Eseta

1 I aso o Asuelu,* ko te Asuelu telā ne pule atu ki kogā fenua e 127+ mai Initia ke oko ki Aitiope,* 2 i aso konā i te taimi ne sagasaga ei te Tupu ko Asuelu i tena nofogaaliki i Susana*+ te taoa malosi,* 3 i te tolu tausaga o tena pulega, ne fai ne ia se ‵kaiga lasi ki ana pelenise mo ana tavini katoa. A te kautau a Pelesia+ mo Metai,+ tino tāua, mo pelenise o kogā fenua ne ‵tu atu katoa i ana mua, 4 kae ne fakaasi atu ne ia ki a latou a koloa o tena malo ‵malu mo te taulekaleka mo te fakaofoofogia o tena gali i aso e uke, e 180 aso. 5 I te otiga o aso konei, ne fai ne te tupu se ‵kaiga lasi i aso e fitu ki tino katoa kolā ne ‵nofo i Susana* te taoa malosi,* mai te ‵toe tino maluga ke oko ki te ‵toe tino malalo, i te koga ateatea o te fatoaga i te palesi o te tupu. 6 E isi ne laugatu lino, filo ‵lei, mo laugatu lanu moana e faka‵mau ki laugatu ‵lei, vulu lanu violeta kolā e isi ne ligi siliva i ei, pou e faite ki mapu, mo nofoga aulo kae siliva i luga i se fola telā ne faite ki fatu tāua lanu kula, mapu, penina mo mapu uli.

7 Ne aumai eiloa a uaina i loto i ipu aulo; kae ko ipu takitasi e ‵kese mai te suā ipu, kae ko uaina mai te tupu e uke ‵ki, e ‵tusa eiloa mo mea e maua ne te tupu. 8 A tino e inu e ‵tusa mo te tulafono ke mo a ma faimālō te suā tino ke inu, me ko oti ne fai ne te tupu se fakatokaga mo ofisa o tena palesi ke fai ne tino taki tokotasi a te mea e fiafia a ia ki ei.

9 Ne fai foki ne te Tupu Fafine ko Vasati+ se ‵kaiga lasi ki fāfine i te fale* o te Tupu ko Asuelu.

10 I te fitu o aso, i te taimi ko fiafia malosi te loto o te tupu ona ko te uaina, ne fai atu a ia ki a Meumani, Pisita, Halapono,+ Piketa, Apakata, Sietala mo Kalakasa ko ofisa e tokofitu kolā e tavini atu ki te Tupu ko Asuelu, 11 ke aumai a te Tupu Fafine ko Vasati ki mua o te tupu, kae ke pei ki te kalauna fakatupu, ke lavea mai ne tino mo pelenise a tena gali, me i a ia e tinogali. 12 Kae ne ita faeloa a te Tupu Fafine ko Vasati ma vau e ‵tusa mo te fakatonuga a te tupu e auala i ana ofisa. Tenā ne kamata ei o ita te tupu, kae kaitaua malosi.

13 Ne faipati atu te tupu ki tāgata ‵poto kolā e isi se lotou malamalama ki faifaiga e ‵tau o fai (me i te auala tenei ko iloa ei ne tino katoa kolā e ‵poto i te tulafono mo faiga o fakamasinoga a te fakalavelave o te tupu, 14 kae ko latou kolā e ‵pili malosi atu ki a ia ko Kalasena, Setala, Atamata, Talasisi, Melesa, Malesena mo Memukana, ko pelenise e tokofitu+ o Pelesia mo Metai, kolā e mafai o olo atu ki mua o te tupu kae maua ne latou a tulaga ma‵luga eiloa o te malo). 15 Ne fesili atu te tupu: “E ‵tusa mo te tulafono, se a te mea e ‵tau o fai ki te Tupu Fafine ko Vasati me ne seki fakalogo a ia ki te fakatonuga a te Tupu ko Asuelu telā ne fai atu e auala i ana ofisa?”

16 Tenā ne fai atu ei a Memukana i mua o te tupu mo pelenise: “E se ko te tupu fua ne fai ki ei ne te Tupu Fafine ko Vasati a te mea ‵se tenei,+ kae ne fai foki ne ia te mea tenei ki pelenise katoa mo tino katoa i kogā fenua katoa o te Tupu ko Asuelu. 17 Me i te mea ne fai ne te tupu fafine ka iloa mai ne avaga fāfine katoa, kae ka manatu māmā latou ki olotou avaga kae fai atu, ‘A te Tupu ko Asuelu ne fai atu ke vau a te Tupu Fafine ko Vasati ki ana mua, kae ne ita tou fafine ma vau.’ 18 I te aso eiloa tenei a pulinisese o Pelesia mo Metai kolā e iloa ne latou a te mea ne fai ne te tupu fafine ka fai‵pati ki pelenise katoa a te tupu, kae iku atu i ei ki te se āva mo te kaitaua malosi. 19 Kafai e ‵lei ki te tupu, e ‵tau o fai ne ia se tulafono fakatupu kae ke tusi i loto i tulafono o Pelesia mo Metai, kae ke mo a eiloa ma toe ‵fuli,+ ko Vasati ke se toe vau eiloa ki mua o te Tupu ko Asuelu; kae ke tuku atu ne te tupu a te tulaga fakatupu o tou fafine ki se fafine telā e ‵lei atu i lō ia. 20 Kae kafai ko ‵logo a tino i kogā koga katoa o te tupu i tena tulafono, ka āva eiloa a avaga fāfine katoa ki olotou avaga, mai te ‵toe tino maluga ke oko eiloa ki te ‵toe tino malalo.”

21 Ne fia‵fia a te tupu mo pelenise ki te manatu tenei, kae ne fai ne te tupu a te mea ne fai atu ne Memukana. 22 Tenā ne ave ei ne ia a tusi ki kogā fenua+ katoa o te tupu, i tusitusiga o kogā fenua takitasi i te ‵gana eiloa a tino, ke fai a tāgata a‵vaga katoa mo matai i olotou kāiga eiloa kae ke faipati i te ‵gana a tena fenua.