Ielemia
12 A koe e amiotonu, e Ieova,+ māfai e fai atu taku fameo ki a koe,
Māfai e faipati atu au ki mea e uiga ki au fakamasinoga ‵tonu.
Kae kaia la e manuia ei a te auala o tino amio ma‵sei,+
Kae kaia e se manava‵se ei a tino faitogafiti?
2 Ne ‵toki ne koe latou, kae ne ‵mau olotou aka.
Ne ola aka latou kae ‵fua mai olotou fuataga.
E fai‵pati olotou gutu e uiga ki a koe, kae ‵mao kea‵tea koe mai i olotou mafaufauga ‵loto.*+
3 Kae e iloa ‵lei ne koe au, e Ieova,+ e lavea ne koe au;
Ne iloilo ne koe toku loto kae maua aka me ‵kau fakatasi mo koe.+
Vaevae aka latou e pelā me ne mamoe ka tamate,
Kae tuku fakaa‵tea latou mō te aso o te tamatega.
4 E pefea te leva e ‵tau ei o gasolo o masei te laukele
Kae paku‵paku a lakau kaina i fatoaga katoa?+
Ona ko amioga matagā a latou kolā e ‵nofo i ei,
A manu fe‵kai mo manu eva ko oti ne ‵fulu faka‵ma.
Me ne fai mai latou: “E se lavea ne ia a te mea ka tupu ki a tatou.”
5 Kafai e fi‵ta koe i te ‵telega mo tāgata e ‵tele i olotou vae,
E mafai pefea o fakatau ‵tele koe mo solofanua?+
Faitalia me talitonu koe ki se fenua filemu,
Ne a mea ka fai ne koe i va o vao lakau ‵lasi i tafa o te Iolitana?
6 Me i ou taina foki eiloa, ko kāiga o tou tamana,
Ko oti ne faitogafiti ne latou koe.+
Ne ‵tagi paka‵laga latou o ‵teke atu ki a koe.
Ke mo a ma fakatuanaki ki a latou,
Māfai foki loa e fai‵pati atu ne latou a mea ‵lei ki a koe.
7 “Ko oti ne tiakina ne au toku fale;+ ko oti ne tuku tiaki ne au toku tofi.+
Ko oti ne tuku atu ne au taku fagasele fakapelepele ki lima o ana fili.+
8 A toku tofi ko fai pelā me se leona i te vao ki a au.
Ne tagi a ia o ‵teke mai ki a au.
Tela la, ko takalialia au ki a ia.
9 A toku tofi ko fai pelā me se manu eva fekai lanu kese‵kese ki a au;
A nisi manu eva fe‵kai e fakatamilo i a ia o taua atu ki ei.+
O‵mai, maopoopo fakatasi mai, koutou katoa e manu fe‵kai o te vao,
O‵mai o ‵kai.+
10 E tokouke a tausi mamoe ne fakamasei ne latou taku togavine;+
Ne lakalaka ne latou toku vaega i te laukele.+
Ne ‵fuli ne latou te vaega gali o toku laukele ke fai mo koga lavaki e seai ne mea i ei.
11 Ko fai nei e pelā me se laukele sē aoga.
A te laukele kātoa ko oti ne fakamasei,
Kae e seai se tagata ne tausi ne ia a mea konei i tena loto.+
12 A tino fakama‵sei mea ne o‵mai i luga i auala ma‵sei i loto i te koga lavaki,
Me i te pelu a Ieova e tamate ne ia a tino mai te mata e tasi o te fenua ke oko ki te suā mata.+
E seai se filemu e maua ne se tino.
13 Ne ‵toki ne latou a saito kae tau ne latou a lakau tala‵tala.+
Ne fakafi‵ta ne latou a latou eiloa, kae seai ne mea aoga e maua mai i ei.
Ka ma‵vale eiloa latou i olotou mea e fua mai
Ona ko te kaitaua o Ieova telā e ‵ka pelā me se afi.”
14 Konei a pati a Ieova ne fai o ‵teke atu ki oku tuakoi ma‵sei katoa, kolā e fakapa‵tele atu ki te tofi telā ne fai ne au ke tuku ki tino Isalaelu:+ “Ko unu kea‵tea nei ne au a latou mai te lotou laukele,+ kae ka unu kea‵tea ne au a te kāiga o Iuta mai i a latou. 15 Kae kafai ko oti ne unu kea‵tea ne au latou, kae ka toe fakaasi atu ne au te alofa fakamagalo ki a latou kae aumai a latou taki tokotasi ki tena tofi mo tena laukele.”
16 “Kae kafai e fakamautinoa aka ne latou ke tauloto ki auala o oku tino kae tau‵to e auala i toku igoa, ‘E pelā eiloa mo Ieova e ola!’ e pelā eiloa mo mea ne akoako ne latou ki oku tino ke tau‵to e auala i a Paala, tenā ko toe ati aka ei latou i va o oku tino. 17 Kae kafai e ita latou ma faka‵logo, ka unu foki kea‵tea ne au te fenua tenā, e unu kae fakaseai atu latou,” ko te folafolaga a Ieova.+