Ielemia
8 “I te taimi tenā,” ko te folafolaga a Ieova, “a ivi o tupu o Iuta, a ivi o ana pelenise, a ivi o faitaulaga, a ivi o pelofeta, mo ivi o tino kolā ne ‵nofo i Ielusalema ka puke kea‵tea mai i olotou tanuga. 2 Ka fakatafola atu a mea konā ki te la mo te masina mo te kautau katoa o te lagi kolā ne a‵lofa kae tavini kae tau‵tali kae ‵sala latou ki ei kae ifo ki ei.+ Ka se fakaputu fakatasi a ivi konā io me tanu. Ka fai eiloa e pelā me ne kaiao i luga i te laukele.”+
3 “Kae ko te ‵toega o te kāiga matagā tenei kolā e ‵sao ka filifili ki te mate i lō te ola i koga katoa e fakasalalau ne au latou ki ei,” ko te folafolaga a Ieova o kautau.
4 “Kae e ‵tau mo koe o fai atu ki a latou, ‘Konei a pati a Ieova ne fai mai:
“E a, ka ‵siga latou kae e se toe ‵tu aka ki luga?
Kafai e ‵fuli mai se tino ki tua, e a, ka se ‵fuli mai foki te suā tino ki tua?
5 Kaia e se fakamaoni ei a tino Ielusalema konei, kae tumau faeloa i te sē fakamaoni?
E puke ‵mau latou ki te loi;
Kae ita ma toe ‵fuli mai.+
6 Au ne saga tonu atu kae fakalogologo faeloa, kae ko te auala e fai‵pati ei latou e se tonu.
E seai se tagata ne salamō i ana amioga ma‵sei io me fesili atu, ‘Se a taku mea ne fai?’+
A tino taki tokotasi e foki‵foki faeloa ki te auala masani, e pelā me se solofanua e tele makini atu ki loto i te taua.
7 Ke oko ki te manu ko te sikala i te lagi e iloa ne ia tena taimi tonu;
Te lupe mo manu eva ko te suifi mo te tuluse e tausi eiloa ki te taimi e ‵tau o toe ‵foki ei latou.
Kae ko oku tino tonu eiloa e se malamalama i te fakamasinoga a Ieova.”’+
8 ‘E mafai pefea o fai mai koutou: “A matou e ‵poto, kae e maua ne matou te tulafono* a Ieova”?
A te tonuga loa, a te ‵peni+ loi a failautusi ko oti ne fakaaoga mō mea sē tonu.
9 A tino ‵poto ko oti ne fakamasiasigina.+
Ko ma‵taku latou kae ka ‵poa aka latou.
Kiloke! Ko oti ne ‵teke ne latou te muna a Ieova,
Kae se a te poto e maua ne latou?
10 Ka tuku atu ne au olotou avaga fāfine ki nisi tāgata,
Ko olotou fatoaga ki nisi tino fai fatoaga;+
Me mai te ‵toe tino malalo ke oko eiloa ki te ‵toe tino maluga, e maua ne tino taki tokotasi a mea i se auala sē fakamaoni;+
Mai i te pelofeta ke oko eiloa ki te faitaulaga, e fai ne tino taki tokotasi a mea sē ‵tonu.+
11 Kae e taumafai latou o faka‵lei malie a pa‵kiaga o te tama fafine a oku tino, olotou muna,
“Ko isi se filemu! Ko isi se filemu!”
Kae seai ei se filemu.+
12 E mata, e ‵ma latou i mea fakatakalia‵lia ne fai ne latou?
E se ‵ma eiloa latou!
E se iloa foki ne latou o ‵ma!+
Tela la, ka pa‵kū latou i tino kolā ka pa‵kū.
Kafai e aumai ne au te fakasalaga ki a latou ka ‵siga eiloa latou,’+ ko muna a Ieova.
13 ‘Kafai e fakamaopoopo mai ne au latou, ka fakaseai ne au latou,’ ko te folafolaga a Ieova.
‘Ka seai ne fuagavine e ‵toe i luga i te vine, e seai ne mati i luga i te lakau ko te mati, kae ka mage‵mage a lau o lakau.
Kae ko mea ne tuku atu ne au ki a latou ka ‵galo mai i a latou.’”
14 “Kaia e saga‵saga ei tatou i konei?
Ke na maopoopo fakatasi tatou kae ulu atu ki loto i fakai e puipui faka‵lei+ ke ‵mate atu i konā.
Me i a Ieova te ‵tou Atua ka fakaseai ne ia tatou,
Kae e tuku mai ne ia a vai poisini ke inu tatou i ei,+
Me i a tatou ne agasala ki a Ieova.
15 E isi se fakamoemoega ke maua te filemu, kae e seai se mea ‵lei ne oko mai,
Ke maua se taimi o te faka‵leiga, kae ne oko mai te mataku!+
16 Ne lagona atu a te mānava o ana solofanua mai i Tanu.
Mai i te ‵tagi o ana solofanua ma‵losi,
Ne galulu ei te laukele kātoa.
Ne o‵mai latou ki loto o fakaseai te fenua mo mea katoa i loto i ei,
Ko te fakai mo tino e ‵nofo i ei.”
17 “Nei la, ka uga atu ne au a gata ki a koutou,
Ko gata poisini kolā e se mafai o faka‵lata,
Kae ka ū eiloa ne latou a koutou,” ko te folafolaga a Ieova.
18 A toku fanoanoa e se mafai o fai ke ‵lei;
A toku loto ko masaki.
19 E isi se kalaga mō se fesoasoani mai i se fenua ‵mao
Mai te tama fafine o toku fenua:
“E a, e se nofo atu a Ieova i Siona?
Io me e a, e se nofo tena tupu i a ia?”
“Kaia ne fai ei ne latou au ke kaitaua ona ko olotou tupua faite,
Fakatasi mo olotou atua fakaa‵tea e seai ne aoga?”
20 “A te taimi e ‵kati ei fuataga ko seke, ko palele a te taimi o te ‵tau vela,
Kae e seki faka‵sao eiloa matou!”
21 Ko oko eiloa au i te fanoanoa ona ko te pakiaga o te tama fafine o toku fenua;+
Ko oko eiloa au i te sē fiafia.
Ko maua au ne te mataku.
22 E a, e seai se sinu pasama i Kileata?+
E a, e seai se tino faka‵lei masaki* i ei?+
Kaia ne seki faka‵lei aka ei te tama fafine a oku tino ke toe maua te malosi?+