Te Muamua Samuelu
6 A te Pusa+ a Ieova ne tuku i te kogā fenua o tino Filisitia i masina e fitu. 2 Ne ‵kami mai ne tino Filisitia a faitaulaga mo tino fakataulaitu+ kae fesili atu: “Se a te mea e ‵tau o fai ne matou ki te Pusa a Ieova? Fai mai aka me e fakafoki atu pefea ne matou ki tena koga ne tuku i ei.” 3 Ne tali atu latou: “Kafai e fakafoki ne koutou te pusa o te feagaiga a Ieova te Atua o Isalaelu, sa fakafoki ne koutou e aunoa mo se meaalofa. E ‵tau o fakafoki ne koutou fakatasi mo se meaalofa ke fakamagalo ei otou agasala.+ Kafai e fai penā ko ‵lei ei koutou, kae ka iloa ne koutou te pogai ne fakasala ei ne ia koutou.” 4 Kae ne fesili atu latou: “Se a te meaalofa ke fakamagalo ei agasala e ‵tau o avatu ne matou ki a ia?” Ne fai atu latou: “E ‵tusa mo te aofaki o aliki o tino Filisitia,+ ave e lima potu aulo e faite pelā me ne matalikia mo kimoa aulo e lima, me konā eiloa a mala ne pokotia ei a koutou katoa mo otou aliki. 5 E ‵tau o faite ne koutou ne fakatusa o otou matalikia mo fakatusa o otou kimoa+ kolā ne fakamasei ne latou te laukele, kae e ‵tau mo koutou o fakaaloalo atu ki te Atua o Isalaelu. E se taumate ka fakamāmā ne ia tena fakasalaga ki a koutou mo te otou atua mo te otou laukele.+ 6 Kaia e loto ma‵keke ei koutou e pelā mo tino Aikupito mo te Falao kolā ne loto ma‵keke foki?+ I te taimi ne fakasala ‵mafa ei ne Ia latou,+ ne ‵tau o uga atu ne latou a tino Isalaelu ke olo, kae ne olo ei latou.+ 7 Nei la, fakatoka se kā fou mo pulumakau e lua kolā e isi ne lā tama kae seki fakaga‵lue eiloa. ‵Sai atu a pulumakau ki te kā, kae puke a lā tama o faka‵foki ki te sai pulumakau, ke ‵nofo kea‵tea mai i a lāua. 8 Puke te Pusa a Ieova kae tuku atu ki luga i te kā, kae tuku a mea ne faite ki aulo kolā e avatu ne koutou ki a ia e pelā me se meaalofa ke fakamagalo ei otou agasala ki loto i se pokisi kae tuku i ana tafa.+ Tenā ko tuku ei ke fano i tena auala 9 kae onoono eiloa ki ei: Kafai e fano i te auala ki Peta-semese,+ ki tena koga tonu, ko tena uiga ko ia eiloa ne fai ne ia a te mea masei tenei ki a tatou. Kae kafai e se fano ki ei, ko iloa ei ne tatou me e se ko ia ne fakasala ne ia tatou; kae se fakalavelave fakafuasei eiloa ko tupu ki a tatou.”
10 Ne fai eiloa ne tāgata a mea konā. Ne puke mai ne latou a pulumakau e lua kolā e isi ne lā tama kae ‵sai atu ki te kā, kae ne ‵loka ne latou a lā tama i te sai pulumakau. 11 Tenā ne tuku atu ei ne latou te Pusa a Ieova ki luga i te kā, fakatasi mo te pokisi telā e tuku i ei a kimoa aulo mo fakatusa o olotou matalikia. 12 Kae ne olo ‵tonu eiloa a pulumakau i te auala ki Peta-semese.+ Ne olo atu lāua i te auala lasi e tasi, kae tagi‵tagi eiloa i te lā auala; ne seki ‵fuli atu lāua ki te feitu fakaatamai io me ki te feitu fakamaui. I te taimi tenā, a aliki o Filisitia ne sa‵sale mai i lā tua ke oko atu eiloa ki te tuakoi o Peta-semese. 13 A tino Peta-semese e ‵kati saito i te vanu laugatasi.* I te lotou ‵kiloatuga kae lavea ne latou te Pusa, ne fia‵fia malosi latou. 14 Ne fanatu te kā ki te laukele o Iosua te tino Peta-semese kae tu i konā i tafa o se fatu lasi. Tenā ne katikati ei ne latou a lakau o te kā, kae ofo atu a pulumakau+ e pelā me se taulaga ‵sunu ki a Ieova.
15 Ne tuku ifo ne tino Levi+ a te Pusa a Ieova fakatasi mo te pokisi telā ne aumai tasi mo te mea tenā, ko te pokisi telā e tuku i ei a mea ne faite ki aulo, kae tuku atu a mea konā ki luga i te fatu lasi. Ne ofo atu ne tāgata Peta-semese+ a taulaga ‵sunu kae fai olotou taulaga i te aso tenā ki a Ieova.
16 I te laveaga ne aliki e tokolima o tino Filisitia a te mea tenā, toe ‵foki ei latou ki Ekelona i te aso tenā. 17 Konei a aulo e pelā me ne matalikia kolā ne avatu ne tino Filisitia ki a Ieova e pelā me se meaalofa ke fakamagalo ei olotou agasala:+ e tasi mō Asetota,+ e tasi mō Kasa, e tasi mō Asekelona, e tasi mō Kata,+ e tasi mō Ekelona.+ 18 Kae ko te aofaki o kimoa aulo e fetaui ‵tonu eiloa mo te aofaki o fakai o tino Filisitia kolā e pule i ei a aliki e tokolima—e aofia i ei a fakai ‵lasi kolā ne ‵pui faka‵lei mo fakai fo‵liki kolā e seai ne ‵pui.
Kae ko te fatu lasi telā ne tuku i ei a te Pusa a Ieova e fai pelā me se molimau ke oko mai ki te aso nei i te laukele o Iosua te tino Peta-semese. 19 Kae ne ‵ta ne te Atua a tāgata Peta-semese me ne ‵kilo atu latou ki te Pusa a Ieova. Ne ‵ta ne ia a tino e toko 50,070* kae ne kamata o ‵tagi fanoanoa a tino i te tamatega ne Ieova a tino e tokouke konei.+ 20 Tenā ne fesili atu ei a tāgata Peta-semese: “Ko oi e mafai ne ia o tu i mua o Ieova, te Atua ‵malu tenei,+ kae ko oi te tino ka fano kea‵tea a ia ki ei mai i a tatou?”+ 21 Tenā ne uga atu ei ne latou a avefekau ki tino i Kiliata-iealima,+ olotou muna: “Ko oti ne fakafoki mai ne tino Filisitia a te Pusa a Ieova. O‵mai o puke atu ne koutou.”+