Te Muamua Samuelu
11 Tenā ne vau ei a Nahasa te tino Amoni+ o fai taua mai ki Iapese+ i Kileata. Ne fai atu a tāgata Iapese katoa ki a Nahasa: “Fai se feagaiga mo matou, kae ka tavini atu matou ki a koe.” 2 Ne fai atu a Nahasa te tino Amoni ki a latou: “Ka fai ne au se feagaiga māfai e talia ne koutou te mea tenei: ke ‵kape a ‵kano mata fakaatamai o koutou katoa. E fai ne au te mea tenei ke fakamasiasi ei a Isalaelu kātoa. 3 Ne tali atu a toeaina o Iapese ki a ia: “Tuku mai ne aso e fitu ko te mea ke uga atu ne matou a avefekau ki kogā fenua katoa o Isalaelu. Kafai e seai se tino e mafai o faka‵sao ne ia matou, ko takavale ei matou i a koutou.” 4 Fakamuli ifo, ne oko atu a avefekau ki Kipea+ te fenua o Saulo kae fai atu a pati konei ke lagona ne tino, kae ne ‵tagi paka‵laga ei a tino.
5 Kae ko Saulo ne vau mai te vao mai tua o te lafu manu, kae ne fai atu a Saulo: “Se a te fakalavelave ko tupu ki tino? Kaia e ‵tagi ei?” Tenā ne fai atu ei ne latou a pati a tāgata Iapese. 6 Ne fakamalosi aka a Saulo+ ne te agaga o te Atua i te lagonaga ne ia a pati konei, kae ne kaitaua malosi ei a ia. 7 Tenā ne puke ei ne ia se avā pulumakau kae katikati ki potumea, kae avatu ne ia a mea konā ki kogā fenua katoa o Isalaelu e auala i avefekau, kolā ne fai atu: “So se tino e se tautali i a Saulo mo Samuelu e ‵tau o fakamoemoe ke fai penei tena pulumakau!” Kae ne ma‵taku a tino i a Ieova, tenā ne o‵mai ei latou mo te lotomalie. 8 Tenā ne lau ei ne ia latou i Peeseka, kae ‵tusa mo te toko 300,000 tino Isalaelu kae toko 30,000 tāgata Iuta. 9 Ne fai atu latou ki avefekau kolā ne o‵mai: “Tenei te mea e ‵tau o fai atu ne koutou ki tāgata o Iapese i Kileata, ‘Taeao i te taimi ko ‵vela ei te la, a koutou ka faka‵sao.’” I konā ne olo atu ei a avefekau kae fakailoa atu te mea tenā ki tāgata o Iapese, kae ne fia‵fia malosi latou. 10 Tenā ne fai atu ei a tāgata o Iapese: “Taeao ka takavale matou i a koutou, ko mafai ei ne koutou o fai ki a matou so se mea e ma‵nako koutou ki ei.”+
11 I te suā aso, ne vaevae ne Saulo a tino ki potukau e tolu, kae olo atu latou i te ‵tuga i te tafataeao* ki te kogaloto o te koga ‵nofo o tino Amoni+ kae ‵ta latou ke oko ki te taimi ko ‵vela ei te aso. A tino kolā ne ‵sao ne ‵tele valevale, kae ne seki mafai o olo fakatasi ne tino e tokolua. 12 Tenā ne fai atu ei a tino ki a Samuelu: “Ko oi ne fai olotou pati penei ‘Ko Saulo te tupu o tatou?’+ Tuku mai a tāgata konā ke tamate ne matou.” 13 Kae ne fai atu a Saulo: “E seai se tagata e ‵tau o tamate i te aso nei,+ me i a Ieova ne faka‵sao ne ia a Isalaelu i te aso nei.”
14 Fakamuli ifo, ne fai atu Samuelu ki tino: “O‵mai ke olo tatou ki Kilikala+ ke fakatalitonu atu i a Saulo ko te tupu.”+ 15 Tenā ne olo ei a tino katoa ki Kilikala kae ne fai ne latou i Kilikala a Saulo mo fai te tupu i mua o Ieova. Oti aka, ofo atu ei ne latou a taulaga ‵kai fakatasi i konā i mua o Ieova,+ kae ko Saulo mo tāgata Isalaelu katoa ne fakamanatu ne latou te mea tenā mo te fia‵fia lasi.+