kamata o tautali atu i a ia,+ kae tavae atu ki te Atua. I te laveaga ne tino katoa a te mea tenei ne ‵viki atu ei latou ki te Atua.+