Levitiko

10 Fakamuli ifo, ne puke ne tama tāgata a Alona taki tokotasi, ko Natapu mo Apiu,+ a lā mea tuku malala ‵ka, kae faka‵ka ki te afi kae tuku a mea ma‵nogi+ ki luga i ei. Tenā ne kamata ei o ofo atu ne lāua i mua o Ieova se afi+ telā e seki fakatonu atu ne ia ke faka‵ka ne lāua. 2 Ne tō ifo se afi mai i a Ieova, kae ne ‵ka i ei lāua,+ ‵mate atu ei lāua i mua o Ieova.+ 3 Tenā ne fai atu ei a Mose ki a Alona: “Tenei te mea ne fai mai ne Ieova, ‘Ka fai au ke tapu i va o latou kolā e ‵pili mai ki a au,+ kae ka faka‵malugina au i mua o tino katoa.’” Kae ne nofo filemu a Alona.

4 Ne ‵kami mai ne Mose a Misaeli mo Elisafana, ko tama tāgata a Usieli,+ te taina o te tamana o Alona, kae fai atu ki a lāua: “O‵mai ki konei, sau kea‵tea oulua taina mai mua o te koga tapu ki se koga i tua o te fakai.” 5 Ne o‵mai lāua kae sau kea‵tea a tāgata konā mo lā gatu ‵loa ki se koga i tua o te fakai, e ‵tusa mo pati a Mose ne fai ki a lāua.

6 Tenā ne fai atu ei a Mose ki a Alona mo ana nisi tama tāgata ko Eleasalo mo Itamala: “Ke mo a ma tuku ke makosu‵kosu otou ulu io me saesae otou gatu,+ ko te mea ke se ‵mate koutou kae ke se kaitaua a te Atua ki te fakapotopotoga kātoa. A otou taina, kolā ko tino Isalaelu katoa, ka ‵tagi fanoa‵noa ona ko tino kolā ne tamate ne Ieova ki te afi. 7 E se ‵tau mo koutou o ulu ki tua mo te mataloa o te faleie o maopoopoga i a koutou ma ‵mate, me ko oti ne ‵mili koutou ki te sinu a Ieova mo faū a tino.”+ Tela la, ne fai eiloa ne latou a mea konā e ‵tusa mo pati a Mose.

8 Tenā ne fai atu ei a Ieova ki a Alona: 9 “Ke mo a ma inu koe ki ne uaina io me ko nisi meainu ma‵losi, ko koe mo au tama tāgata kolā e fakatasi mo koe, māfai ko o‵mai koutou ki loto i te faleie o maopoopoga,+ ko te mea ke se ‵mate koutou. A te mea tenā se tulafono fakavae tumau i otou kautama katoa. 10 E fai ne te mea tenei ke faka‵kese i ei a te mea tapu mai te mea sē tapu mo te mea sē ‵ma mai te mea ‵ma,+ 11 kae ke akoako atu ki tino Isalaelu a tulafono fo‵liki katoa kolā ne fai atu ne Ieova ki a latou e auala i a Mose.”+

12 Tenā ne fai atu ei a Mose ki a Alona mo Eleasalo mo Itamala, ko ana tama tāgata kolā ne ‵toe mai: “Puke a mea ‵toe o te taulaga meakai mai i taulaga ne ofo atu i luga i te afi ki a Ieova kae ‵kai ki ei e pelā me se falaoa sē faka‵fete i tafa o te fatafaitaulaga,+ me i te mea tenā se mea e tafasili i te tapu.+ 13 E ‵tau mo koe o kai a te mea tenā i te koga tapu,+ me tenā tou tusaga mo te tusaga o au tama tāgata mai i taulaga ne ofo atu i luga i te afi ki a Ieova, me tenā te mea ne fakatonu mai ki a au. 14 Ka kai foki ne koe te fatafata o te taulaga fakagasuesue mo te vae o te tusaga tapu+ i se koga ‵ma, ko koe mo au tama tāgata mo au tama fāfine kolā e fakatasi mo koe,+ me ko oti ne tuku atu a mea konei mo fai tou tusaga mo te tusaga o au tama tāgata mai i taulaga ‵kai fakatasi a tino Isalaelu. 15 Ka aumai ne latou a te vae o te tusaga tapu mo te fatafata o te taulaga fakagasuesue fakatasi mo gako kolā ne ofo atu i luga i te afi, ko te mea ke fakagasuesue ki mua mo tua a te taulaga fakagasuesue i mua o Ieova; kae ka fai e pelā me ko te tusaga tumau o koe mo au tama tāgata kolā e fakatasi mo koe,+ e ‵tusa mo te fakatonuga a Ieova.”

16 Kae ne salasala malosi a Mose ki te kouti o te taulaga mō agasala,+ kae ne iloa aka ne ia me ko oti ne ‵sunu. Tenā ne kaitaua malosi ei a ia ki a Eleasalo mo Itamala, ko tama tāgata a Alona kolā ne ‵toe mai, kae fai atu: 17 “Kaia ne seki kai ei ne koulua a te taulaga mō agasala i te koga tapu,+ me i te mea tenā se mea e tafasili i te tapu kae ko oti ne tuku atu ne ia ki a koulua, ko te mea ke isi se tali e tuku atu ne koulua mō mea ‵se e fai ne te fakapotopotoga kātoa kae ke fai se faka‵māga mō latou i mua o Ieova? 18 Kiloke! E seki aumai ana toto ki loto i te koga tapu.+ Ne ‵tau eiloa o kai ne koulua a te mea tenā i te koga tapu, e ‵tusa mo te fakatonuga ne tuku mai ki a au. 19 Ne tali atu a Alona ki a Mose: “Kiloke! I te aso nei ne ofo atu ne lāua a lā taulaga mō agasala mo taulaga ‵sunu i mua o Ieova,+ kae ne ‵tupu eiloa a mea konei ki a au. Moi fai ne kai ne au a te taulaga mō agasala i te aso nei, e mata, ka fiafia a Ieova ki ei?” 20 I te taimi ne lagona ei ne Mose a pati konā, ne lotomalie a ia.