Esekielu

46 “Konei a pati a te Aliki Sili ko Ieova ne fai mai: ‘E ‵tau o ‵pono+ te mataloa o te koga ateatea tafa ki loto telā e ‵fuli ki te feitu ki saegala+ i aso ga‵lue e ono,+ kae e ‵tau o ‵tala i te aso o te Sapati mo te aso o te masina sae. 2 A te takitaki ka ulu mai i te feitu ki tua e auala i te fakaosoga o te mataloa,+ kae ka tu a ia i tafa o te pou mataloa. Ka ofo atu ne te faitaulaga a tena taulaga ‵sunu kātoa mo tena taulaga ‵kai fakatasi, kae ka ifo a ia ki lalo i te mataloa ko fano ei a ia ki tua. Kae ko te mataloa e se ‵tau o ‵pono ke oko eiloa ki te afiafi. 3 A tino o te fenua ka ifo foki ki lalo i mua o Ieova i te mataloa ki loto i Sapati mo masina sae.+

4 “‘A taulaga ‵sunu kātoa kolā ka ofo atu ne te takitaki ki a Ieova i te aso o te Sapati e ‵tau o aofia i ei a tamā mamoe tāgata ‵lei e ono mo se mamoe matua ‵lei.+ 5 A te taulaga meakai e tasi te efa mō te mamoe matua mo so se mea e mafai o tuku atu ne ia ki tamā mamoe tāgata, fakatasi mo se hini o sinu mo efa takitasi.+ 6 I te aso o te masina sae e ‵tau o aofia i te taulaga se tamā pulumakau tagata ‵lei mai te lafu, e ono tamā mamoe, mo se mamoe matua; e ‵tau o ‵lei katoa a manu konā.+ 7 E ‵tau o ofo atu ne ia e pelā me se taulaga meakai e tasi te efa ma te tamā pulumakau tagata, e tasi te efa ma te mamoe matua, mo so se mea e mafai o tuku atu ne ia ma tamā mamoe tāgata. Kae e ‵tau o ofo atu ne ia se hini o sinu fakatasi mo efa takitasi.

8 “‘Kafai ko ulu mai a te takitaki, e ‵tau o ulu mai a ia e auala i te fakaosoga o te mataloa, kae e ‵tau a ia o fano ki tua i te auala eiloa tenā.+ 9 Kae kafai ko o‵mai a tino o te fenua ki loto i mua o Ieova i taimi o ‵kaiga fia‵fia,+ a latou kolā e o‵mai ki loto o tapuaki i te mataloa i te feitu ki mātū+ e ‵tau o olo ki tua i te mataloa i te feitu ki saute,+ kae ko latou kolā e o‵mai ki loto i te mataloa i te feitu ki saute e ‵tau o olo ki tua i te mataloa i te feitu ki mātū. E seai se tino e ‵tau o toe foki ki tua i te mataloa ne ulu mai ei a ia, me e ‵tau mo latou o olo ki tua i te mataloa telā e ‵luta tonu atu ki a latou. 10 E pelā mo te takitaki telā e ‵nofo fakatasi mo latou, e ‵tau mo ia o ulu ki loto māfai ko o‵mai latou ki loto, kae e ‵tau mo ia o fano ki tua māfai ko olo latou ki tua. 11 I taimi o ‵kaiga fia‵fia mo vaitaimi fia‵fia a te taulaga meakai e ‵tau o tasi te efa ma te tamā pulumakau tagata, e tasi te efa ma te mamoe matua, mo so se mea e mafai o tuku atu ne ia ki tamā mamoe tāgata, fakatasi mo se hini o sinu mo efa takitasi.+

