Levitiko

25 Ne toe faipati atu a Ieova ki a Mose i te Mauga o Sinai, ana muna: 2 “Faipati ki tino Isalaelu kae fai atu ki a latou, ‘Kafai ko oko koutou ki te fenua telā ka tuku atu ne au ki a koutou,+ e ‵tau o tausi ne te laukele se sapati ki a Ieova.+ 3 E ono tausaga e ‵tau ei o ‵toki ne koutou a fuaga i otou fatoaga, kae e ono tausaga e ‵tau ei o velevele ne koutou otou togavine, kae ka fakaputu ne koutou a fuataga o te laukele.+ 4 Kae ko te fitu o tausaga, e ‵tau o isi se sapati malōlō mō te laukele, se sapati ki a Ieova. E se ‵tau o ‵toki ne koutou a fuaga i otou fatoaga io me velevele otou togavine. 5 E se ‵tau mo koutou o tau a mea kolā ne ola aka i a latou eiloa mai saito kolā ne ‵toe i te ‵katiga o saito, e se ‵tau mo koutou o fakaputu a vine mai otou vine kolā e seki velevele. E ‵tau o tuku ke malōlō te laukele i loto i te tausaga kātoa tenā. 6 Kae e mafai o kai ne koutou a meakai kolā e ola aka i te laukele i te taimi o tena sapati, ko koe, au tavini tāgata mo tavini fāfine, au tino ga‵lue, mo tino fakaa‵tea kolā e ‵nofo tasi mo koe, e mafai o ‵kai ki ei, 7 e pelā foki mo manu ‵lata mo manu o te vao i luga i te laukele. So se mea e fua mai i te laukele e mafai o ‵kai ki ei.

8 “‘Ka lau ne koe e fitu sapati o tausaga, fitu fatele ki te fitu tausaga, kae ko te aofaki o aso o te fitu sapati o tausaga e ‵tusa mo te 49 tausaga. 9 Tenā ko fakatagi malosi ei ne koe a te pu i te fitu o masina, i te po sefulu o te masina; i te Aso o te Faka‵māga,+ e ‵tau o fai ne koe ke lagona ne tino katoa i te fenua a te ‵tagi o te pu. 10 E ‵tau mo koutou o faka‵malu a te 50 o tausaga kae folafola atu te saolotoga i te fenua ki ana tino katoa.+ Ka fai te aso tenā e pelā me se Iupeli ki a koutou, kae ko koutou taki tokotasi ka ‵foki ki otou laukele kae ko koutou taki tokotasi e ‵tau o ‵foki ki otou kāiga.+ 11 A te Iupeli ko te 50 tausaga mō koutou. A koutou ka se ‵toki fuaga io me tau a mea kolā ne ola aka i a latou eiloa mai toegā saito io me fakaputu a vine mai i vine kolā e seki velevele.+ 12 Me i te mea tenā ko te Iupeli. E ‵tau o tapu te mea tenā ki a koutou. E mafai fua o ‵kai koutou ki mea kolā e ‵fua mai i te laukele.+

13 “‘I te tausaga tenei o te Iupeli e ‵tau mo koutou taki tokotasi o toe ‵foki ki otou laukele.+ 14 Kafai e fakatau atu ne koe se mea ki tou tuakoi io me ‵togi mai ne koe se mea mai i a ia, ke mo a ma fakaloiloi ne koutou a koutou eiloa.+ 15 E ‵tau o ‵togi ne koe ne mea mai tou tuakoi e ‵tusa mo te aofaki o tausaga mai tua o te Iupeli, kae e ‵tau o fakatau atu ne ia ki a koe e ‵tusa mo te aofaki o tausaga koi ‵toe ke tau ei a lakau kaina.+ 16 Kafai e uke a tausaga koi ‵toe, e mafai o momea aka ne ia ki luga te ‵togi o te mea tenā, kae kafai ko se uke tausaga koi ‵toe, e ‵tau o tuku ifo ne ia te ‵togi ki lalo, me e fakatau atu ne ia ki a koe a fuataga kolā koi ‵tau o ‵fua mai. 17 E seai se tino i a koutou e ‵tau o fakaloiloi ne ia tena tuakoi,+ kae e ‵tau mo koutou o ma‵taku ki te otou Atua,+ me i a au ko Ieova te otou Atua.+ 18 Kafai e tau‵tali koutou i aku tulafono fakavae kae tausi ki ikuga o aku fakamasinoga, ka ‵nofo eiloa koutou mo te tokagamalie i te fenua.+ 19 Ka ‵fua mai ne te laukele ana fuataga,+ kae ka ‵kai koutou ke ma‵kona kae ‵nofo i luga i ei mo te tokagamalie.+

20 “‘Kae kafai e fai mai koutou: “Ne a mea ka ‵kai matou ki ei i te fitu o tausaga māfai e se ‵toki fuaga matou io me fakaputu a fuataga?”+ 21 Ka avatu eiloa ne au aku fakamanuiaga mō koutou i te ono o tausaga, kae ka ‵fua mai i te laukele a fuataga kolā e lava mō koutou i tausaga e tolu.+ 22 Tenā ko ‵toki ei otou fuaga i te valu o tausaga kae ‵kai koutou ki fuataga mua ke oko ki te iva o tausaga. Ka ‵kai eiloa koutou ki fuataga mua konā ke oko ki te taimi e fua mai ei a fuataga o lakau kolā ne ‵toki.

