Ielemia
13 Konei a pati a Ieova ne fai mai ki a au: “Fano o ‵togi se fusi lino mō koe kae fusi fakatamilo i tou taugasulu, kae ke mo a eiloa e faka‵siu ki te vai.” 2 Tenā ne ‵togi ei ne au te fusi e ‵tusa mo te fakatonuga a Ieova kae fusi fakatamilo i toku taugasulu. 3 Kae ne toe oko mai te fakatonuga a Ieova ki a au i te lua o taimi: 4 “Puke te fusi telā ne ‵togi ne koe kae fusi koe ki ei kae tu ki luga, fano ki te Eufilate, kae ‵funa ne koe i konā i loto i vasia o te kaupapa.” 5 Tenā ne fano ei au kae ‵funa a te fusi i te Eufilate, e pelā eiloa mo te fakatonuga a Ieova ki a au.
6 Kae i aso e uke mai tua ifo, ne fai mai a Ieova ki a au: “Tu ki luga, fano ki te Eufilate, kae puke mai a te fusi telā ne fakatonu atu ne au ke ‵funa i konā.” 7 Tenā ne fano ei au ki te Eufilate kae keli aka ne au a te fusi kae puke mai ne au mai te koga ne ‵funa ne au i ei, kae ne lavea aka ne au me ko masei valevale a te fusi; ko seai eiloa sena aoga.
8 Tenā ne oko mai ei te fekau a Ieova ki a au: 9 “Konei a pati a Ieova ne fai mai, ‘I te auala eiloa tenā ka fakaseai ei ne au a te fakamatamata o Iuta mo te fakamatamata lasi o Ielusalema.+ 10 Konei a tino amio matagā kolā e ita ma faka‵logo mai ki aku pati,+ kolā e tau‵tali atu i olotou loto ma‵keke,+ kae kolā e tau‵tali atu i nisi atua, e tavini kae ifo atu ki mea konā, ka fai eiloa penei mo te fusi telā ko seai eiloa sena aoga.’ 11 ‘Me pelā eiloa mo te fusi e ‵piki ki te taugasulu o se tagata, ne fai ne au te kāiga kātoa o Isalaelu mo te kāiga kātoa o Iuta ke ‵piki mai ki a au,’ ko te folafolaga a Ieova, ‘ke fai latou mo oku tino,+ se igoa,+ se vikiga, mo se mea gali. Kae ne seki faka‵logo mai latou.’+
12 “Kae e ‵tau foki mo koe o avatu a te fekau tenei ki a latou, ‘Konei a pati a Ieova te Atua o Isalaelu ne fai mai: “A tiā ‵lasi katoa e ‵tau o faka‵fonu ki uaina.”’ Kae ka tali atu latou ki a koe, ‘E a, e se iloa ne matou me e ‵tau eiloa o faka‵fonu a tiā ‵lasi katoa ki uaina?’ 13 Tenā ko fai atu ei koe ki a latou, ‘Konei a pati a Ieova ne fai mai: “Ko fai nei ne au a tino katoa o te fenua tenei ke ko‵nā,+ ko tupu kolā e saga‵saga i te nofogaaliki o Tavita, ko faitaulaga mo pelofeta mo tino katoa kolā e ‵nofo i Ielusalema. 14 Kae ka ‵foa ne au te suā tino ki te suā tino, e penā foki a tamana mo tama tāgata,” ko te folafolaga a Ieova.+ “Ka se fakaasi atu ne au te atafai io me ko te loto fanoanoa io me ko te alofa fakamagalo ki a latou; ka seai se mea e taofi ne ia au mai te fakamaseiga o latou.”’+
15 Faka‵logo kae ‵saga tonu mai.
Sa fakamaua‵luga, me i a Ieova ko oti ne faipati mai.
16 Tuku atu te ‵malu ki a Ieova tou Atua
Koi tuai o aumai ne ia te pouliga
Kae koi tuai o ‵siga ou vae i mauga i te vaveao ‵malu.
Ka fakamoemoe koe ki te mainaga,
Kae ka aumai ne ia te pouliga lasi;
Kae ka ‵fuli ne ia ki se pouliga matolu.+
17 Kae kafai e ita koe ma fakalogo mai,
Ka tagi au i se koga ‵muni ona ko tou fakamatamata.
Ka ma‵ligi oku loimata, kae ka ‵fonu oku mata i loimata,+
Me i te lafu mamoe a Ieova+ ko oti ne ave fakapagota.
18 Fai atu ki te tupu mo te mātua o te tupu,+ ‘Saga‵saga i se koga malalo,
Me i tou kalauna gali ka tō ifo mai i tou ulu.’
19 A fakai i te feitu ki saute ko ‵pono, kae seai se tino ke ‵tala ne ia a fakai konā.
Kae ko oti ne ave fakapagota a Iuta kātoa, ne ave fakapagota katoa.+
20 Kilo aka ou mata kae onoono atu ki a latou kolā e o‵mai mai i mātū.+
Tefea te lafu ne tuku atu ki a koe, ko au mamoe ‵gali?+
21 Ne a au pati ka fai atu māfai ko oko mai tou fakasalaga
Mai i ou taugasoa ‵pili kolā ne fai taugasoa koe ki ei i te kamataga?+
E a, ka se oko atu ki a koe a te ‵mae o se fafine fanau, e pelā mo te ‵mae o se fafine ka fai o fanau?+
22 Kae kafai ko fai aka koe i tou loto, ‘Kaia ko oko mai ei a mea konei ki a au?’+
Ona ko te uke o au mea ‵se tenā ko ‵sae ei kea‵tea tou lavalava+
Kae ko ou mulivae ko ‵mae malosi.
23 E a, e mafai ne se tino Kusi* o ‵fuli tena pa‵kili, io me ‵fuli ne te lepoti ana ila?+
Kafai e mafai, ko mafai ei ne koe o fai te mea ‵lei,
A koe telā ne akoako ke fai te mea masei.
24 Tenā ka fakasalalau ei ne au a latou e pelā me ne kausaito e agina i te matagi o te toafa.+
25 Tenei tou tusaga, ko te vaega ne fua ne au mō koe,” ko te folafolaga a Ieova,
“Me ko oti ne fakapuli ne koe au+ kae talitonu koe ki mea ‵loi.+
26 Tela la, ka sau aka ne au tou lavalava ki luga i ou mata,
Kae ka lavea atu i ei tou masiasi,+
27 Ko au faifaiga mulilua+ mo au tagi e pelā me se solofanua e fina ki amioga fakatauavaga,
Ko au faifaiga talitāgata matagā.
I luga i tamā mauga, i te fatoaga,
Ne lavea ne au au amioga fakatakalia‵lia.+
Kalofa eiloa i a koe, e Ielusalema!
E pefea te leva ka tumau ei koe i te sē ‵ma?”+