Tanielu

1 I te tolu o tausaga o te pulega fakatupu a te tupu o Iuta ko Ieoiakimo,+ ne vau a te tupu o Papelonia ko Nepukanesa ki Ielusalema kae nikoi ne ia.+ 2 Fakamuli ifo, ne tuku atu ne Ieova a te tupu o Iuta ko Ieoiakimo ki ana lima,+ fakatasi mo nisi meāfale o te fale* o te Atua tonu, kae ne aumai ne ia latou ki te fenua o Sina*+ ki te fale* o tena atua. Ne tuku atu ne ia a meāfale ki te fale ‵teu koloa o tena atua.+

3 Tenā ne fakatonu atu ei te tupu ki a Asepenase se ofisa a te tupu ke aumai ne nai tino Isalaelu, e aofia i ei a latou kolā e fa‵nau mai i kaigā tupu mo kāiga ma‵luga.+ 4 A latou konā e ‵tau o fai mo fai ne talavou* kolā e seai ne pona, e tino‵gali, e ‵poto, e atamai latou, kae ‵loto te lotou malamalama,+ kae fakatuagagina ke tavini atu i te palesi o te tupu. E ‵tau o akoako ne ia latou ki tusitusiga mo te ‵gana a tino Kaletaia. 5 E se gata i ei, ne ‵vae atu ne te tupu ki a latou i aso takitasi se vaega mai i meakai ‵gali a te tupu mo uaina ne inu a ia i ei. E ‵tau o akoako* latou i loto i tausaga e tolu, kae i te fakaotiga o te taimi tenā e ‵tau mo latou o ulu atu ki loto i te taviniga a te tupu.

6 E aofia i a latou konei ne nai tino mai i te matakāiga o Iuta: ko Tanielu,*+ Hanania,* Misaeli* mo Asalia.*+ 7 Kae ko te ofisa pule ne tuku atu ne ia ne igoa* ki a latou; ne tuku atu ne ia ki a Tanielu a te igoa ko Peletisala,+ ki a Hanania a te igoa ko Satalaka, ki a Misaeli a te igoa ko Mesako, kae ki a Asalia a te igoa ko Apeteniko.+

8 Kae ne fakaiku aka ne Tanielu i tena loto ke se fakalailai ne ia a ia eiloa ki meakai ‵gali a te tupu io me ko uaina ne inu a ia ki ei. Tenā ne fakamolemole atu ei a ia ki te ofisa pule ke maua se taliaga ke mo a ma fakalailai ne ia a ia eiloa i te auala tenei. 9 Kae ko te Atua tonu ne fai ne ia a te ofisa pule ke fakaasi atu ki a Tanielu a tena taliaga* mo tena alofa fakamagalo.+ 10 Kae ne fai atu te ofisa pule ki a Tanielu: “Au e mataku i toku aliki te tupu, telā ne ‵vae mai ne ia otou meakai mo meainu. E pefea la māfai ko lavea mai ne ia koutou e se ‵tupu ma‵losi e pelā mo nisi talavou* i otou tupulaga? Ko fai fua ne koe au* ke agasala i mua o te tupu.” 11 Kae ko Tanielu ne fai atu ki te leoleo telā ne ‵tofi aka ne te ofisa pule ke tausi atu ki a Tanielu, Hanania, Misaeli mo Asalia: 12 “Fakamolemole, tofotofo aka au tavini i aso e sefulu, kae tuku mai ki a matou ne vesiapolo ke ‵kai ki ei mo vai ke inu ki ei; 13 ko faka‵pau i ei omotou foliga mo foliga o nisi talavou kolā e ‵kai ki meakai ‵gali a te tupu, ko fai ei ne koe ki au tavini a te mea e ‵tau o fai e ‵tusa eiloa mo te mea e lavea ne koe.”

14 Tenā ne lotomalie ei a ia ki te lotou fakamolemole kae tofotofo ne ia latou i aso e sefulu. 15 I te fakaotiga o aso e sefulu ne foliga ‵lei kae ma‵losi atu latou i lō talavou katoa kolā ne ‵kai ki meakai ‵gali a te tupu. 16 Tenā ne puke kea‵tea ei ne te leoleo a olotou meakai ‵gali mo olotou uaina kae tuku atu ne ia ki a latou a vesiapolo. 17 Kae ko te Atua tonu ne tuku atu ne ia ki talavou e tokofa konei a te iloa mo te ‵loto o te malamalama i vaegā tusitusiga katoa mo te poto; kae ne tuku atu ki a Tanielu a te malamalama i vaegā fakaasiga katoa mo moemiti.+

18 I te fakaotiga o te taimi telā ne tuku atu ne te tupu ke aumai latou ki loto,+ ne aumai ne te ofisa pule a latou ki mua o Nepukanesa. 19 I te taimi ne faipati atu ei te tupu ki a latou, e seai se tino ne maua aka i te potukau kātoa ne ‵pau mo Tanielu, Hanania, Misaeli mo Asalia;+ kae ne tumau latou i te tavini atu i mua o te tupu. 20 I so se mea e manakogina i ei te poto mo te malamalama telā e fesili atu ei te tupu ki a latou, ne maua aka ne ia me e sefulu taimi te ‵lei atu o latou i lō nisi faitaulaga faivailakau mo tino faivailakau+ i tena malo kātoa. 21 Kae ko Tanielu ne nofo eiloa i konā ke oko ki te tausaga muamua o te pulega a te Tupu ko Kulesa.+