Esekielu

2 Tenā ne fai mai ei a ia ki a au: “Te tama a te tagata,* tu mai ou vae ki luga ke faipati atu au ki a koe.”+ 2 I tena faipatimaiga ki a au, ne oko mai ki a au te agaga o te Atua kae ne fai ei au ke tu ki luga i oku vae+ ko te mea ke lagona ne au te Atua telā e faipati mai ki a au.

3 Ne fai mai a ia ki a au: “Te tama a te tagata, ko uga atu ne au koe ki tino o Isalaelu,+ ki atufenua ‵teke kolā ne ‵teke mai ki a au.+ A latou mo olotou tupuga ne agasala mai ki a au ke oko mai eiloa ki te aso tenei.+ 4 Ko uga atu ne au koe ki tama ‵teke kae loto ma‵keke,+ kae e ‵tau mo koe o fai atu ki a latou, ‘Konei a pati a te Aliki Sili ko Ieova ne fai mai.’ 5 Kae e pelā mo latou, faitalia me faka‵logo latou io me ita ma faka‵logo​—me i a latou se kāiga ‵teke+​—ka iloa eiloa ne latou me ne isi se pelofeta ne nofo i a latou.+

6 “Kae ko koe, e te tama a te tagata, sa mataku i a latou,+ kae sa mataku i olotou pati, faitalia me fakatamilo koe ne lakau makaikai kae talatala*+ kae e ‵nofo fakatasi foki koe mo akalava. Sa mataku i olotou pati,+ kae sa mataku i olotou foliga,+ me i a latou se kāiga ‵teke. 7 E ‵tau mo koe o faipati atu aku pati ki a latou, faitalia me faka‵logo latou io me ikai, me i a latou ne tino ‵teke.+

8 “Kae ko koe e te tama a te tagata, fakalogo mai ki mea e fai atu ne au. Ke mo a ma uiga ‵teke koe e pelā mo te kāiga ‵teke tenei. Fakamaga aka tou gutu kae kai ki mea e tuku atu ne au ki a koe.”+

9 I taku kiloatuga, ne lavea ne au se lima e ‵fola mai ki a au,+ kae ne lavea ne au i ei se peluga tusi e isi ne mea e tusi i ei.+ 10 I te taimi ne ‵fola mai ei ne ia ki oku mua, e isi ne mea e tusi i ei i te feitu ki mua mo te feitu ki tua.+ E tusi i luga i ei a pese o te tagi fanoanoa mo te tagi mautuutu mo te tagi fi‵ta.+