Numela

5 Ne toe faipati atu a Ieova ki a Mose, ana muna: 2 “Fakatonu atu ki tino Isalaelu ke ave kea‵tea mai te fakai so se tino e maua ne te lepela+ mo so se tino e ‵sali mai a ukau+ i tena koga tapu mo so se tino telā ko se ‵ma mai te foitino mate o se tino.+ 3 Faitalia me se tagata io me se fafine e ‵tau o ave ne koe a latou ki tua. E ‵tau o ave ne koe a latou ki tua mo te fakai, ko te mea ke se fakalailai+ ne latou te fakai telā e ‵nofo fakatasi+ ei au mo latou.” 4 Tela la, ne fai eiloa ne tino Isalaelu te mea tenā kae ave latou ki tua mo te fakai. Ne fai eiloa ne tino Isalaelu a te mea telā ne fai atu ne Ieova ki a Mose.

5 Ne toe faipati atu a Ieova ki a Mose, ana muna: 6 “Fai atu ki tino Isalaelu, ‘Kafai ne fai ne se tagata io me se fafine se agasala telā e fai sāle ne tino kae ko se fakamaoni a ia ki a Ieova, ko oti eiloa ne fai ne te tino tenā se agasala.+ 7 E ‵tau o fakaasi+ ne ia* a te agasala telā ne fai ne ia,* kae e ‵tau o fakafoki ne ia te ‵togi kātoa ke ‵togi ki ei te agasala telā ne fai ne ia, kae toe fakaopoopo atu ki ei te tasi-vae-lima o te ‵togi+ o te mea tenā. E ‵tau o tuku atu ne ia te mea tenā ki te tino telā ne agasala a ia ki ei. 8 Kafai e seai se kāiga pili o te tino tenā ke tuku atu ki ei te ‵togi, e ‵tau eiloa o fakafoki atu te mea tenā ki a Ieova, kae ka fai a te mea tenā ma te faitaulaga, i tafa o te mamoe o te faka‵māga telā ka fai ne ia ki ei te faka‵māga mō ia.+

9 “‘A meaalofa tapu+ katoa mai tino Isalaelu kolā e avatu ki te faitaulaga ka fai katoa ma ia.+ 10 A mea tapu katoa a tino taki tokotasi ka fai eiloa ma latou. So se mea e tuku atu ne latou ki te faitaulaga, ka fai eiloa a mea konā ma te faitaulaga.’”

11 Ne toe faipati atu a Ieova ki a Mose, ana muna: 12 “Faipati ki tino Isalaelu kae fai atu ki a latou, ‘Tenei te mea e ‵tau o fai māfai ko seke te auala o te avaga a se tagata kae ko se fakamaoni ki a ia 13 kae ne ‵moe fakatauavaga tou fafine mo se isi tagata,+ kae e se iloa ne tena avaga kae ne ‵funa aka faeloa a te mea tenā, me ko oti ne fakalailai ne tou fafine a ia eiloa kae e seai se molimau e uiga ki a ia, kae e seki ‵poa aka eiloa tou fafine: 14 Faitalia me masalosalo kae fakalotolotolua te tagata ki te fakamaoni o tena avaga māfai ne fakalailai ne tou fafine a ia eiloa, io me ne masalosalo kae fakalotolotolua tou tagata ki te fakamaoni o tena avaga māfai ne seki fakalailai ne tou fafine a ia eiloa, 15 e ‵tau o aumai ne te tagata a tena avaga ki te faitaulaga fakatasi mo se taulaga mō tou fafine, ko te tasi-vae-sefulu o te efa* o falaoa ‵mata ne faite mai te kalite. E se ‵tau o ‵ligi ne ia te sinu ki luga i ei io me tuku atu ne pulu lipano ki luga i ei, me i te mea tenā se taulaga meakai mō te loto masalosalo, se taulaga meakai e fakamasaua mai ei a te agasala ne fai.

