Ielemia

37 Kae ko te Tupu ko Setekaia+ te tama tagata a Iosia ne fai mo pule e sui ei a Konia*+ te tama tagata a Ieoiakimo, me i te tupu o Papelonia ko Nepukanesa* ne fai ne ia tou tagata mo tupu i te fenua o Iuta.+ 2 Kae ko ia mo ana tavini mo tino o te fenua ne seki faka‵logo ki pati a Ieova ne fai e auala i a Ielemia te pelofeta.

3 Kae ne uga atu ne te Tupu ko Setekaia a Ieukala+ te tama tagata a Selemia mo Sefanaia+ te tama tagata a Maseia te faitaulaga ki a Ielemia te pelofeta, kae fai atu: “Fakamolemole, ‵talo aka ki a Ieova te ‵tou Atua mō matou.” 4 A Ielemia e seki ‵pei i ei ki te falepuipui,+ tela la, e saoloto fua o fano sāle i loto i te fenua. 5 I te taimi tenā, ne olo atu ei te kautau a te Falao mai i Aikupito,+ kae ko tino Kaletaia kolā e nikoi ne latou a Ielusalema ne ‵logo i te tala e uiga ki a latou. Tenā ne olo ei latou kea‵tea mai i Ielusalema.+ 6 Kae ne oko mai te fekau a Ieova ki a Ielemia te pelofeta, ana muna: 7 “Konei a pati a Ieova te Atua o Isalaelu ne fai mai, ‘Konei a pati e ‵tau o fai ne koe ki te tupu o Iuta, telā ne uga mai ne ia koe ki a au ke fesili mai ki a au: “Kiloke! A te kautau a te Falao telā e vau o fesoasoani atu ki a koe ka toe ‵foki ki te lotou fenua ko Aikupito.+ 8 Kae ko tino Kaletaia ka ‵foki mai kae taua mai ki te fakai tenei kae puke ne latou kae ‵sunu ki te afi.”+ 9 Konei a pati a Ieova ne fai mai, “Ke mo a ma faka‵segina koutou mai te fai aka, ‘A tino Kaletaia ka olo kea‵tea eiloa mai i a tatou,’ me ka se olo kea‵tea eiloa latou. 10 Kafai foki loa e ‵ta ne koutou te kautau kātoa o tino Kaletaia kolā e taua atu ki a koutou kae ‵toe mai fua ko olotou tāgata pa‵kia, ka ‵tu aka eiloa latou ki luga mai i olotou faleie kae ‵sunu te fakai tenei ki te afi.”’”+

11 I te taimi ne olo kea‵tea ei te kautau o tino Kaletaia mai te taua atu ki Ielusalema ona ko te kautau a te Falao,+ 12 ne fanatu a Ielemia mai i Ielusalema ki te fenua o Peniamina+ ke maua tena vaega i ana tino i konā. 13 Kae i tena okoatuga ki te Mataloa o Peniamina, ne puke a te pelofeta ko Ielemia ne te ofisa pule o leoleo telā e fakaigoa ki a Ilia te tama tagata a Selemia te tama tagata a Hanania, kae fai atu: “A koe ko tiaki ne koe matou o kau ki tino Kaletaia!” 14 Kae ne fai atu a Ielemia: “E se tonu te mea tenā! E seki tiaki ne au koutou o kau ki tino Kaletaia.” Kae ne seki fakalogo a ia ki tou tagata. Tenā ne puke ei ne Ilia a Ielemia kae avatu a ia ki pelenise. 15 Ne kaitāua malosi a pelenise ki a Ielemia,+ kae ne ‵kini ne latou a ia kae ‵loka a ia+ i te fale o Ieonatana te failautusi, telā ko oti ne fai pelā me se falepuipui. 16 Ne ‵pei a Ielemia ki se falepuipui pouli, ki loto i potu mai lalo o te laukele, kae ne nofo a ia i konā i se taimi leva ‵ki.

17 Tenā ne uga atu ei te fekau a te Tupu ko Setekaia ke vau a ia, kae ne fakafesilisili ‵muni ne te tupu a ia i loto i tena fale.+ Ne fesili atu a ia, “E a, e isi se fekau mai i a Ieova?” Muna a Ielemia, “E isi!” kae ne toe fai atu a ia, “A koe ka tuku atu ki lima o te tupu o Papelonia!”+

18 Ne fai atu foki a Ielemia ki te Tupu ko Setekaia: “Ne agasala pefea au ki a koe mo au tavini mo te fenua tenei, ko fai ei koe ke ‵pei au ki te falepuipui? 19 Kofea nei otou pelofeta kolā ne ‵valo atu ki a koutou, ‘A te tupu o Papelonia ka se vau o taua mai ki a koutou mo te fenua tenei’?+ 20 Fakamolemole, fakalogo mai, e toku aliki te tupu. Fakamolemole, talia mai taku fakatagi. Sa uga atu au ki te fale o Ieonatana+ te failautusi, i a au ma mate i konā.”+ 21 Tenā ne fakatonu atu ei te Tupu ko Setekaia ke tausi a Ielemia i te Koga Ateatea o te Leoleo,+ kae ne avatu ki a ia se falaoa faka‵fete i aso takitasi mai i te auala o tino tao falaoa+ ke oko ki te taimi ko palele ei a falaoa katoa i te fakai.+ Kae ne nofo eiloa a Ielemia i te Koga Ateatea o te Leoleo.