Ielemia

26 I te kamataga o te pulega a Ieoiakimo+ te tama tagata a Iosia, te tupu o Iuta, ne oko mai te fekau tenei mai i a Ieova: 2 “Konei a pati a Ieova ne fai mai, ‘Tu i te koga ateatea o te fale o Ieova kae faipati atu e uiga ki tino katoa i fakai o Iuta kolā e o‵mai o tapuaki* i te fale o Ieova. Fai atu ki a latou a mea katoa e fakatonu atu ne au ki a koe; ke mo a eiloa ma tapale kea‵tea se pati mai i ei. 3 E se taumate ka faka‵logo latou kae tiakina ne tino taki tokotasi olotou auala matagā, kae ka ‵fuli toku mafaufau e uiga ki te fakalavelave e manako au o fakaoko atu ki luga i a latou ona ko olotou faifaiga matagā.+ 4 Fai atu ki a latou: “Konei a pati a Ieova ne fai mai, ‘Kafai e se faka‵logo mai koutou ki a au mai te tau‵tali i taku tulafono* telā ne tuku ne au i otou mua, 5 mai te faka‵logo ki pati a aku tavini ko pelofeta, kolā e uga atu faeloa ne au ki a koutou, kolā e seki faka‵logo koutou ki ei,+ 6 tenā ko fai ei ne au te fale tenei e pelā mo Sailo,+ kae ka fai ne au te fakai tenei e pelā me se mala ki atufenua katoa o te lalolagi.’”’”+

7 Kae ne lagona eiloa ne faitaulaga mo pelofeta mo tino katoa a pati konei ne faipati atu ne Ielemia i te fale o Ieova.+ 8 Tela la, i te otiga ne faipati atu ne Ielemia a mea katoa ne fakatonu atu ne Ieova ke fai atu ki tino katoa, tenā ne puke ei a ia ne faitaulaga mo pelofeta mo tino katoa kae fai atu ki ei: “A koe ka mate eiloa. 9 Kaia ne ‵valo ei koe i te igoa o Ieova, kae fai atu, ‘A te fale tenei ka fai pelā mo Sailo, kae ko te fakai tenei ka fakamaseigina kae tuku tiaki e aunoa mo se tino e ‵nofo i ei’?” Kae ne maopoopo atu a tino katoa ki tafa o Ielemia i te fale o Ieova.

10 I te ‵logoga o pelenise o Iuta i pati konei, ne o‵mai latou mai i te fale o te tupu ki te fale o Ieova kae saga‵saga i te auala ki loto o te mataloa fou o te fale o Ieova.+ 11 Ne fai atu a faitaulaga mo pelofeta ki pelenise mo tino katoa: “A te tagata tenei e ‵tau o fakasala ki te mate,+ me ne ‵valo mai ne ia a mea e uiga ki te fakai tenei e pelā mo mea ne lagona ne koutou ki otou taliga.”+

12 Tenā ne fai atu ei a Ielemia ki pelenise katoa mo tino katoa: “Ko Ieova eiloa ne uga mai ne ia au ke ‵valo atu a pati katoa konā ne lagona ne koutou e uiga ki te fale tenei mo te fakai tenei.+ 13 Tela la, ke na ‵fuli nei otou auala mo otou faifaiga kae faka‵logo ki te leo o Ieova te otou Atua, kae ka ‵fuli ne Ieova tena mafaufau e uiga ki te fakalavelave ne fai mai a ia me ka oko atu ki a koutou.+ 14 Kae e pelā mo au, ko maua ne koutou au. Fai ki a au so se mea e ‵lei kae tonu i te otou kilokiloga. 15 Ke mautinoa fua i a koutou me kafai e tamate ne koutou au, ko aumai ne koutou a toto o te tino e seai sena ‵se ki luga i a koutou eiloa, ki luga i te fakai tenei kae ki luga i tino e ‵nofo i ei, me i te tonuga loa, ko Ieova eiloa ne uga mai ne ia au ke faipati atu ki a koutou a pati konei ke lagona ne koutou.”

16 Tenā ne fai atu ei a pelenise mo tino katoa ki faitaulaga mo pelofeta: “A te tagata tenei e se ‵tau o fakasala ki te mate, me ne faipati mai a ia ki a tatou i te igoa o Ieova te ‵tou Atua.”

17 E se gata i ei, ne ‵tu aka a nisi toeaina o te fenua kae kamata o fai atu ki te fakapotopotoga kātoa o tino: 18 “A Mika+ te tino Moleseta ne ‵valo atu i aso o te tupu o Iuta ko Hesekia,+ kae ne fai atu a ia ki tino katoa o Iuta, ‘Konei a pati a Ieova o kautau ne fai mai:

19 “E mata, ne tamate a ia ne te tupu o Iuta ko Hesekia mo Iuta kātoa? E a, ne seki mataku a ia ki a Ieova kae fakatagi atu ke maua te taliaga a Ieova, ko te mea ke ‵fuli te mafaufau o Ieova e uiga ki te fakalavelave telā ne fai atu ne ia me ka oko atu ki a latou?+ Tela la, ko aumai fua ne tatou a te fakalavelave lasi ki luga i a tatou eiloa.

20 “Kae e isi se suā tagata ne ‵valo i te igoa o Ieova, ko Ulita te tama tagata a Semaia mai Kiliata-iealima,+ telā ne ‵valo atu o ‵teke ki te fakai tenei mo te laukele tenei i pati kolā e ‵pau mo pati a Ielemia. 21 Ne lagona ne te Tupu ko Ieoiakimo+ mo ana tāgata ‵mafi katoa mo pelenise katoa ana pati, kae ne ‵sala a te tupu ke tamate a ia.+ I te logoga a Ulita i te mea tenā, ne mataku a ia kae tele ki Aikupito. 22 Tenā ne uga atu ei ne te tupu ko Ieoiakimo a Elenatano+ te tama tagata a Akopa mo nisi tāgata fakatasi mo ia ki Aikupito. 23 Ne aumai ne latou a Ulita mai i Aikupito kae avatu a ia ki te Tupu ko Ieoiakimo, telā ne ta ne ia ki te pelu+ kae ‵pei atu tena foitino mate ki te koga e tanu ei a tino ma‵tiva.”

24 Kae ko Aikamo+ te tama tagata a Safana+ ne ‵lago atu ki a Ielemia, tenā ne seki tuku atu ei a ia ki lima o tino ke tamate.+