Nauma
2 A ia telā e fakasalalau valevale ne ia a mea ko fanaka o ‵teke koe.*+
Leoleo a ‵pui ma‵losi.
Onoono ki te auala.
Fakatoka koutou kae fakamaopoopo mai otou malosi kātoa.
2 Me ka toe fakafoki atu ne Ieova te ‵malu o Iakopo,
Fakatasi mo te ‵malu o Isalaelu,
Me i tino fakamasei mea ko oti ne fakamasei ne latou a latou konā;+
Kae fakamasei foki ne latou a somo kolā ko ‵sae aka.
3 A talita a ana tāgata ‵mafi ne vali ke kula,
Ana toa ‵mafi e ‵pei ki gatu lanu kula ‵ki.
A fiti o ana kaliota tau e ula pelā me ne afi
I te aso e fakatoka ei a ia ki te taua,
Kae ko eva valevale mai i ei a tao mai lakau ko iunipa.
4 A kaliota tau ko ‵tele fakavalevale i loto i auala.
E fakatau ‵tele ki luga kae ki lalo foki i malae o te fakai.
E maina latou e pelā me ne molisulu ‵ka mo uila malapu‵lapu.
5 Ka ‵kami mai ne ia ana ofisa.
Ka pa‵kū latou māfai ko gasolo aka ki mua.
E fakatau ‵tele latou ki ana ‵pui;
E fakatu ne latou se pā.
6 Ka ma‵tala eiloa a mataloa o vaitafe,
Kae ka fakaseai atu* a palesi.
7 Ko oti ne fai atu te fakatonuga: Ko tuku faka‵sau atu tou fafine,
Ko ave kea‵tea a ia, kae ko ana pologa fāfine e ‵tagi fi‵ta;
E ‵tagi pelā me ne lupe i te taimi e tuki ei olotou fatafata.*
8 I ana aso, ne fai a Nineva+ e pelā me se vai koukou,
Kae nei ko ‵tele kea‵tea latou.
“‵Tu malie! ‵Tu malie!”
Kae e seai se tino e saga mai.+
9 ‵Fao a siliva, ‵fao a aulo!
Ko se faka‵tau eiloa te uke o koloa.
A mea konā e fakaputu fakatasi mo vaegā mea tāua katoa.
10 Ko seai ne tino i te fakai, ko maofa kae masei valevale!+
Olotou loto ko liuvai i te ma‵taku, olotou tulivae ko vāi‵vai, olotou kautega ko pole‵pole;
Olotou mata katoa ko kula i te ma‵taku.
11 Tefea te koga ‵muni o leona,+ telā e fagai i ei a tamā leona,
Telā e fano i ei a te leona ki tua kae takitaki ne ia tena tamā leona,
Kae seai se tino e ma‵taku latou ki ei?
12 Ne saesae ne te leona a meakai e lava ma ana tama
Kae ta foki se manu ma ana leona fāfine.
Ne faka‵fonu ne ia tena ana ki mea ne maua ne ia,
Ana koga ‵muni ki manu ne saesae.
13 “Kiloke! Au e ‵teke ki a koe,” ko te folafolaga a Ieova o kautau,+
“Ka ‵sunu ne au ana kaliota tau ko te mea ke au,+
Kae ko au tamā leona ka tamate ki te pelu.
Ka fakagata ne au te tamatega e fai ne koe mai i te lalolagi,
Kae ka se toe lagona atu a leo o au avefekau.”+