16 “‘Ka aumai ne te faitaulaga tou fafine ki mua kae fakatu atu i mua o Ieova.+ 17 Ka puke ne te faitaulaga a te vai tapu i loto i se fagu kele, kae puke aka ne te faitaulaga ne mu ‵pefu mai te fola o te faleie tapu kae tuku atu ki loto i te vai tenā. 18 Kae ka fakatu ne te faitaulaga a te fafine i mua o Ieova kae ‵tala ana laulu kae tuku atu ki tena alofilima a te taulaga meakai mō se fakamasauaga, telā ko te taulaga meakai mō te loto masalosalo,+ kae e ‵tau o puke ne te faitaulaga i tena lima a te vai ‵kona telā e aumai ei te malaia.+

19 “‘Tenā ko fai ei ne te faitaulaga ke tauto te fafine, ana muna ki te fafine: “Kafai e seai se isi tagata ne ‵moe fakatauavaga mo koe i te taimi koi nofo ei koe mai lalo i te pulega a tau avaga+ kae ne seki seke foki tou auala kae fai ei ke lailai koe, ke saoloto la koe i te ikuga o te vai ‵kona telā e aumai ei te malaia. 20 Kae kafai ne seke tou auala i te taimi koi nofo ei koe mai lalo i te pulega a tau avaga mai i te fakalailaiga o koe, kae ko oti koe ne ‵moe fakatauavaga mo se isi tagata+ i tafa o tau avaga​—” 21 Tenā ko fai ei ne te faitaulaga ke fai ne te fafine se tautoga telā e aofia i ei se fakamalaiaga, kae ka fai atu a te faitaulaga ki te fafine: “Ke fai koe ne Ieova mo fai se fakaakoakoga ki tino māfai e fai ne latou a fakamalaiaga mo tautoga, kae ka fai ne Ieova ke tō kea‵tea* tou kauaga* kae fai ei ke ‵kisa tou tinae. 22 A te vai telā e aumai ei te malaia ka ulu atu ki loto i ou gakau ke faka‵kisa i ei tou tinae kae fai ei ke tō kea‵tea* tou kauaga.”* Ka oti a pati konei, e ‵tau o fai atu te fafine: “Amene! Amene!”*

23 “‘Tenā ko tusi ei ne te faitaulaga a fakamalaiaga konei ki loto i te tusi kae ‵fulu atu ki loto i te vai ‵kona. 24 Ka fai ne ia te fafine ke inu ki te vai ‵kona telā e aumai ei te fakamalaiaga, kae ko te vai telā e aumai ei te fakamalaiaga ka ulu atu ki loto i tou fafine ke fai ei ke ‵kona. 25 Kae e ‵tau o puke ne te faitaulaga a te taulaga meakai mō te loto masalosalo+ mai te lima o te fafine kae fakagasuesue a te taulaga meakai ki mua mo tua i mua o Ieova, kae ka avatu ne ia ke pili ki te fatafaitaulaga. 26 Ka faka‵fonu ne te faitaulaga a tena lima ki te taulaga meakai telā e fai pelā me se taulaga o fakamasauaga kae fai ke au i luga i te fatafaitaulaga,+ ka oti ko fai ei ne ia ke inu a te fafine ki te vai tenā. 27 I te taimi e fai ei ne ia ke inu tou fafine ki te vai, kae kafai ne fakalailai ne tou fafine a ia eiloa mai te faiga o se mea ke se fakamaoni ei a ia ki tena avaga, ka ulu atu te vai ki loto i a ia, ko te vai telā e aumai ei te fakamalaiaga kae fai pelā me se mea ‵kona i loto i a ia, kae ka ‵kisa tena tinae, kae ka tō kea‵tea* tena kauaga,* kae ka fai a te fafine e pelā me se mea fakamalaia i loto i ana tino. 28 Kae kafai e seki fakalailai ne te fafine a ia eiloa kae e ‵ma, ko saoloto ei tou fafine mai te fakasalaga tenā, kae ka mafai ei o faitama tou fafine kae fai ana tama.

29 “‘Tenei te tulafono e uiga ki te loto masalosalo,+ māfai se fafine ko kamata o seke tena auala kae fakalailai ne ia a ia eiloa a koi nofo mai lalo i te pulega a tena avaga, 30 io me se tagata e masalosalo kae fakalotolotolua e uiga ki te fakamaoni o tena avaga; e ‵tau o fai ne ia ke tu tena avaga i mua o Ieova, kae e ‵tau o fakaaoga ne te faitaulaga a tulafono katoa konei ki a ia. 31 Ka saoloto a te tagata mai te mea ‵se tenā, kae ka fakasala te fafine ona ko tena mea ‵se ne fai.’”