12 “‘Kafai e fakatoka mai ne se takitaki se taulaga ‵sunu kātoa+ io me se taulaga ‵kai fakatasi e pelā me se taulaga o te lotomalie ki a Ieova, ka ‵tala eiloa ki a ia a te mataloa telā e ‵fuli atu ki te feitu ki saegala, kae ka fakatoka ne ia tena taulaga ‵sunu kātoa mo tena taulaga ‵kai fakatasi e pelā eiloa mo te mea e fai ne ia i te aso o te Sapati.+ Kafai ko fano a ia ki tua, e ‵tau o ‵pono a te mataloa i ana tua.+

13 “‘I aso takitasi, e ‵tau o fakatoka ne koe se tamā mamoe tagata ‵lei telā ko tasi tena tausaga e pelā me se taulaga ‵sunu kātoa ki a Ieova.+ E ‵tau o fai ne koe te mea tenei i tafataeao katoa. 14 Fakatasi mo te mea tenā, i tafataeao takitasi e ‵tau o fakatoka ne koe se tasi-vae-ono o se efa mo fai te taulaga meakai, fakatasi mo te tasi-vae-tolu o se hini o sinu ke fakamatulutulu atu ki luga i falaoa ‵mata kae ‵lei e pelā me se taulaga masani ki a Ieova. A te mea tenei se tulafono fakavae tumau. 15 E ‵tau mo latou o fakatoka te tamā mamoe tagata, te taulaga meakai, mo te sinu i tafataeao katoa e pelā me se taulaga ‵sunu masani kātoa.’

16 “Konei a pati a te Aliki Sili ko Ieova ne fai mai: ‘Kafai e tuku atu ne te takitaki se meaalofa ki ana tama tāgata katoa e pelā me se tofi, ka fai eiloa te mea tenā mo fai te kope o ana tama. Kae ka fai eiloa mo fai te lotou tofi. 17 Kae kafai e tuku atu ne ia se meaalofa mai i tena tofi ki se tokotasi o ana tavini, kae fai eiloa a te mea tenā ma ia ke oko ki te tausaga o te saolotoga;+ tenā ko toe fakafoki atu ei ki te takitaki. Ko te tofi fua o ana tama tāgata ka fai eiloa mo fai se tofi tumau o latou. 18 E se ‵tau o puke ne te takitaki se tofi o te fenua mai te faimālō o latou ke olo kea‵tea mai te lotou laukele. E ‵tau o tuku atu ne ia ki ana tama se tofi mai i ana mea totino, ko te mea ke seai se tino mai oku tino e afuli kea‵tea mai i tena laukele.’”

19 Tenā ne aumai ei ne ia au ki loto e auala i te mataloa ki loto+ telā e tu i tafa o te mataloa telā e fano ki potu ‵kai tapu o faitaulaga, kolā e ‵fuli ki te feitu ki mātū,+ kae ne lavea ne au i konā se koga i tua i te feitu ki togala. 20 Ne fai mai a ia ki a au: “Tenei te koga ka saka ei ne faitaulaga a te taulaga mō mea ‵se mo te taulaga mō agasala mo te koga ka tao i ei ne latou te taulaga meakai,+ ko te mea ke se amo ne latou se mea ki tua mo te koga ateatea tafa ki loto kae faka‵pisi atu a te ‵malu ki te fenua.”+

21 Ne aumai ne ia au ki tua mo te koga ateatea tafa ki tua kae ‵taki ne ia au i tafa o ‵kōna e fa o te koga ateatea, kae ne lavea ne au se koga ateatea i ‵kōna takitasi o te koga ateatea tafa ki tua. 22 I ‵kōna e fa o te koga ateatea e isi ne tamā koga ateatea i ei, e 40 kupita te ‵loa kae 30 kupita te lauefa. E ‵pau te ‵lasi o koga e fa konā. 23 E isi ne lela e fakatamilo i mea e fa konā, kae mai lalo o lela ne faite i ei ne koga mo saka a taulaga. 24 Tenā ne fai mai ei a ia ki a au: “Konei a fale kolā e saka i ei ne tavini o te faletapu a taulaga a tino.”+