23 “‘E se ‵tau o fakatau atu ne koutou a te laukele ki tua,+ me i o oku te laukele tenā.+ Me i a koutou ne tino fakaa‵tea kae ne tino e se ‵nofo tumau i taku kilokiloga.+ 24 Kae e pelā mo otou laukele katoa, e ‵tau o maua ne koutou te saolotoga ke toe ‵togi mai a laukele konā.

25 “‘Kafai ko gasolo o mativa a tou taina kae ko ‵tau o fakatau atu ne ia se vaega o tena manafa, e ‵tau o toe ‵togi mai ne se kāiga pili o ia a te mea telā ne fakatau atu ne tena taina ki tua.+ 26 Kafai e seai se kāiga pili o te tino ke toe ‵togi ne ia te laukele tenā, kae ko gasolo a ia o maumea kae ko mafai foki o ‵togi ne ia te mea tenā, 27 e ‵tau o galue ne ia te ‵togi o te mea tenā ki te aofaki o tausaga talu mai te taimi ne fakatau atu ne ia ki tua, ko faka‵foki ei te ‵toega o tupe ki te tino ne ‵togi ne ia. Tenā ko mafai ei o toe foki a ia ki tena manafa.+

28 “‘Kae kafai e se mafai o toe ‵togi mai ne ia a tena manafa mai i te tino tenā, ka nofo eiloa mo te tino tenā a te manafa ke oko ki te tausaga o te Iupeli;+ kae ka toe fakafoki atu ki a ia i te Iupeli, ko foki atu ei a ia ki tena manafa.+

29 “‘Kafai e fakatau atu ne se tagata sena fale i loto i se fakai telā e ‵pui, a tena saolotoga o toe ‵togi mai te fale tenā ka tumau eiloa ke oko ki te fakaotiga o te tausaga talu mai te taimi ne fakatau atu ei ne ia tena fale; a tena saolotoga o toe ‵togi+ mai tena fale e tasi fua te tausaga. 30 Kae kafai e seki toe ‵togi mai i te fakaotiga o te tausaga kātoa e tasi, a te fale i loto i te fakai telā e ‵pui ka fai eiloa ma te tino telā ne ‵togi ne ia i tena kautama kātoa. Ka se toe fakafoki i te taimi o te Iupeli. 31 Kae ko fale ‵nofo kolā e seai ne ‵pui e fakatamilo i ei e ‵tau o fai pelā me ne vaega o te laukele o te fenua. E maua eiloa te saolotoga i taimi katoa ke toe ‵togi mai a te fale tenā, kae ka toe fakafoki atu i te taimi o te Iupeli.

32 “‘Kae pelā mo fale o te kau Levi i loto i olotou fakai,+ ka maua eiloa ne te kau Levi a te saolotoga tumau ke toe ‵togi mai a fale konā. 33 Kafai e se toe ‵togi mai a kope totino o te kau Levi, a te fale telā ne fakatau atu i te fakai ka fakafoki atu ki a latou i te taimi o te Iupeli;+ me i fale i fakai o te kau Levi ne kope totino eiloa o latou i loto i tino Isalaelu.+ 34 Kae ko malae moukuā+ kolā e fakatamilo i olotou fakai e se ‵tau o fakatau atu ki tua, me konā eiloa olotou kope totino.

35 “‘Kafai ko gasolo o mativa a tou taina i ou tafa kae ko se mafai o tausi atu ki a ia eiloa, e ‵tau mo koe o tausi a ia+ e pelā mo koe ma tausi ki se tino fakaa‵tea kae e se nofo tumau i te fenua,+ ko te mea ke ola fakatasi a ia mo koe. 36 Ke mo a ma puke ne koe ne tupe silia io me ne tupe fakaopoopo mai i a ia.+ E ‵tau mo koe o mataku ki tou Atua,+ kae ka ola eiloa koe fakatasi mo tou taina. 37 E se ‵tau mo koe o pasene+ a tena tupe ne kaitalafu mai i a koe io me tuku atu au meakai ke maua ne tupe fakaopoopo mai i ei. 38 Au ko Ieova te otou Atua, telā ne aumai ne au koutou ki tua mo te fenua o Aikupito+ ke tuku atu ki a koutou a te fenua ko Kanana, ke fakatalitonu atu i a au ko te otou Atua.+

