Te Muamua Samuelu

10 Tenā ne puke ei ne Samuelu te tiā sinu kae ‵ligi ki luga i te ulu o Saulo.+ Ne uma atu a ia ki tou tagata kae fai atu: “E a, e se ko Ieova ne fakaeke ne ia koe ke fai mo takitaki+ o ana tino?+ 2 Kafai ko tiaki ne koe au i te aso nei, ka maua ne koe a tāgata e tokolua i tafa o te tanuga o Lasela+ i te kogā fenua o Peniamina i Sielesa, kae ka fai atu lāua ki a koe, ‘A asini kolā ne fano koe o ‵sala ko oti ne maua, kae ko tou tamana ko se fia saga atu nei ki ana asini+ kae ko manavase ki a koe. Ana muna: “Se a taku mea ka fai ki taku tama?”’ 3 Fano eiloa mai konā ke oko atu koe ki te lakau lasi o Tapola, kae ka fetaui koe i ei mo tāgata e tokotolu kolā e olo aka ki Peteli+ o tapuaki ki te Atua tonu, e tokotasi e ave ne ia a tamā kouti e tolu, e tokotasi e ave ne ia a falaoa e tolu, kae tokotasi e ave ne ia se tiā uaina lasi. 4 Kae ka fesili atu latou me e a mai koe, kae tuku atu ki a koe a falaoa e lua, kae e ‵tau mo koe o talia a falaoa konā mai i a latou. 5 Ka oti ko fano ei koe ki te tamā mauga o te Atua tonu, telā e isi ne sotia leoleo o tino Filisitia i ei. Kafai e oko atu koe ki te fakai, ka fetaui koe mo se potukau o pelofeta ko olo ifo mai te koga maluga, kae e isi ne tino e olo i olotou mua mo mea fakatagi‵tagi e isi ne uka i ei mo samupelini mo faili mo kitala i te taimi e ‵valo fakapelofeta ei latou. 6 A te agaga o Ieova ka fakamalosi ne ia koe,+ kae ka ‵valo fakapelofeta koe fakatasi mo latou kae ‵fuli koe mo fai se tino fou.+ 7 Kafai ko ‵tupu a fakailoga konei, ke fai ne koe so se mea e mafai ne koe o fai, me ka fakatasi atu eiloa a te Atua tonu ki a koe. 8 Tenā ko mua atu ei koe i a au o fano ki Kilikala,+ kae ka fanatu au ki a koe i konā o ofo a taulaga ‵sunu mo taulaga ‵kai fakatasi. E ‵tau o faka‵tali koe i aso e fitu ke oko atu au ki a koe. Ko fakailoa atu ei ne au ki a koe a mea kolā e ‵tau o fai ne koe.”

9 I te taimi eiloa ne mafuli ei a Saulo o fano mai i a Samuelu, ne kamata o fulifuli ne te Atua a tena loto ke fai mo fai se tino fakaa‵tea, kae ne taunu katoa a fakailoga konei i te aso tenā. 10 Tenā ne olo atu ei lāua mai konā ki te mauga, kae ne fetaui tou tagata mo se potukau o pelofeta. I konā eiloa ne fakamalosi a ia ne te agaga o te Atua,+ kae ne kamata a ia o ‵valo fakapelofeta+ fakatasi mo latou. 11 I te laveaga ne tino katoa kolā ne masani muamua mo ia me i a ia e ‵valo fakapelofeta fakatasi mo te kau pelofeta, ne fai aka latou i a latou eiloa: “Se a te mea ko tupu ki te tama tagata a Kiso? E a, a Saulo nei ko fai foki pelā me se pelofeta?” 12 Kae ne fai atu se tagata i konā: “Kae ko oi te lotou tamana?” Tenā ne kamata ei o fai te tugapati* penei: “E a, a Saulo nei ko fai foki pelā me se pelofeta?”+

13 I tena otiga ne ‵valo fakapelofeta, fanaka ei a ia ki te koga maluga. 14 Fakamuli ifo, ne fesili atu a te taina o te tamana o Saulo ki a ia mo tena tavini: “Koulua ne olo ki fea?” Ne tali atu a ia: “O ‵sala a asini,+ kae ne seki maua ne māua, tenā ne olo ei māua ki a Samuelu.” 15 Ne fesili atu a te fakatamana o Saulo: “Fakamolemole fai mai aka me ne a pati ne fai atu ne Samuelu ki a koe?” 16 Ne tali atu a Saulo ki tena fakatamana: “Ne fai mai a ia me ko oti ne maua a asini.” Kae ne seki fai atu ne Saulo a pati ne fai atu ne Samuelu e uiga ki tena tofiga e pelā me se tupu.

17 Tenā ne fakamaopoopo ei ne Samuelu a tino ki a Ieova i Mesepa+ 18 kae fai atu ki tino Isalaelu: “Konei a pati a Ieova te Atua o Isalaelu ne fai: ‘Ko au ne aumai ne au a Isalaelu kea‵tea mai Aikupito kae faka‵sao ne au koutou mai i lima o tino Aikupito+ kae mai i lima foki o malo katoa kolā ne pule fakasaua atu ki a koutou. 19 Kae i te aso nei ko oti ne ‵teke atu koutou ki te Atua+ telā ko te Fakaola o koutou mai otou fakalavelave mo otou puapuaga katoa, kae fai aka koutou: “Ikai, e ‵tau o fakasopo aka ne koe se tupu ke pule i a matou.” Nei la, ke ‵tu mai koutou i otou tulaga i mua o Ieova i otou matakāiga mo otou potukau o taki tokoafe.’”*

20 Tenā ne fai ei ne Samuelu ke fakapili‵pili mai a matakāiga katoa o Isalaelu,+ kae ne filifili aka a te matakāiga o Peniamina.+ 21 Kae ne fai ne ia a tino o te matakāiga o Peniamina ke fakapili‵pili mai, kae ne filifili aka a te kāiga o Matila. Fakamuli loa, ne filifili aka ei a Saulo te tama tagata a Kiso.+ Kae i te lotou oloatuga o ‵sala ki ei, ne seki maua ne latou a ia. 22 Tenā ne fesili atu ei latou ki a Ieova:+ “Kai vau aka loa penei a te tagata tenā?” Ne tali atu a Ieova: “Tenā e ‵muni i te koga e tuku ei a kope.” 23 Ne ‵tele atu latou o puke mai a ia mai konā. I te taimi ne tu ei a ia i te kogaloto o tino, e loa atu a ia i tino katoa mai ana tuauma ke oko ki tena ulu.+ 24 Ne fai atu a Samuelu ki tino katoa: “E lavea ne koutou a te tino ne filifili ne Ieova,+ telā e seai se tino mai tino katoa e ‵pau mo ia?” Kae ne kamata o ka‵laga atu a tino: “Ke ola leva te tupu!”

25 Ne faipati atu a Samuelu ki tino e uiga ki mea kolā e ‵tau o avatu ki tupu+ kae tusi ne ia ki se tusi kae tuku atu i mua o Ieova. Oti aka, uga ei ne Samuelu a tino katoa ke olo ki olotou fale. 26 Ne fano foki a Saulo ki tena fale i Kipea, fakatasi mo tāgata ‵toa kolā ne fakamalosi ne Ieova olotou loto. 27 Kae ne fai aka a nisi tāgata e seai ne aoga: “E mafai pefea ne te tino tenei o faka‵sao tatou?”+ Ne takalia‵lia latou ki a ia, kae seai ne olotou meaalofa ne avatu ki a ia.+ Kae e seai eiloa sena pati ne fai atu e uiga ki te mea tenā.*