39 “‘Kafai ko gasolo o mativa a tou taina i ou tafa kae ko ‵tau o fakatau atu a ia ki a koe,+ e se ‵tau o faimālō ne koe a ia ke galue e pelā me se pologa.+ 40 E ‵tau o fai a ia e pelā me se tino galue ‵togi,+ e pelā me se tino e se nofo tumau i te fenua. E ‵tau o tavini a ia ki a koe ke oko ki te tausaga o te Iupeli. 41 Tenā ko tiaki ei ne ia a koe, ko ia mo ana tama‵liki kolā e ‵nofo mo ia, kae toe ‵foki atu ki tena kāiga. E ‵tau o toe foki a ia ki laukele o ana tupuga.+ 42 Me i a latou ko aku pologa kolā ne aumai ne au ki tua mo te fenua o Aikupito.+ E se ‵tau o fakatau atu a latou ki tua e pelā mo te auala e fakatau atu ei se pologa. 43 E se ‵tau mo koe o fai fakamasei a ia,+ kae e ‵tau mo koe o mataku ki tou Atua.+ 44 A otou pologa tāgata mo pologa fāfine e ‵tau o ‵mai mai fenua i otou tafa, e mafai o ‵togi mai ne koutou mai i a latou se pologa tagata io me se pologa fafine. 45 E pelā foki mo tama tāgata a tino e se ‵nofo tumau kolā e ‵nofo tasi koutou,+ e mafai o ‵togi ne koutou ne pologa mai i a latou mo olotou kāiga kolā ne fa‵nau i loto i te otou fenua; ko fai ei latou e pelā me ne kope totino o koutou. 46 E mafai o tuku atu ne koutou a latou ki otou tama tāgata e pelā me se ‵tofi tumau mō latou. E mafai o fakaaoga ne koutou a latou e pelā me ne tino ga‵lue, kae e se ‵tau mo koutou o fai fakamasei otou taina Isalaelu.+

47 “‘Kafai ko gasolo o maumea se tino fakaa‵tea io me se tino e se nofo tumau i te fenua, kae ko gasolo o mativa a tou taina i ana tafa, kae ko ‵tau o fakatau ne ia a ia ki te tino fakaa‵tea io me ki te tino e se nofo tumau i te fenua, io me ki se tino o te kāiga o te tino fakaa‵tea, 48 ka maua faeloa ne ia te saolotoga ke toe ‵togi mai a ia māfai ko oti ne fakatau atu a ia ki tua. E mafai o toe ‵togi mai a ia ne se tokotasi o ana taina,+ 49 io me ko tena fakatamana io me ko te tama a tena fakatamana e mafai o toe ‵togi mai ne ia a ia, io me ko so se kāiga pili, se tino o tena kāiga, e mafai o toe ‵togi mai ne ia a ia.

“‘Io me kafai ko gasolo a ia o maumea, e mafai o toe ‵togi mai ne ia a ia eiloa.+ 50 E ‵tau o galue fakatasi ne lāua mo te tino telā ka ‵togi ne ia a ia mai te tausaga ne fakatau atu ei ne ia a ia ki tua ke oko ki te tausaga o te Iupeli,+ kae ko te tupe o tena fakatauatuga e ‵tau o fetaui mo te aofaki o tausaga.+ Ana aso galue i te taimi tenā, ka fakavae eiloa ki aso o te tino e galue ‵togi.+ 51 Kafai koi uke a tausaga e ‵toe, e ‵tau o fetaui a tena ‵togi mo te aofaki o tausaga koi ‵toe. 52 Kae kafai e toe fia fua a tausaga e ‵toe ke oko ki te tausaga o te Iupeli, e ‵tau o galue aka ne ia kae ‵togi atu tena ‵togi e ‵tusa mo te aofaki o tausaga koi ‵toe. 53 E ‵tau o tumau a ia i te tavini atu ki tena matai i tausaga katoa e pelā me se tino galue ‵togi, kae e ‵tau o onoono faka‵lei koe ke mo a ma fai fakamasei ne ia a tou tagata.+ 54 Kae kafai e se mafai o toe ‵togi mai ne ia a ia eiloa mai lalo i fakanofoga konei, tenā ko saoloto ei a ia i te tausaga o te Iupeli,+ ko ia mo ana tama‵liki kolā e ‵nofo mo ia.

55 “‘Me i tino Isalaelu ko aku pologa totino. Ko aku pologa kolā ne aumai ne au ki tua mo te fenua o Aikupito.+ Au ko Ieova te otou Atua.